IKIMANYILO 47
Ngimba Mwitendekisye Ukosiwa?
Mumanyile nyingi fiyo isyakufwana na Yehova bo mukumanyila Ibaibolo. Mubaghile ukuti muchenjile fimo ukuti mukongeghe ifi mumanyile. Loli lumo filipo fimo ifi fikubapangisya ukuti mwipilikeghe ukuti mukitendekesya ukwiyipa nu kosiwa. Nkimanyilo iki tukuya pakuyobesania fimo ifi fibaghile ukuntolesya umundu ukosiwa kangi na muno mubaghile ukufitolela.
1. Ngimba mukulondiwa ukumanya ifindu filiku bo mukali ukosiwa?
Ukuti mosiwe, mukulondiwa “ukubumanya ubwanaloli.” (1 Timoti 2:4) Isi sitikusanusya ukuti mukulondiwa ukumanya ansala wa ilalusyo lililyosa ilya mu Baibolo bo mukali ukosiwa. Abakristu aba bosiwe iyolo fiyo bope bikukindilila ukumanyila. (Bakolosi 1:9, 10) Loli mukulondiwa ukufipilikisya fiyo ifimanyisyo ifya mu Baibolo. Abakulumba abakipanga bikuya pakubatula ukuti mumanye linga mumanyile nyingi.
2. Ngimba findu fiki ifi mukulondiwa ukubomba bo mukali ukosiwa?
Bo mukali ukosiwa, mukulondiwa ‘ukupinduka . . . nu kughomokako.’ (Belenga Imbombo sya Batumiwa 3:19.) Isi sikusanusya ukuti linga kunyuma mwabombilemo ifindu fimo ifibibi mukulondiwa ukunsuma Yehova ukuti abahobokele. Mukulondiwa kangi ukutuleka utuyilo utubibi nu kubomba ifindu ifi fikunhobosya Yehova. Mwakongelelapo, mukulondiwa ukubungana kangi nu kufumusya ni kipanga.
3. Nongwa yafiki mutikulondiwa ukwitikisya ukuti ubogha bubawisye amaka?
Bamo bikutila ukuti bakabaghila ukufwanisya ukubomba isi bafingile kwa Yehova. Syabwanaloli ukuti utubalilo tumo tukutula inongwa. Abakristu abasubiliwa aba bayobiwe mu Baibolo bope batulagha inongwa. Loli Yehova atikuya pakughulila ukuti ababombi bake akabalilo kosa bikubombagha ifindu kisita konangapo. (Belenga Salimo 103:13, 14.) Umwene ikuhoboka fiyo linga tukwiyipa ukubomba isi umwene ikulonda. Umwene ikuya pakubatula. Yehova ikutusimikisyila ukuti kikayapo iki, “kibaghile ukutupaghula ku lughano [lwake].”—Belenga Baroma 8:38, 39.
MANYILA NYINGI
Keta muno mubaghile ukusitolela ingelo silisyosa isi sibaghile ukubatolesya ukosiwa mwakum’manya kanunu Yehova kangi nu kwitikisya ubutuli bwake.
4. Amukindilileghe ukum’manya kanunu Yehova
Ngimba kwakulondiwa ukum’manya kanunu Yehova bo mukali ukosiwa? Mukulondiwa ukum’manya kanunu, ukungana nu kunhobosya. Ketelela IVIDIYO ukuti mukete muno abamanyili ba Baibolo pa kisu kyosa bikubombela. Ukufuma apo muyobesanie ilalusyo ili.
-
Mu vidiyo iyi, ngimba findu fiki fyabatulile abandu bamo ukwitendekesya ukosiwa?
Belenga Baroma 12:2, ukufuma apo muyobesanie amalalusyo agha:
-
Ngimba siliko simo isi mukukayikila ukufwana na isi mukumanyila mu Baibolo pamo mukukayikila linga Abaketi ba Yehova bikubamanyisya ubwanaloli?
-
Linga momuno siyilile, ngimba mubaghile ukubomba isyafiki?
5. Ukumasya indamyo iyi yibaghile ukuntolesya umundu ukosiwa
Linga mwiyipile mwibene kwa Yehova nu kosiwa, pope mubaghile ukwaghana nindamyo. Ukuti mukete ikifwanikisyo, ketelela IVIDIYO, ukufuma apo muyobesanie amalalusyo aghakukongapo agha.
-
Mu vidiyo iyi, ngimba ngelo siliku isi Narangerel alondiwagha ukusitola ukuti ambombele Yehova?
-
Ngimba ulughano lwake mwa Yehova lwalintulile bulebule ukuti asitole ingelo?
Belenga Isya Mbupingamu 29:25 na 2 Timoti 1:7, ukufuma apo muyobesanie ilalusyo ili:
-
Ngimba findu fiki fibaghile ukutupangisya ukuti tuye bakifu ukuti tusitole ingelo?
6. Musubileghe ubutuli bwa Yehova
Yehova ikuya pakubatula ukuti munhobosyeghe. Ketelela IVIDIYO, ukufuma apo muyobesanie amalalusyo agha.
-
Mu vidiyo iyi, nongwa yafiki um’manyili wa Baibolo akabilagha ukosiwa?
-
Ngimba findu fiki ifi amanyile ifi fyalintulile ukuti ansubileghe fiyo Yehova?
Belenga Yesaya 41:10, 13, ukufuma apo muyobesanie ilalusyo ili:
-
Nongwa yafiki mukulondiwa ukuya nu lusubilo ukuti mubaghile ukufwanisya isi mwafingile ukuti mwiyipe?
7. Mundaghisyeghe ulughano lwa Yehova ukufuma pasi pandumbula yinu
Linga mukwinong’onela fiyo muno Yehova abaghanile, mukuya pakundaghisya fiyo kangi mukuya pakulonda ukuti mumbombeleghe kwa bwila na bwila. Belenga Salimo 40:5, ukufuma apo muyobesanie ilalusyo ili:
-
Ngimba lusayo luliku ulwakufuma kwa Yehova ulu mukundaghisya fiyo?
Unsololi Yeremiya alinganile Yehova na masyu ghake, kangi umwene andaghisye fiyo panongwa ya kuya nu lusako ulwakuyikemesya ingamu ya Yehova. Umwene ayobile ukuti: “Bo ngaghile amasyu ghako ndinkulya ukuti findu, ghalinkwipela ukuya bwikyele kumyangu, kangi lusekelo lwa mundumbula yangu; namanga ngubilikiliwa ningamu yako we Yehova wafilundilo.” (Yeremiya 15:16) Amuyobesanie amalalusyo agha:
-
Nongwa yafiki lusako lwapadela ukuya yumo wa Baketi ba Yehova?
-
Ngimba mukulonda ukosiwa ukuti muye yumo wa Baketi ba Yehova?
-
Ngimba filipo fimo ifi fikubatolesya ukubomba isi?
-
Ngimba mukwinong’ona ukuti mubaghile ukubomba bulebule ukuti mukusye ubwighane bwinu bwa kosiwa?
ABANDU BAMO BIKUYOBA UKUTI: “Ngutila ukuti ngabaghila ukubomba kilikyosa iki mbaghile ukufinga linga nguya pakosiwa.”
-
Ngimba momuno numwe mukwipilikila?
IFUNDO INYWAMU
Nu butuli bwa Yehova, mubaghile ukufitola ifi fibaghile ukubatolesya ukuti mosiwe.
Ukughomokelamo
-
Ngimba mukulondiwa ukumanyila ukufika poki ukuti mosiwe?
-
Ngimba findu fiki ifi mukulondiwa ukuchenja bo mukali ukosiwa?
-
Nongwa yafiki mutikulondiwa ukuya bogha?
KETA KANGI IFINGI
Keta fimo ifi mukulondiwa ukubomba ukuti mosiwe.
“Ngimba Mwitendekisye Ukuti Mosiwe?” (Ingasya ya Ndindilili, Malichi 2020)
Keta muno mubaghile ukusitolela ingelo isi sibaghile ukubapangisya ukuti muye bogha.
“Ngimba Findu Fiki Ifi Fikunganisya Ukuti Nosiwe?” (Ingasya ya Ndindilili, Malichi 2019)
Keta muno umundu yumo abombile ukuti afitole ifi fyampangisyagha ukuti aleke ukosiwa.
Pabwandilo Ataa ali mogha ukuti osiwe. Keta ifi fyalimpangisye ukuti osiwe.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
