Abandu aba beghene mwalululu bikwipilika ukuti ulusekelo ulu bikuya nalo pisiku lya bukwati lukuya pakuyako kwa bwila na bwila. Kangi isi sibaghile ukubombiwa naloli. Abandu aba bikele mbweghi kwa kabalilo katali kangi bikwiyipa fiyo ukukonga ifundo sya mu Baibolo baketile ukuti sibaghile ukubombiwa ukuya balusekelo.

1. Ngimba bulongosi buliku ubu Ibaibolo likubapa abanyambala?

Yehova ampele unnnyambala ubudindo ubwakuya mutu wa mbumba. (Belenga Baefesi 5:23.) Yehova ikulonda ukuti umwene asaleghe ifyakubomba ifi fikuya pakuyitula imbumba yosa. Ibaibolo likubapa abanyambala ubulongosi ubwakuti: “Amubaghaneghe abakasi binu.” (Baefesi 5:25) Ngimba isi sikusanusya isyafiki? Undume walughano ikumbombela unkasi wake ifindu mwa kisa pakaya na pakabalilo aka bali na bandu. Ikumfighilila ku findu ifi fibaghile ukumfulasya kangi ikumpasikisya mwakumbili na m’minong’ono. (1 Timoti 5:8) Ikyakulondiwa fiyo, umwene ikuntula unkasi wake ukuti aye pabumanyani ubwa maka na Yehova. (Matai 4:4) Mwakifwanikisyo, abaghile ukwiputa nu kubelenga Ibaibolo nu nkasi wake. Linga unnyambala ikumpwelelela mwalughano unkasi wake, ikukindilila ukuya pabumanyani bwa maka na Yehova.—Belenga 1 Peteri 3:7.

2. Ngimba bulongosi buliku ubu Ibaibolo likumpa unkikulu?

Amasyu gha Kyala ghikuyoba ukuti: “unkikulu yo fikuti iyisyeghe kundume.” (Baefesi 5:33) Ngimba abaghile ukubomba bulebule isi? Abaghile ukwinong’onela utuyilo utununu utwa ndume wake nu kwiyipa kwake pakumpwelelela umwene na banabo. Abaghile ukunangisya kangi ulughindiko pakutulapo pa isi undume wake asalile nu kuyobesania nawe kanunu pamo ukunjobela ifinunu nalinga undume wake akaya nketi.

3. Ngimba aba bali pabweghi babaghile ukukasya bulebule ubweghi bwabo?

Pakuyoba isya aba bali pabweghi Ibaibolo likuti: “Babili bababa bisakuyagha mbili ghumowene.” (Matai 19:5) Isi sikusanusya ukuti abene batikulondiwa ukubomba kilikyosa iki kibaghile ukupangisya ukuti ubweghi bwabo bumalike. Bikubomba isi mwakuya na kabalilo kakwangalila pampene nu kuyobesania mbwanaloli. Abene bikusubila ukuti kikayapo ikindu ikyakulondiwa pa bumi bwabo ukunkinda Yehova pamo umwinabo wa mbweghi. Abene bikuya maso fiyo ukuti baleke ukuya pabumanyani fiyo nu mundu uyu bakaya nawe pabweghi.

 MANYILA NYINGI

4. Abanyambala babaghaneghe nu kubapwelelela abakasi babo

5. Abakikulu babaghaneghe nu kubaghindika abalume babo

Ibaibolo likunkasya unkikulu ukungindika undume wake nalinga ikumbombela Yehova pamo hayi. Belenga 1 Peteri 3:1, 2, kangi muyobesanie amalalusyo agha:

• Linga undume winu atikumwiputa Yehova, kisita kukayika mukulonda ukuti yope ande ukumbombela Yehova. Ngimba mukwinong’ona ukuti findu fiki fibaghile ukuntula pakati pa kumfumukisya amasyu amanunu, pamo ukunnangisya utuyilo utununu nu kungindika? Nongwa yafiki mukuyoba bo ulu?

Unnyambala nu nkasi wake babaghile ukusala kanunu ifindu pampene. Loli utubalilo tumo unkasi abaghile ukuya na minong’ono aghakukindana nu ndume wake. Polelo abaghile ukuyoba  aminong’ono ghake mwalughindiko, loli ikulondiwa ukumanya ukuti Yehova ampele undume wake ubudindo bwakusala isi sibaghile ukuyitula imbumba. Umwene ikulondiwa ukubomba kilikyosa ukuti atulepo pa isi undume wake asalile ukubomba. Mwakubomba isi, unkasi abaghile ukutwala ulusekelo pakaya. Belenga 1 Peteri 3:3-5, kangi muyobesanie ilalusyo ili:

• Ngimba Yehova ikwipilika bulebule linga unkikulu ikunangisya ulughindiko ku ndume wake?

6. Ngimba mubaghile ukusitola indamyo mbweghi bwinu?

 IFUNDO INYWAMU

Undume nu nkasi babaghile ukuya balusekelo linga bikughanana, bikughindikana kangi linga bikukonga ifundo isya mu Baibolo.

Ukughomokelamo

• Ngimba unnyambala abaghile ukubomba isyafiki ukuti imbumba yake yiyeghe ya lusekelo?

• Ngimba unkikulu abaghile ukubomba isyafiki ukuti imbumba yake yiyeghe ya lusekelo?

• Linga muli mbweghi, ngimba fundo yiliku iya mu Baibolo iyi yibaghile ukubatula ukuti mukasye ubweghi bwinu?