IKIMANYILO 40
Ngimba Tubaghile Ukuya Bulebule Belu M’maso gha Kyala?
Inong’onela ukuti mama walughano ikuntendekesya umwanake undumyana ukubuka ku sukulu. Umwene ikuketesya ukuti oghile kangi afwele imyenda imyelu. Isi sikumpangisya umwana uyu ukuya nu bumi ubununu kangi sikunangisya ukuti abapapi ba mwana uyu bikumpwelelela. Mwakufwana itolo, Tata witu walughano Yehova, ikulonda ukuti nanuswe tuyeghe bandu belu mwakumbili, mu isi tukuyoba kangi na isi tukubomba. Linga tuli belu, tukusayiwa twibene kangi tukungindika Yehova.
1. Ngimba tubaghile ukuya bulebule belu mwakumbili?
Yehova ikutubula ukuti: “Mwisakuyagha bikemo.” (1 Peteri 1:16) Ukuti umundu aye mwikemo, ikulondiwa ukuya mwelu ntuyilo na mwakumbili. Tubaghile ukuya belu mwakumbili linga tukogha, tukusuka imyenda yitu, ukupyela pakaya nu kusuka ifyakwendela fitu akabalilo kosa. Tubaghile kangi ukutulapo ukwelusya Inyumba ya Bunyafyale. Linga tukukindilila ukuya belu mwakumbili, kokuti tukubika ulughindiko kwa Yehova.—2 Bakorinti 6:3, 4.
2. Ngimba tuyilo tuliku utu tukulondiwa ukunangisya ukuti tuye belu?
Ibaibolo likutukasya ukuti “oko twiyelusyeghe kubunyali bosa ubwa mbili nu bwa mbepo.” (2 Bakorinti 7:1) Isi sikusanusya ukuti tukulondiwa ukwepuka ku findu filifyosa ifi fibaghile ukonanga umbili witu na minong’ono ghitu. Tukulondiwa ukwinong’ona ifindu ifi fikunhobosya Yehova, po tughelegheleghe ukwepuka ku minong’ono amabibi. (Salimo 104:34) Tukulondiwa ukughelaghela kangi ukuti ifi tukuyoba fiyeghe fyelu.—Belenga Bakolosi 3:8.
Ngimba findu fiki ifingi ifi fibaghile ukutupangisya ukuti tuyeghe belu mwakumbili na ntuyilo? Filipo ifindu fimo ifi fibaghile ukonanga umbili witu. Yonongwa yake tukulondiwa ukwepuka ku findu bo ingambo pamo ukubombela imbombo imikota yakusyutisya ubongo. Linga tukwepuka ku findu ifi, tubaghile ukuya nu bumi ubununu kangi bo tukunangisya ukuti tukukighindika ikyabupe kya bumi. Tubaghile ukughelaghela kangi ukuya belu mwakulimbana nu tuyilo utubibi mwakuleka ukwangasya utumbakasya utu tufisiwe isi sibaghile ukutupangisya ukuti tupange ubulowe. (Salimo 119:37; Baefesi 5:5) Kukaya kupepe ukuti tumalane nu tuyilo utu, loli nu butuli bwa Yehova tubaghile ukufwanisya.—Belenga Yesaya 41:13.
MANYILA NYINGI
Keta muno tubaghile ukungindika Yehova linga tuli belu kangi na muno tubaghile ukumalanilana nu tuyilo utubibi.
3. Tukungindika Yehova linga tuli belu mwakumbili
Linga tukubelenga indaghilo isi Yehova akipele ikikolo kya Israeli, tukuketa muno umwene aketelagha ukuya kwakulondiwa linga abandu bake belu. Belenga Ukusoka 19:10 na 30:17-19, ukufuma apo muyobesanie amalalusyo agha:
-
Ngimba amavesi agha ghikufumbula isyafiki ukuketa muno Yehova ikuketela pa nkhani yakuya belu kumbili?
-
Ngimba mukulondiwa ukubomba isyafiki ukuti akabalilo kosa muyeghe belu?
Ukuti mundu aye mwelu mwakumbili, fikulondiwa akabalilo nu kwiyipa. Loli tubaghille ukubomba isi kulikosa kuno tukwikala nalinga ukuti tuli bakabi pamo balondo. Ketelela IVIDIYO, ukufuma apo muyobesanie ilalusyo ili.
-
Nongwa yafiki abandu aba tukubafumukisya bikungindika fiyo Yehova linga bikuketa ukuti ifindu fitu fyelu?
4. Tukulondiwa ukutuleka utuyilo utubibi
Yehova abaghile ukututula ukumalana na kayilo kalikosa akabibi
Linga mukukwesa ingambo pamo mukubombela imikota yakusyutisya ubongo, kubaghile ukuya kukafu ukuti muleke utuyilo utu. Ngimba findu fiki fibaghile ukututula? Inong’onela muno utuyilo utu tubaghile ukubapalamasyila. Belenga Matai 22:37-39, ukufuma apo muyobesanie muno ingambo pamo imikota iyakusyutisya ubongo yibaghile ukupalamasyila . . .
-
ubumanyani bwinu na Yehova
-
ubumanyani bwa mumbumba na bandu abangi
Mwiyuleghe ukuti muleke akayilo akabibi. a Ketelela IVIDIYO.
Belenga Bafilipi 4:13, ukufuma apo muyobesanie ilalusyo ili:
-
Nongwa yafiki ukwiputa akabalilo kosa, ukumanyila Ibaibolo nu kwaghiwapo pangomano kukuntula umundu ukuti aleke utuyilo utubibi?
5. Ukutuleka utuyilo na minong’ono amabibi
Belenga Bakolosi 3:5, ukufuma apo muyobesanie amalalusyo agha:
-
Ngimba tukumanya bulebule ukuti ukupanga ifyabulowe nu kwangasya utumbakasya utu tufisiwe tuyilo tubibi m’maso gha Yehova?
-
Ngimba mukwinong’ona ukuti Yehova ikughulila ukuti tubaghile ukuya nu tuyilo utununu? Nongwa yafiki mukuyoba bo ulu?
Keta inongwa iyi tukulondiwa ukulimbana nu tuyilo utubibi. Ketelela IVIDIYO.
Yesu abombelagha ififwanikisyo ukunangisya ukuti sibaghile ukubombiwa ukuti tuyeghe belu. Belenga Matai 5:29, 30, ukufuma apo muyobesanie ilalusyo ili:
-
Apa Yesu akayobagha ukuti tubaghile ukwifulasya twibene mwakumbili loli ayobagha ukuti tukulondiwa ukughelaghela ukuti tubombepo simo. Ngimba findu filiku ifi umundu abaghile ukubomba ukuti epuke kutuyilo utubibi? b
Linga mukughelaghela ukuti mutole aminong’ono amibibi, Yehova ikuya pakubasaya panongwa ya kughelaghela kwinu. Belenga Salimo 103:13, 14, ukufuma apo muyobesanie ilalusyo ili:
-
Linga mukutamiwa ukumalana nu tuyilo utubibi, ngimba ilemba ili libaghile ukubakasya bulebule ukuti mukindilileghe ukulwa ubwite?
Komma ukuwa amaka
Kubaghile kuya kupepe ukwinong’ona ukuti, ‘ndoliwe, ngwile amaka.’ Loli inong’onela isi: Linga umundu uyu ikupanga umpalano wa kubopa igundwile nu kuwa, isi sitikusanusya ukuti atoliwe pa mpalano wakubopa, loli ikunyamuka kangi nu kwanda ukubopa. Mwakufwana itolo, ukuwa amaka kutikusanusya ukuti umundu atoliwe ukulimbana nu tuyilo utubibi. Loli mubaghile ukwipilika kanunu panongwa ya kughelaghela kwinu uku mukubomba. Mutikulondiwa ukuwa amaka, nu butuli bwa Yehova mukuya pakutola utuyilo utubibi.
ABANDU BAMO BIKUYOBA UKUTI: “Fyo ifi nisibile ukubomba. Ngabaghila ukuleka.”
-
Ngimba ilemba liliku ili mubaghile ukun’nangisya umundu ukuti nu butuli bwa Yehova abaghile ukuleka utuyilo utubibi?
IFUNDO INYWAMU
Tukunhobosya Yehova linga tukupwelelela umbili witu, aminong’ono nu tuyilo twitu.
Ukughomokelamo
-
Nongwa yafiki kwakulondiwa ukuya belu?
-
Ngimba mubaghile ukuya belu bulebule mwakumbili?
-
Ngimba mubaghile ukukindilila bulebule ukuya belu m’minong’ono na ntuyilo?
KETA KANGI IFINGI
Ngimba findu filiku ifipepe ifi mubaghile ukufwanisya ukubomba ukuti muye belu nalinga ukuti muli balondo?
Injila isi sibaghile ukubatula ukuti muleke ukukwesa ingambo.
“Kasi Mungachita Wuli Kuti Muleke Kukhweŵa Hona?” (Wukani!, Meyi 2010)
Keta ububibi bwakuketelela ifithuzi fya mwiko.
“Kodi Kuonera Zolaula Kuli Ndi Mavuto Otani?” (Nsanja ya Olonda, August 1, 2013)
Keta isi syalintulile umundu yumo ukuti aleke ukuketelela ifithuzi ifya mwiko.
“Nkhatondeka Kanandi Waka, Kweni Pamanyuma Nkhasintha” (Gongwe la Mulinda Na.4 2016)
a Inkhani yakuti “Kodi Munthu Angatani Kuti Asiye Kusuta,” iyi yikwaghiwa pakighaba ikyakuti Keta Kangi Ifingi nkimanyilo iki, yikulingania ifindu ifi tubaghile ukubomba ukuti tuleke utuyilo utubibi.
b Ifi fibaghile ukuntula umundu ukuti epuke ku kayilo ka kwangasya utumbakasya utu tufisiwe, pa mutu wakuti “Kodi Ndingatani Kuti Ndisiye Chizolowezi Choseweretsa Maliseche?” mu buku iyakuti Mayankho a Zimene Achinyamata Amafunsa—Buku Loyamba Mutu 25.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
