IKIMANYILO 46
Nongwa Yafiki Tukwiyipa nu Kosiwa?
Umundu aliwesa ikwiyipa mwene kwa Yehova mwakufinga ku myake ukwendela ndwiputo ukuti ikuya pakumbombelagha mwene kangi nu kubika ubwighane bwake pabwandilo pa bumi bwake. (Salimo 40:8) Ukufuma apo ikosiwa. Ukubomba isi, kukunangisya ukuti umwene aliyipile kale. Ukusala ukwiyipa kwa Yehova kyo kindu kyakulondiwa fiyo iki umundu ikulondiwa ukupanga. Iki kyakusala kyakulondiwa fiyo iki umundu ikulondiwa ukupanga panongwa yakuti kikuchenja ubumi bwa mundu. Ngimba findu fiki fibaghile ukubatula ukuti musale ikyakubomba iki?
1. Ngimba findu fiki ifi fikumpangisya umundu ukuti iyipe mwene?
Ulughano lo ulu lukutupangisya ukuti twiyipe. (1 Yohani 4:10, 19) Ibaibolo likutukasya ukuti: ‘Unganeghe Yehova Kyala wako nindumbula yako yosa, nu moyo wako ghosa na maka ghako ghosa.’ (Marko 12:30) Tukunangisya ukuti tunganile Kyala mu isi tukuyoba nu kubomba.
2. Ngimba lusayo luliku ulu Yehova ikubapa Abaketi bake aba bosiwe?
Linga mosiwe, mukuya mumbumba yalusekelo iya Yehova pa kisu kyosa ikyapasi. Kangi mukuya pakunangisiwa ulughano lwake mu njila isyakukindanakindana, kangi mukuya pakuseghelela fiyo kumyake ukukinda akaballilo kosa. (Belenga Malaki 3:16-18.) Ukongelelapo ukuya bana ba Yehova, mukuya pakuya mu mbumba ya mwambepo iya bakamu na balumbu ba pa kisu kyosa aba banganile umwene kangi bikuya pakubaghana nanumwe. (Belenga Marko 10:29, 30.) Loli mukulondiwa ukubomba nyingi bo mukali ukosiwa. Mukulondiwa ukumanyila isyakufwana na Yehova, ukungana kangi nu kuya nulwitiko mu Mwanake. Pabumalilo, mukulondiwa ukwiyipa ubumi bwinu kwa Yehova. Linga mubombile isi mukulondiwa ukosiwa, isi sisakubapangisya ukuti mukabe ubumi bwa bwila na bwila. Amasyu gha Kyala ghikuyoba ukuti: “Ulosyo . . . ulu nalilino lukubapoka umwe.”—1 Peteri 3:21.
MANYILA NYINGI
Keta inongwa iyi kwakulondiwa kumyinu ukwiyipa kwa Yehova nu kosiwa.
3. Twesa tukulondiwa ukusala uyu tukulonda ukumbombela
Nkabalilo ka Baisraeli, abandu bamo bali na minong’ono aghakuti babaghile ukumbombela Yehova kangi na kyala wa butungulu Bala. Loli Yehova alintumile unsololi wake Elisha ukuti akabatule ukumanya ukuti agha ghali minong’ono mabibi. Belenga 1 Banyafyale 18:21, ukufuma apo muyobesanie ilalusyo ili:
-
Ngimba Abaisraeli balondiwagha ukusala isyafiki?
Ukufwana na Baisraeli, nuswe tukulondiwa ukusala uyu tukulonda ukumbombela. Belenga Luka 16:13, ukufuma apo muyobesanie amalalusyo agha:
-
Nongwa yafiki tutikulondiwa ukumwiputa Yehova ni kindu ikingi?
-
Ngimba tubaghile ukunangisya bulebule ukuti tusalile ukumwiputa Yehova?
4. Mwinong’oneleghe ulughano ulu Yehova ikubanangisya
Yehova atupele ifyabupe fingi fiyo. Ngimba uswe tubaghile ukumpa ifiki? Ketelela IVIDIYO.
Ngimba Yehova abanangisyemo ulughano mu njila siliku? Belenga Salimo 104:14, 15 na 1 Yohani 4:9, 10, ukufuma apo muyobesanie amalalusyo agha:
-
Ngimba fyabupe filiku ifyakufuma kwa Yehova ifi mukulondiwa ukundaghisya fiyo?
-
Ngimba ifyabupe ifi, fikubapangisya ukuti munketeghe bulebule Yehova?
Linga twambilile ikyabupe iki tukighanile fiyo, tukulondiwa ukunndaghisya umundu uyu atupele. Belenga Ukukumbusya Indaghilo 16:17, ukufuma apo muyobesanie ilalusyo ili:
-
Linga mukwinong’onela fyosa ifi Yehova ababombile, ngimba umwe mukuya pakumpako ifiki umwene?
5. Linga mwiyipile kwa Yehova, umwene ikuya pakubasaya mu njila isyakukindanakindana
Abandu bingi bikusubila ukuti ukumanyiwa, imbombo ya pamwanya pamo indalama fyo ifi fikumpangisya umundu ukuya walusekelo. Ngimba isi syabwanaloli? Ketelela IVIDIYO, ukufuma apo muyobesanie amalalusyo agha.
-
Nalinga ukuti umundu wa mu vidiyo iyi aghughanile umpalano wakukoma ibola, nongwa yafiki ayilekile?
-
Panongwa yakuti aliyipile mwene kwa Yehova komma ku bola, ngimba mukwinong’ona ukuti asalile ikindu ikyakulondiwa fiyo? Nongwa yafiki mukuyoba bo ulu?
Bo untumiwa Pauli akali ukuya Nkristu, umwene abombagha imbombo ya pamwanya fiyo. Umwene amanyisiwe indaghilo sya Bayuda na bamanyisi aba bamanyiwe. Loli umwene afilekile fyosa nu kuya Nkristu. Ngimba Pauli alilumbusisye na isi asalile? Belenga Bafilipi 3:8, ukufuma apo muyobesanie amalalusyo agha:
-
Nongwa yafiki Pauli ayobile ukuti ifindu ifi abombagha bo akali ukuya Nkristu fyali bo “mindu ya kukitundululu”?
-
Ngimba umwene akabile ifiki?
-
Ngimba ukumbombela Yehova tubaghile ukufwanikisya ni mbombo isingi?
Pakabalilo aka Pauli ali Nkristu, akabile ifindu fingi ukukinda ifi afilekile
ABANDU BAMO BIKUYOBA UKUTI: “Sikaya syakupilikiwa ukwiyipa ubumi bwinu bosa kwa Yehova.”
-
Ngimba mukwinong’ona ukuti syamahala ukwiyipa kwa Yehova?
IFUNDO INYWAMU
Ulughano lukututuma ukuti twiyipe kwa Yehova nu kosiwa.
Ukughomokelamo
-
Nongwa yafiki Yehova ikulonda ukuti tunganeghe nindumbula yitu kangi tumwiputeghe mwene?
-
Ngimba Yehova ikubasaya bulebule Abaketi bake aba bosiwe?
-
Ngimba mukulonda ukwiyipa mwibene kwa Yehova?
KETA KANGI IFINGI
Keta inongwa iyi umundu wakwimba aliyipile mwene kwa Yehova.
Keta ifindu ifingi ifi fibaghile ukutupangisya ukuti twiyipe.
“Chifukwa Wuli Mukwenera Kujipatulira kwa Yehova?” (Gongwe la Mulinda, Januwale 15, 2010)
Muvidiyo iya nyimbo iyi, keta ulusekelo lwa bandu aba biyipile kwa Yehova.
Mu nkhani iyakuti “Kwa Vilimika Vinandi Nkhajifumbanga Kuti, ‘Chifukwa Wuli Tili na Umoyo?’” keta isi syalinkasisye unkikulu yumo ukwinong’onela ikindu kyakulondiwa fiyo pa bumi bwake.
“Baibolo Likusintha Umoyo wa Ŵanthu” (Gongwe la Mulinda, Novembala 1, 2012)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
