IKIMANYILO 50
Ngimba Imbumba Yinu Yibaghile Ukuya Bulebule Yalusekelo?—Ikighaba Ikyabubili
Abana kyabupe ikyakufuma kwa Yehova. Umwene ikulonda ukuti abapapi bapasikisyeghe ikyabupe iki. Yehova ikubapa abapapi ubulongosi bwa mahala ubwa muno babaghile ukubombela isi. Ubulongosi bwake bubaghile ukubatula kangi abandu ukuti bope batulepo pakupangisya imbumba ukuya yalusekelo.
1. Ngimba bulongosi buliku ubu Yehova ikubapa abapapi?
Yehova ikulonda ukuti abapapi babaghaneghe abanabo nu kuya na kabalilo kakwangala nabo. Umwene ikulonda kangi ukuti abapapi babafighilileghe abanabo ku findu ifi fibaghile ukubafulasya nu kubombela ifundo sya mu Baibolo pakubamanyisya. (Isya Mbupingamu 1:8) Yehova ikubabula abatata ukuti: “Mubakusyeghe [abaninu] munjila . . . ya Yehova.” (Belenga Baefesi 6:4.) Yehova ikuhoboka linga abapapi bikukonga ubulongosi bwake pakubalela abana kangi abene batikubapa abangi ubudindo bwakulela abanabo.
2. Ngimba bulongosi buliku ubu Yehova ikubapa abana?
Yehova ikubabula abana ukuti: “Amubitikeghe abapapi binu.” (Belenga Bakolosi 3:20.) Linga abana bikubaghindika nu kubapilikila abapapi babo, bikumpangisya Yehova na bapapi babo ukuya balusekelo. (Isya Mbupingamu 23:22-25) Yesu abikile ikifwanikisyo ikinunu apa ali mwana. Nalinga ukuti ali ngolofu, umwene abapilikilagha nu kubaghindika abapapi bake.—Luka 2:51, 52.
3. Ngimba mubaghile ukukasya bulebule ubumanyani pambumba yinu?
Linga muli mpapi, kisita kukayika mukulonda ukuti abaninu banganeghe fiyo Yehova bo muno mukubombela. Ngimba mubaghile ukubomba bulebule isi? Mwakubomba isi Ibaibolo likuyoba ukuti: “Mukabamanyisyeghe [amasyu gha Yehova] abaninu apa linga muli nnyumba syinu, napa linga muli kubutali, apa linga mukulambalala napa linga mukusumuka.” (Ukukumbusya Indaghilo 6:7) Amasyu aghakuti “mukabamanyisyeghe” ghikusanusya ukubamanyisya mwakwandisania ikindu kimo. Tusimenye ukuti tukulondiwa ukummanyisya mwakwandisania umwanitu ukuti akumbukeghe. Ilemba ili likusanusya ukuti muyeghe na kabalilo akakuyobesania na baninu isya Yehova akabalilo kosa. Syakulondiwa fiyo ukuti kamokene pa sabata muyeghe nakabalilo kakumanyila kwa pambumba. Linga mukaya na bana, mubaghile ukusayiwa fiyo linga mukuya nakabalilo akakumanyila Amasyu gha Kyala sabata aliwesa.
MANYILA NYINGI
Keta ifundo sya mu Baibolo isi sibaghile ukuyitula imbumba yinu ukuti yiyeghe yalusekelo.
4. Mubamanyisyeghe abaninu ndughano
Kubaghile ukuya kwakutamya ukubamanyisya abaninu. Ngimba Ibaibolo libaghile ukubatula bulebule? Belenga Yakobu 1:19, 20, kangi mwamule amalalusyo agha:
-
Ngimba abapapi babaghile ukunangisya bulebule ulughano bo bikuyobesania na banabo?
-
Nongwa yafiki umpapi atikulondiwa ukumfunda umwanake bo akalele? a
5. Mubafighilileghe abaninu
Kwakulondiwa fiyo ukubafighilila abaninu kangi mukulondiwa ukuyobesania nabo inkhani isyakufwana nu kughonana. Isi sibaghile ukuya syakutamya. Ketelela IVIDIYO, kangi muyobesanie amalalusyo agha.
-
Nongwa yafiki kwakutamya ku bapapi bamo ukuyobesania na banabo inkhani syakufwana nu kughonana?
-
Ngimba mo munjila yiliku iyi abapapi bamo bikubalingania abanabo inkhani iyakufwana nu kughonana?
Ukufwana na mabusololi, ikisu kya Setano kifikile pabubibi fiyo lino. Belenga 2 Timoti 3:1, 13, kangi muyobesanie ilalusyo ili:
-
Abandu bamo ababibi bikuyobiwa mu vesi 13 kangi bikubakolelela abana. Polelo, nongwa yafiki kwakulondiwa fiyo ukuti abapapi babamanyisyeghe abanabo isyakufwana nu kughonana kangi na muno babaghile ukwifighilila ku bandu aba babaghile ukubabombela ifya nkhaza mwakubakolelela?
Ngimba musimenye?
Abaketi ba Yehova bikupanga amabuku mingi agha ghabaghile ukubatula abapapi ukubamanyisya abanabo isyakufwana nu kughonana kangi nu kubafighilila ku findu ifyankhaza. Mwakifwanikisyo, keta:
6. Amubaghindikeghe abapapi binu
Abana, abalumyana na balindwana babaghile ukunangisya ulughindiko ku bapapi babo ukufwana na muno bikuyobesania nabo. Ketelela IVIDIYO, kangi muyobesanie amalalusyo agha.
-
Nongwa yafiki kwakulondiwa fiyo ukuti umwana ayobesanieghe nu mpapi wake mwalughindiko?
-
Ngimba umwana abaghile ukuyobesania bulebule na bapapi munjila iyi yikunangisya ulughindiko?
Belenga Isya Mbupingamu 1:8, kangi muyobesanie ilalusyo ili:
-
Ngimba umwana ikulondiwa ukubomba isyafiki linga umpapi wake ikumpa ubulongosi?
7. Mumwiputeghe Yehova pambumba yinu
Imbumba sya Baketi ba Yehova sikuya ni siku limolyene pa sabata ili bikumanyila pampene pambumba yabo. Ngimba ukumanyila kwa pambumba kukubombiwa bulebule? Ketelela IVIDIYO, kangi muyobesanie amalalusyo agha.
-
Ngimba imbumba yibaghile ukupanga bulebule imbatiko ukuti bapangeghe ukumanyila kwa pambumba sabata aliwesa?
-
Ngimba imbumba yibaghile ukubomba isyafiki ukuti ukumanyila kwa pambumba kuyeghe kwakutula kangi kwakuhobosya?—Keta ifithuzi ifi fili kubwandilo bwa kimanyilo iki.
-
Ngimba findu fiki fibaghile ukupangisya ukuti kuye kwakutamya ukumanyilila pampene?
Nkabalilo ka Baisraeli, Yehova alondagha ukuti imbumba siyobesanieghe Amalemba akabalilo kosa. Belenga Ukukumbusya Indaghilo 6:6, 7, kangi muyobesanie ilalusyo ili:
-
Ngimba mubaghile ukuyibombela bulebule ifundo iyi?
Ifundo syakutula pakumanyila kwa pambumba:
-
Mwitendekesyeghe ingomano sya kipanga.
-
Mubelengeghe nu kuyobesania inkhani ya mu Baibolo iyi imbumba yinu yibaghile ukuhoboka nayo.
-
Linga muli nu mwana unnandi, panga dawunilodi pamo pulinta ifi abana bikubomba ifi fikwaghiwa pa jw.org.
-
Linga muli na bana abanyambala na balindwana, muyobesanie inkhani iyakufwana na balumyana na balindwana iyi yikwaghiwa pa jw.org.
-
Mufwanikisyeghe ukuti umwe na baninu mwalimo mfyakubombiwa fya mu Baibolo.
-
Ketelela nu kuyobesania ividiyo pa jw.org.
ABANDU BAMO BIKUYOBA UKUTI: “Ibaibolo lyakutamya fiyo kangi umwana akabaghila ukulipilikisya.”
-
Ngimba mubaghile ukwamula bulebule?
IFUNDO INYWAMU
Yehova ikulonda ukuti abapapi babaghaneghe, babamanyisyeghe kangi babafighilileghe abanabo; ikulonda kangi ukuti abana babaghindikeghe kangi babapilikileghe abapapi babo, umwene ikulonda ukuti biputileghe pampene.
Ukughomokelamo
-
Ngimba abapapi babaghile ukubamanyisya nu kubafighilila bulebule abanabo?
-
Ngimba abana babaghile ukunangisya bulebule ulughindiko ku bapapi babo?
-
Ngimba syakulondiwa bulebule ukuti imbumba yiyeghe na kabalilo sabata aliwesa akakumanyilila pampene?
KETA KANGI IFINGI
Ngimba fimanyilo filiku ifi mubaghile ukwitendekesya ukuti mum’manyisye umwaninu wakilumyana?
“Vinthu 6 Ivyo Ŵana Ŵakwenera Kusambira” (Wukani! Na. 2, 2019)
Manyila ubulongosi ubu Ibaibolo likubapa aba bikupwelelela abakangale.
Keta muno unnyambala yumo uyu akamanyagha ukubapwelelela abana ayilile tata unnunu.
Keta muno tata abaghile ukukasyila ubumanyani bwake nu mwanake undumyana.
a Mu Baibolo ulufundo lukusanusya ukumanyisya, ukundongosya nu kuntula umwana ukuchenja utuyilo utubibi. Sitikusanusya ukunkalalila pamo ukumbombela inkhaza.—Isya Mbupingamu 4:1.
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
