IKIMANYILO 42
Ngimba Ibaibolo Likuyoba Isyafiki pa Nkhani Yakuya Pabweghi nu Kuleka Ukuya Pabweghi?
Mu nyiho simo, abandu bamo bikusubila ukuti umundu akabaghila ukuya walusekelo linga akaya pabweghi. Ukuyoba ubwanaloli bakaya bosa aba bali pabweghi bali nu lusekelo kangi sitikusanusya ukuti bosa aba bakaya pabweghi bakaya ba lusekelo. Ibaibolo likuyoba ukuti bosa aba bakaya pabweghi na aba bali pabweghi bikusayiwa na Yehova.
1. Ngimba umundu uyu akaya pabweghi ikusayiwa bulebule?
Ibaibolo likuyoba ukuti: “Uyu ingile mbweghi abombile kanunu loli uyu akaya mbweghi abombile kanunu ukukindapo.” (Belenga 1 Bakorinti 7:32, 33, 38. NWT) Ngimba mo mu njila siliku isi uyu akaya pabweghi ikubomba “kanunupo”? Abandu aba bakaya pabweghi batikwiyaya ni fyakulondiwa fya mwinake wa pabweghi. Yonongwa yake bikuya nu bwabuke bwingi. Mwakifwanikisyo, bamo bikwiyipa ukubomba nyingi pambombo ya Yehova, abene bikuhoboka ni findu ifyakuhobosya bo ukwenda ubulendo ukubuka nkisu ikingi ukwakufumusya amasyu amanunu. Ukukinda fyosa, abene bikuya na kabalilo akanywamu akakukusyila ubumanyani bwabo na Yehova.
2. Ngimba bununu buliku ubu bukuyapo panongwa yakulembesya ubweghi ku boma?
Mwakukindana nu kuleka ukuya pabweghi, aba bali pabweghi bikusayiwa mwapadela fiyo. Ibaibolo likuyoba ukuti “ukuya babili ko kununupo.” (Undumbilili 4:9) Abakristu ba bwanaloli bo aba bikulondiwa ukuya kifwanikisyo kinunu pa nkhani iyi. Abandu aba balembisye ubweghi bwabo bikufinga ukuti akabalilo kosa bikuya pakughanana, ukughindikana kangi nu kupwelelelana mbweghi bwabo. Ifyakukongapo fyake, abene bikufighililiwa fiyo ukukinda abandu aba bikwikalila itolo pampene. Kangi na bana bope bikufighililiwa.
3. Ngimba Yehova ikubuketa bulebule ubweghi?
Pakabalilo aka Yehova apelile imbumba iyakwanda, umwene ayobile ukuti: “Umundu isakundekagha uwise nunna, isakumumililagha yu nkasi.” (Ubwandilo 2:24) Yehova ikulonda ukuti unnyambala nu nkasi wake baghananeghe kangi bumililaneghe pakabalilo kosa aka bali nu bumi. Umwene ikwitikisya ukumasya ubweghi pene linga yumo wa mbweghi abombile ubulowe. Linga isi sibombiwe, Yehova ampele ubwabuke uyu akabomba ubulowe ukumasya ubweghi pamo hayi. a (Matai 19:9) Yehova atikwitikisya ukuti Abakristu begheghe imitala.—1 Timoti 3:2.
MANYILA NYINGI
Keta muno mubaghile ukuyila balusekelo kangi muno mubaghile ukumpangisyila Yehova ukuya walusekelo linga mukaya pabweghi kangi linga muli pabweghi.
4. Tubombeleghe kanunu ikyabupe ikyakuleka ukuya pabweghi
Yesu aketagha ukuleka ukuya pabweghi ukuya kyabupe. (Matai 19:11, 12) Belenga Matai 4:23, ukufuma apo muyobesanie ilalusyo ili:
-
Ngimba Yesu abombile bulebule ikyabupe kyake ikyakuleka ukuya pabweghi mwakumbombela Tata wake nu kubatula abangi?
Abakristu aba bakaya pabweghi babaghile ukubombela kanunu ikyabupe kyabo ikyakuleka ukuya pabweghi bo muno Yesu abombile. Ketelela IVIDIYO, ukufuma apo muyobesanie ilalusyo ili.
-
Ngimba mo mu njila siliku isi Abakristu babaghile ukubombela ikyabupe kyabo ikyakuleka ukuya pabweghi?
Ngimba musimenye?
Ibaibolo litikuyoba ifyinja ifi umundu ikulondiwa ukwegha pamo ukweghiwa. M’malo mwake, likunkasya umundu ukuti ikulondiwa ukughulila ukuti akinde “pabusungu” pakabalilo aka aminong’ono gha kughonana ghikuya ukuti ghakwelile kangi ghabaghile ukumpangisya umundu ukuti atoliwe ukusala kanunu.—1 Bakorinti 7:36.
5. Musaleghe mwamahala umundu uwakweghana nawe
Ukusala kanunu umundu uwakweghana nawe kyo kindu kyakulondiwa fiyo iki umundu ikulondiwa ukupanga. Belenga Matai 19:4-6, 9, ukufuma apo muyobesanie ilalusyo ili.
-
Nongwa yafiki Unkristu atikulondiwa ukubopela ukwingila mbweghi?
Ibaibolo libaghile ukututula ukuketa utuyilo utununu m’mundu uyu tukulonda ukweghana nawe. Ukukinda fyosa tukulondiwa ukweghana nu mundu uyu anganile Yehova. b Belenga 1 Bakorinti 7:39 na 2 Bakorinti 6:14. Ukufuma apo muyobesanie amalalusyo agha:
-
Nongwa yafiki tukulondiwa ukweghana na nu Nkristu umwinitu?
-
Ngimba mukwinong’ona ukuti Yehova abaghile ukwipilika bulebule linga tweghene nu mundu uyu akangana Umwene?
Linga ifinyamana ifi fikindene isayizi bafikungisenie pampene, fibaghile ukutamiwa. Mwakufwana itolo, linga Unkristu eghene nu mundu uyu akaya Nketi abaghile ukwaghana ni ndamyo
6. Mubuketeghe ubweghi bo muno Yehova ikubuketela
Nkabalilo ka Baisraeli, abanyambala bamo babalekagha abakasi babo pa fifukwa ifisita kupilikiwa. Belenga Malaki 2:13, 14, 16, ukufuma apo muyobesanie ilalusyo ili:
-
Nongwa yafiki Yehova akubengile ukumasya ubweghi kisita kifukwa ikyakufuma mu Baibolo?
Linga umundu abombile ubulowe nu kumasya ubweghi, uyu akapanga ubulowe na bana bikutamiwa fiyo
Ketelela IVIDIYO, ukufuma apo muyobesanie ilalusyo ili.
-
Linga mweghene nu mundu uyu atikumbombela Yehova, ngimba mubaghile ukubomba isyafiki ukuti ubweghi bwinu buyeghe bwalusekelo?
7. Mukongeghe ifundo sya Yehova mbweghi bwinu
Abandu bikulondiwa ukwiyula fiyo ukuti bakongeghe ifundo sya Yehova mbweghi bwabo. c Loli Yehova ikusisaya fiyo syosa isi bikubomba. Ketelela IVIDIYO.
Belenga Bahiburi 13:4, ukufuma apo muyobesanie amalalusyo agha:
-
Ngimba mukwinong’ona ukuti ifundo sya Yehova pa nkhani ya bweghi syakupilikiwa? Nongwa yafiki tukuyoba bo ulu?
Yehova ikulonda ukuti abandu balembesyeghe ubweghi bwabo ku boma kangi bikulondiwa ukumasya ubweghi ku boma panongwa yakuti mfisu fingi iboma likulonda ukuti abandu balembesye ubweghi bwabo. Belenga Titi 3:1, ukufuma apo muyobesanie ilalusyo ili:
-
Linga muli pabweghi, ngimba musimikisye ukuti ubweghi bwinu bumanyiwe ku boma?
YUMO ABAGHILE UKULALUSYA UKUTI: “Nongwa yafiki ngulondiwa ukwingila mbweghi? Ngimba aba bakaya pabweghi bakabaghila ukwikalila itolo pampene?”
-
Ngimba mubaghile ukwamula isyafiki?
IFUNDO INYWAMU
Ukuleka ukuya pabweghi pamo ukuya pabweghi kyabupe ikyakufuma kwa Yehova. Bosa babaghile ukuya balusekelo nu kwikutisiwa na ifi balinafyo linga bikubomba ubwighane bwa Yehova.
Ukughomokelamo
-
Ngimba umundu abaghile ukukibombela bulebule ikyabupe kyake ikyakuleka ukuya mbweghi?
-
Ngimba Ibaibolo likuyoba isyafiki pankhani ya kweghana mwa Mwalafyale yumoywene?
-
Ngimba Ibaibolo likuyoba ukuti ikifukwa kyakumasyila ubweghi kyo kiliku?
KETA KANGI IFINGI
Ngimba ukweghana mu “Mwalafyale yumoywene” kukusanusya isyafiki?
“Mafumbo Ghakufumira ku Waŵazgi” (Gongwe la Mulinda, Julayi 1, 2004)
Ketelela amavidiyo amapimba mabili agha ghabaghile ukubatula ukusala kanunu pa nkhani ya kibwezi nu bweghi.
Keta inongwa iyi unkamu yumo ipilikagha ukuti ifindu ifi Yehova ampele fyali fya pamwanya fiyo ukukinda fyosa ifi afilekile.
Nali nu Lusubilo Ukuti Umwene Abaghile Ukumanyila Ubwanaloli (1:56)
Ngimba findu filiku ifi umundu ikulondiwa ukwinong’onelapo bo akali ukumasya ubweghi?
“Mughindikeghe ‘Iki Kyala Akungisenie Pampene’” (Ingasya ya Ndindilili, Disembala 2018)
a Keta Amasyu gha Pabumalilo 4 pa nkhani yakumasya ubweghi linga ubulowe bukabombiwa.
b Inyiho simo, abapapi bo aba bikunsalila umwanabo umundu uwakweghana nawe. Linga sili bo ulu, abapapi ba lughano batikulondiwa ukwinong’onela isya mundu uyu ali ni ndalama pamo uluso lumo loli baketeghe linga anganile Yehova.
c Linga mukwikala nu mundu uyu mukeghana nawe, fili nanumwe ukusala ukukindilila ukwikala nawe pamo ukundeka.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
