Bo Kyala atupelile, umwene atupele ikyabupe ikinunu fiyo ikyakuyoba. Ngimba sikumpalamasya umwene ukufwana na muno tukubombesyela ikyabupe iki? Ena sikumpalamasya. (Belenga Yakobu 1:26.) Ngimba tubaghile ukubombela bulebule uluso lwa kuyoba mu njila iyi yikunhobosya Yehova?

1. Ngimba tubaghile ukubombela bulebule ikyabupe ikyakuyoba?

Ibaibolo likutubula ukuti “amusubisanieghe kangi muyenganeghe mwe babo batupu.” (1 Batesalonike 5:11) Ngimba mukuketa ukuti balipo bamo aba bikulondiwa ukukasiwa? Ngimba mubaghile ukubomba isyafiki ukuti bipilikeghe kanunu? Mukulondiwa ukubasimikisyila ukuti mukubapasikisya. Mubaghile ukubabula isi bikubomba kanunu. Ngimba ilemba liliku ili mukwinong’ona ukuti libaghile ukunkasya umundu yumo uyu mum’menye? Ghalipo amalemba mingi agha mubaghile ukusala. Mukulondiwa ukukumbuka ukuti, muno tukuyobela sibaghile ukubapalamasya fiyo abandu ukukinda amasyu agha tukuyoba. Yonongwa yake akabalilo kosa tukulondiwa ukuyoba mwakisa kangi mbololo.​—Isya Mbupingamu 15:1.

2. Ngimba masyu ghaliku agha tukulondiwa ukwepuka?

Ibaibolo likuyoba ukuti: “Ilisyu lyosa ilibibi lyo lingasokagha nkanwa mmyinu.” (Belenga Baefesi 4:29.) Isi sikusanusya ukuti tutikulondiwa ukubombela amasyu amabibi pamo ukuyoba amasyu agha ghakaya gha kisa pamo aghamatingo agha ghabaghile ukunkalalisya umundu. Tukulondiwa ukuleka ukubayobela abandu ifindu ifibibi ifi fibaghile ukonanga akayilo kabo.​—Belenga Isya Mbupingamu 16:28.

3. Ngimba findu fiki ifi fibaghile ukututula ukuti tuyobeghe amasyu aghakukasya?

Ifindu ifi tukuyoba na bangi, fikunangisya muno tukwipilikila kangi muno tukwinong’onela. (Luka 6:45) Polelo tukulondiwa ukwimanyisya twibene ukuti twinong’oneleghe ifindu ifigholofu, ifyelu kangi ifinunu pakufiketa. (Bafilipi 4:8) Ukuti tufwanisye ukubomba isi, tukulondiwa ukusala kanunu ifyakusangalusya kangi na bamanyani. (Isya Mbupingamu 13:20) Ifingi ifi fibaghile ukututula ko kuya na kabalilo akakwinong’onela bo tukali ukuyoba. Mwinong’oneleghe muno abangi babaghile ukwipilikila ukufwana na isi mukuyoba. Ibaibolo likuyoba ukuti: “Amasyu gha mundu unkonyofu gho ghikulasa bo lu lubo, loli isi lukuyoba ululimi lwa mahala siliti nkota ughu ghukughangula.”​—Isya Mbupingamu 12:18.

 MANYILA NYINGI

4. Mwikoleghe na isi mukuyoba

Utubalilo tumo, twesa tukuyoba ifindu ifi pabumalilo tukwanda ukwiyipa inongwa. (Yakobu 3:2) Belenga Bagalatia 5:22, 23, ukufuma apo muyobesanie amalalusyo agha:

• Ngimba tuyilo tuliku utu mukulondiwa ukusuma ubutuli kwa Kyala ukuti abatule ukwikola pa isi mukuyoba? Ngimba utuyilo utu tubaghile ukubatula bulebule?

Belenga 1 Bakorinti 15:33, ukufuma apo muyobesanie ilalusyo ili:

• Ngimba abamanyani ni fyakusangalusya ifi mukusala, fibaghile ukubapalamasya bulebule pa isi mukuyoba?

Belenga Undumbilili 3:1, 7, ukufuma muyobesanie ilalusyo ili:

• Ngimba kabalilo kaliku aka tukulondiwa ukuya myee pamo ukughulila akabalilo akanunu akakuyobela?

 5. Tuyobeghe ifindu ifinunu ku bangi

6. Muyeghe bakisa linga mukuyoba na ba mumbumba yinu

 IFUNDO INYWAMU

Amasyu ghali na maka. Tukulondiwa ukwinong’onela fiyo ukufwana na isi tukuyoba, akabalilo aka tukuyobela kangi na muno tukuyobela.

Ukughomokelamo

• Ngimba njila siliku isi mubaghile ukubombela ukuti mubatule abangi?

• Ngimba kayobelo kaliku aka mukulondiwa ukwepuka?

• Ngimba findu fiki ifi fibaghile ukututula ukuti akabalilo kosa tuyobeghe amasyu aghakisa kangi aghakuyenga