IKIMANYILO 43
Ngimba Abakristu Bikubuketa Bulebule Ubwalwa?
Pa kisu kyosa, abandu bali naminong’ono aghakukindakindana pankhani ya bwalwa. Bamo bighanile ukuti banweghe ubwalwa pene apa linga bali pampene na bamanyani babo. Abangi basalile ukuleka ukunwa ubwalwa. Loli bamo basalile ukuti banweghe fiyo ukufika nu kughala. Ngimba Ibaibolo likuti fiki pankhani ya bwalwa?
1. Ngimba kubibi ukunwa ubwalwa?
Ibaibolo litikuyobapo ukuti kubibi ukunwa ubwalwa. Linga Ibaibolo likuyoba ifindu ifinunu ifi Kyala atupele, ilyene likongelelapo ‘ubwalwa bwa mafilu ubu bukuyisangalusya indumbula ya mundu.’ (Salimo 104:14, 15) Abakristu abasubiliwa bamo aba bayobiwe mu Baibolo, banwagha ubwalwa.—1 Timoti 5:23.
2. Ngimba bulongosi buliku ubu Ibaibolo likubapa bosa aba basalile ukunwa ubwalwa?
Yehova ikukanisya ukunwa fiyo ubwalwa nu kughala. (Bagalatia 5:21) Amasyu ghake ghikuyoba ukuti: “Ungayagha bulilanisi nabaghalabwalwa.” (Isya Mbupingamu 23:20) Linga tusalile ukunwa ubwalwa kali tuye patwibene, tutikulondiwa ukuti tunweghe fiyo nu kutoliwa ukwinong’ona kanunu, ukwikola m’masyu kangi na mfyakubomba pamo ukughupwelelela umbili witu. Linga tukuketa ukuti tukabaghila ukwikola ukuti tunweghe panandi, po kununu ukuleka itolo ukunwa ubwalwa.
3. Ngimba tubaghile ukusighindika bulebule isi abinitu basalile pankhani ya bwalwa?
Umundu aliwesa ikulondiwa ukusala linga ikulonda ukunwa ubwalwa. Tutikulondiwa ukundonga umundu uyu asalile ukuti anwengepo panandi kangi tutikulondiwa ukumfimbilisya umundu ukuti anweghe ubwalwa apa umwene atikulonda. (Baroma 14:10) Tukusala ukuleka ukunwa ubwalwa linga tumenye ukuti isi sibaghile ukubapangisya indamyo abangi. (Belenga Baroma 14:21.) Tutikwilondela ‘si syitu syene loli si sya yungi.’—Belenga 1 Bakorinti 10:23, 24.
MANYILA NYINGI
Keta ubulongosi bwa mu Baibolo ubu bubaghile ukubatula ukuti musale linga mukulondiwa ukunwa ubwalwa kangi ubwingi bwake. Keta kangi isi mubaghile ukubomba linga mukwaghana nindamyo panongwa ya kunwa ubwalwa.
4. Keta linga mubaghile ukunwa
Ngimba Yesu akuketagha bulebule ukunwa ubwalwa? Ukuti tukete ansala, inong’onela ikyakuswighisya ikyakwanda iki Yesu apelile. Belenga Yohani 2:1-11, ukufuma apo muyobesanie amalalusyo agha:
-
Ukufwana ni kika iki, ngimba tubaghile ukumanyilako isyafiki isyakufwana na muno Yesu abuketelagha ubwalwa kangi na bosa aba banwagha?
-
Nalinga ukuti Yesu akakanisye ukunwa ubwalwa, ngimba Abakristu bikulondiwa ukunketa bulebule umundu uyu asalile ukunwa ubwalwa?
Nalinga ukuti Abakristu babuke ukunwa ubwalwa, isi sitikusanusya ukuti akabalilo kosa baketeghe ukuti ko kwakulondiwa fiyo. Belenga Isya Mbupingamu 22:3, ukufuma apo mukete linga mubaghile ukunwa ubwalwa linga muli mu fyakubombiwa ifyakukongapo ifi:
-
Linga mukwendesya igalimoto pamo kilikyosa iki kikwendela injini.
-
Linga muli nu lwanda.
-
Linga abadokotala bababulile ukuti mutikulondiwa ukunwa ubwalwa.
-
Linga mukutamiwa ukwikola linga munwile fiyo ubwalwa.
-
Linga indaghilo sikubakanisya ukunwa ubwalwa.
-
Linga muli nu mundu yumo uyu alekile ukunwa panongwa yakuti atoliwagha ukwikola pakabalilo aka anwagha.
Ngimba mubaghile ukubikapo ubwalwa pa bukwati bwinu pamo pa fyakusangalusya fimo? Ukuti mukete isi sibaghile ukubatula ukuti musale kanunu, ketelala IVIDIYO.
Belenga Baroma 13:13 na 1 Bakorinti 10:31, 32. Linga mubelengile ilemba lililyosa, muyobesanie ilalusyo ili:
-
Ngimba ukukonga ubulongosi ubu kubaghile ukututula bulebule ukuti tusale kanunu ifindu ifi fibaghile ukunhobosya Yehova?
Unkristu aliwesa ikulondiwa ukusala mwene linga ikulonda ukunwa ubwalwa pamo hayi. Nalinga ukuti utubalilo tumo ikunwa ubwalwa, loli ikulondiwa ukusala ukuleka ukunwa
5. Mwinong’oneleghe muno mubaghile ukunwela
Linga musalile ukunwa ubwalwa, mukulondiwa ukukumbuka isi: Yehova akakanisya ukunwa ubwalwa, loli umwene akanisye ukughala. Nongwa yafiki? Belenga Hoseya 4:11, 18, ukufuma apo muyobesanie ilalusyo ili:
-
Ngimba findu fiki fibaghile ukubombiwa linga umundu anwile fiyo ubwalwa?
Ngimba findu fiki ifi fibaghile ukututula ukuti tuleke ukunwa fiyo ubwalwa? Tukulondiwa ukwiyisya kangi nu kuya nu mpaka. Belenga Isya Mbupingamu 11:2, ukufuma apo muyobesanie ilalusyo ili:
-
Nongwa yafiki kununu ukwibikila umpaka wa muno tubaghile ukunwela ubwalwa?
6. Ifi fibaghile ukuntula umundu ukuti aleke ukunwa fiyo ubwalwa
Keta isi syalintulile umundu yumo ukuti aleke ukunwa fiyo ubwalwa. Ketelela IVIDIYO, ukufuma apo muyobesanie ilalusyo ilyakukongapo ili.
-
Ukufwana ni vidiyo iyi, ngimba ubwalwa bwalimpalamasisye bulebule Dmitry muno abombelagha ifindu?
-
Ngimba umwene alekile ukunwa pakabalilo kalakala?
-
Ngimba pabumalilo abombile isyafiki ukuti aleke ukunwa fiyo ubwalwa?
Belenga 1 Bakorinti 6:10, 11, ukufuma apo muyobesanie amalalusyo agha:
-
Ngimba findu fiki fikubombiwa linga umundu aghele ubwalwa?
-
Ngimba findu fiki fikunangisya ukuti umundu uyu ali na kayilo ka kunwa fiyo ubwalwa abaghile ukuchenja?
Belenga Matai 5:30, ukufuma apo muyobesanie ilalusyo ili:
-
Pakabalilo aka Yesu abombile ikifwanikisyo ikyakutumula ikiboko, umwene asanusyagha ukuti tukulondiwa ukufileka ifindu fimo ifi Kyala afibengile ukuti tunhobosye umwene. Ngimba mubaghile ukubomba isyafiki linga mukutamiwa ukuleka akayilo akakughala? a
Belenga 1 Bakorinti 15:33, ukufuma apo muyobesanie amalalusyo agha:
-
Ngimba abamanyani binu babaghile ukubapalamasya bulebule ukuketa muno mukunwela ubwalwa?
ABANDU BAMO BIKULALUSYA UKUTI: “Ngimba ukunwa ubwalwa kubibi?”
-
Ngimba mubaghile ukwamula bulebule?
IFUNDO INYWAMU
Yehova atupele ubwalwa ukuti tuhobokeghe nabo, loli umwene akanisye ukuti tunweghe fiyo nu kughala.
Ukughomokelamo
-
Ngimba Ibaibolo likuyoba isyafiki pankhani ya kunwa ubwalwa?
-
Ngimba ndamyo siliku isi sikuyapo linga umundu anwile fiyo ubwalwa?
-
Ngimba tubaghile ukusighindika bulebule isi abangi basalile pankhani ya kunwa ubwalwa?
KETA KANGI IFINGI
Ngimba abalumyana na balindwana babaghile ukubomba bulebule ukuti basale kanunu pa nkhani ya bwalwa?
Mulonde injila isi sibaghile ukubatula ukumalana ni ndamyo ya kunwa fiyo ubwalwa.
“Khalani ndi Maganizo Oyenera Pankhani ya Kumwa Mowa” (Nsanja ya Olonda, January 1, 2010)
Ngimba Abakristu bikukomesania abatambulala?
“Mafumbo Ghakufuma ku Ŵaŵazgi” (Gongwa la Mulinda, Febuluwale 15, 2007)
Mu nkhani iyakuti “Nkhaŵa Chiswa Nthema,” keta muno umundu alekile ukunwa fiyo ubwalwa.
“Baibolo Likusintha Umoyo wa Ŵanthu” (Gongwa la Mulinda, Meyi 1 2012)
a Abandu aba bikunwa fiyo ubwalwa bikulondiwa ubutuli bwa padela ukuti baleke akayilo kabo. Abadokotala bingi bikuyoba ukuti abandu aba bali ni ndamyo ya kunwa ubwalwa batikulondiwa ukunwa kangi.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
