IKIMANYILO 44
Ngimba Ifyakusangalusya Fyosa Fikunhobosya Yehova?
Yehova ikulonda ukuti tuhobokeghe nu bumi mwakusangalukapo utubalilo tumo. Loli ngimba ifyakusangalusya na maholide fikunhobosya umwene? Ngimba tubaghile ukunangisya bulebule ukuti tunganile Yehova mfyakubombiwa bo ifi?
1. Nongwa yafiki ifyakusangalusya fingi fitikunhobosya Yehova?
Lumo mubaghile ukuswigha ukumanya ukuti ifyakusangalusya fingi fitikukolelana nifimanyisyo fya mu Baibolo kangi fyalyandile na bandu ba panja. Ifyakusangalusya bo ifi fitikukolelana ni fundo sya m’malemba loli fikukolelana nu kwiputa kwabutungulu. Kangi ifyakusangalusya ifi fibaghile ukuti fikukolelana ni mbepo inyali kangi ni fundo iyakuti ikindu kimo kitikufwa linga umundu afwile. Ifyakusangalusya fimo fitotike mu nkhani sya bulosi pamo ukuti ifindu fimo fikubombiwa ndusako. (Yesaya 65:11) Yehova ikubasoka ababombi bake ukuti “Amusokengemo mmyabo . . . mungapalamasyagha akanyali.”—2 Bakorinti 6:17. a
2. Ngimba Yehova ikwipilika bulebule ni fyakusangalusya ifi fikubika ulughindiko ku bandu?
Yehova ikutusoka ukuti tutikulondiwa ukubika “ulusubilo mmundu.” (Belenga Yeremiya 17:5.) Amaholide ghamo ghikubaghindika abalaghili na basilikali. Bamo bikusekela ifimanyikilo fya nkisu pamo ukwiyimila bene. (1 Yohani 5:21) Loli abangi bikusekela ifya ndyali pamo utubughatila twa bandu. Ngimba mukwinong’ona ukuti Yehova ikwipilika bulebule linga tukubika ulughindiko ku mundu yumo pamo akabughatila ka bandu fiyofiyo aba bikukasya ifindu ifi fitikukolelana nu bwighane bwake?
3. Ngimba fyakubombiwa filiku ifi fikupangisya ukuti ifyakusangalusya fiyeghe fibibi?
Ibaibolo likukanisya ifindu bo “ukunwa fiyo ubwalwa, balufu kufyakulya, [kangi] ukughala.” (1 Peteri 4:3) Ifyakusangalusya fimo fikubapangisya abandu bamo ukubomba utuyilo utubibi. Ukuti tukindilile ukuya bamanyani ba Yehova, tukulondiwa ukwepuka ku tuyilo utubibi utu.
MANYILA NYINGI
Keta muno mubaghile ukunhobosyela Yehova mwa kusala ifyakubomba ifi fikukolelana na maholide kangi ni fyakusangalusya.
4. Mukaneghe ifyakusangalusya ifi fitikungindika Yehova
Belenga Baefesi 5:10, ukufuma apo muyobesanie amalalusyo agha:
-
Nongwa yafiki tukulondiwa ukwinong’onelapo linga tukulonda ukusekela amaholide?
-
Ngimba maholide ghaliku agha ghikubombiwa fiyo nkighaba kyinu?
-
Ngimba mukwinong’ona ukuti amaholide ghosa agha ghikunhobosya Yehova?
Mwakifwanikisyo, ngimba mwinong’onilepo muno Kyala ikuketela ukukumbukila amasiku aghakupapiwa? Ibaibolo litikuyobapo ukuti ababombi bake bakumbukilagha amasiku aghakupapiwa loli likuyoba isya bandu babili aba bakumbukilagha amasiku aghakupapiwa kangi bakali babombi ba Yehova. Belenga Ubwandilo 40:20-22 na Matai 14:6-10. Ukufuma apo muyobesanie amalalusyo agha:
-
Ngimba amaholide ghosa ghikukolelana pa fundo yiliku?
-
Ukufwana ni fyakubombiwa ifya mu Baibolo ifi, ngimba mukwinong’ona ukuti Yehova ikwipilika bulebule pa nkhani iyakukumbukila amasiku aghakupapiwa?
Loli mubaghile ukwilalusya ukuti, ngimba kwakulondiwa ukuti nsekeleghe amasiku aghakupapiwa pamo ifyakusangalusya ifi fitikukolelana na malemba?’ Belenga Ukusoka 32:1-8. Ukufuma apo ketelela IVIDIYO, kangi muyobesanie amalalusyo aghakukongapo agha.
-
Nongwa yafiki tukulondiwa ukwinong’onela ikindu iki kyakulondiwa kwa Yehova?
-
Nongwa yafiki tukulondiwa ukubomba isi?
Ngimba tubaghile ukufimanya bulebule ifyakusangalusya ifi fitikunhobosya Kyala?
-
Ngimba fikukolelana ni fundo sya m’malemba? Ukuti mumanye, fufuza muno fyalyandile.
-
Ngimba fikubika ulughindiko ku bandu, akabughatila ka bandu pamo kufimanyikilo fya nkisu? Pamwanya pa fyosa tukulondiwa ukungindika nu kunsubila Yehova ukuti umwene ikuya pakumasya indamyo sya nkisu.
-
Ngimba inyiho nu tuyilo utu fikukolelana ni fundo sya mu Baibolo? Tukulondiwa ukukindilila ukuya nu tuyilo utununu.
5. Mubatuleghe abangi ukuti bafighindikeghe ifi mukusubila
Kubaghile ukuya kwakutamya fiyo ukukana linga bamo bikubafimbilisya ukubomba ifyakusangalusya ifi fitikunhobosya Yehova. Mubalinganie pa isi musalile mbololo kangi mwamahala. Ukuti mukete ikifwanikisyo kya muno mubaghile ukubombela isi, ketelela IVIDIYO.
Belenga Matai 7:12, ukufuma apo muyobesanie amalalusyo agha:
-
Ukufwana ni lemba ili, ngimba mubaghile ukubabula aba mumbumba yinu aba bakaya baketi ba Yehova ukuti abene batikulondiwa ukusekela amaholide?
-
Ngimba findu fiki ifi mukulondiwa ukubomba ukuti mubasimikisyile aba mumbumba yinu ukuti nalinga mutikuya pakusekela amaholide loli mubaghanile kangi mukubaghindika?
6. Yehova ikulonda ukuti tuyeghe balusekelo
Yehova ikulonda ukuti tuyeghe na kabalilo akanunu akakuhobokela na ba mumbumba yitu kangi na bamanyani bitu. Belenga Undumbilili 8:15, ukufuma apo muyobesanie ilalusyo ili:
-
Ngimba ivesi ili likunangisya bulebule ukuti Yehova ikulonda ukuti tuyeghe balusekelo?
Yehova ikulonda ukuti ababombi bake bahobokeghe kangi bayeghe na kabalilo kakwangalila pampene. Ketelela IVIDIYO ukuti mukete isi ukuya syakulondiwa pa palukomano lwa pa kisu kyosa.
Belenga Bagalatia 6:10, ukufuma apo muyobesanie amalalusyo agha:
-
Ngimba tubaghile ukusekela amaholide nu kubomba “isi nunu” ku bangi?
-
Ngimba po pakabalilo kaliku aka mubaghile ukupa mwalusekelo? Ngimba po pakabalilo ka maholide pamo panongwa yakuti syo isi mukulonda ukubomba?
-
Abaketi ba Yehova bingi utubalilo twingi bikubatendekesyela abanabo akandu kamo kapadela bo ukubapako ifyabupe. Linga muli na bana, ngimba findu fiki fimo ifi mubaghile ukubabombela abaninu?
ABANDU BAMO BIKUYOBA UKUTI: “Fikaya fyakulondiwa ukumanya muno amaholide ghalyandile. Loli ikyakulondiwa ko kuya na kabalilo akakwangalila na ba mumbumba na bamanyani.”
-
Ngimba mubaghile ukuyoba isyafiki?
IFUNDO INYWAMU
Yehova ikulonda ukuti tuyeghe na kabalilo akakuhobokela na ba mumbumba na bamanyani bitu. Ikulonda kangi ukuti twepukeghe ku fyakusangalusya ifi fitikunhobosya.
Ukughomokelamo
-
Ngimba malalusyo ghaliku agha tukulondiwa ukwilalusya linga tukulonda ukubomba ifyakusangalusya ifi fitikungindika Yehova?
-
Ngimba tubaghile ukubatula bulebule aba mumbumba na bamanyani bitu ukuti bapilikisye isi tusalile isyakufwana na maholide?
-
Ngimba tukumanya bulebule ukuti Yehova ikulonda ukuti tuhobokeghe kangi tuyeghe na kabalilo ka kwangalila?
KETA KANGI IFINGI
Keta amaholide ghamo agha Abakristu batikulondiwa ukusekela.
“Chifukwa Wuli Ŵakaboni ŵa Yehova Ŵakuchitako Yayi Maholide Ghanyake?” (Inkhani ya pawebusayiti)
Keta ififukwa 4 ifi tukusubila ukuti ukusekela amasiku aghakupapiwa kutikunhobosya Kyala.
Keta muno wakilumyana uyu anganile Yehova abaghile ukunhobosyela umwene pakabalilo ka maholide.
Abakristu bingi fiyo basalile ukuleka ukusekela Ikilisimasi. Ngimba mukwipilika bulebule pa isi musalile?
“Amasangalala Ngakhale Kuti Sachita Khirisimasi” (Nsanja ya Olonda, December 1, 2012)
a Keta Amasyu gha Pabumalilo 5 ukuti tukete muno tubaghile ukubombela linga tukubaketa abandu bamo bikusekela amaholide bo agha.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
