Twesa twighanile ukusala imyenda iyi tukufwala kangi na muno tukubonekela. Linga tukukonga ubulongosi ubwa mu Baibolo, tubaghile ukusala ifyakufwala ifi fikunhobosya Yehova. Isagha tukete bumo mwa bulongosi ubu.

1. Ngimba bulongosi buliku ubu bubaghile ukututula muno tubaghile ukufwalila nu kwimoghekesya?

Tukulondiwa ukusala ‘imyenda iyi yibaghile, tubonekeghe ukuya nisoni nu lwiyisyo,’ kangi akabalilo kosa tubonekeghe belu ukuti tunangisyeghe ukuti tuli “bakuntila Kyala.” (1 Timoti 2:9, 10) Keta ubulongosi 4 ubu: (1) Imyenda yitu yiyeghe ‘iyi yitubaghile.’ Linga mubukilemo ku ngomano sya kipanga, ababombi ba Yehova bali ni findu ifi bafighanile, loli imyenda iyi bikufwala na muno bikwimoghesyeghela bikunangisya ukuti bikungindika Kyala uyu bikumwiputa. (2) “Tubonekeghe ukuya balwiyisyo” mwakuleka ukufwala imyenda iyi yibaghile ukubapangisya abangi ukuti bayeghe na minong’ono amabibi pamo ukutuswigha fiyo. (3) Tunangisyeghe ukuti tuli “nisoni” mwakuleka ukwendela pampene na masitayelo gha myenda agha ghikusoka akabalilo kosa. (4) Akabalilo kosa tubonekeghe belu ukuti tunangisyeghe ukuti tuli “bakuntila Kyala,” ukuti kuyeghe kupepe ku bandu ukuketa ukuti tukumwiputa Kyala wa bwanaloli.​—1 Bakorinti 10:31.

2. Nongwa yafiki tukulondiwa ukubinong’onela abakamu na balumbu linga tukusala ifyakufwala?

Nalinga ukuti tuli nu bwabuke ubwakusala imyenda iyi tukulonda ukufwala, loli muno tukufwalila tukulondiwa ukubinong’onela abangi. Tukulondiwa ukughelaghela ukuleka ukubakalalisya abangi. Loli m’malo mwake tukulondiwa “ukubakyela abinitu ukuti babwaghe ubununu ko kuti bayengiweghe.”​—Belenga Baroma 15:1, 2.

3. Ngimba muno tukufwalila tubaghile ukubapangisya bulebule abangi ukulonda ukumanyila isya Yehova?

Akabalilo kosa tukulondiwa ukufwala imyenda mu njila iyalughindiko fiyofiyo linga tukubuka ku ngomano sya kipanga kangi na mubufumusi. Tutikulonda ukubapangisya abandu ukuti baleke ukupilika amasyu amanunu panongwa ya muno tukubonekela. M’malo mwake, tukulondiwa ukuti tubonekeghe kanunu ukuti abandu balondeghe ukumanya isyakufwana na Kyala kangi ukuti “balunoghesyeghe ulumanyisyo lwa Mpoki witu.”​—Titi 2:10.

 MANYILA NYINGI

4. Linga tukuboneka kanunu tukungindika Yehova

Ngimba inongwa inywamu iyi tukulondiwa ukuboneka kanunu yo yiliku? Belenga Salimo 47:2, ukufuma apo muyobesanie amalalusyo agha:

• Ngimba kyakusala kiliku iki tukulondiwa ukusala pa nkhani ya myenda bo tukukumbukila ukuti isi sibaghile ukupalamasya muno abandu bikunketela Yehova?

• Ngimba mukwinong’ona ukuti kwakulondiwa ukuketa muno tukubonekela linga tukubuka kungomano na mubufumusi? Nongwa yafiki mukuyoba bo ulu?

 5. Nongwa yafiki tukulondiwa ukusala kanunu pa nkhani ya kufwala nu kwimoghesya?

Ketelela IVIDIYO.

Kali imyenda yitu yapamwanya pamo hayi, tukulondiwa ukuyisuka ukuti yibonekeghe kanunu. Belenga 1 Bakorinti 10:24 kangi 1 Timoti 2:9, 10. Ukufuma apo, muyobesanie inongwa iyi tutikulondiwa ukufwala imyenda iyi . . .

• yifitile pamo iyi yikaya minunu

• yikukola umbili, yikulangala na iyi yibaghile ukubapangisya abangi ukuya na minong’ono amabibi.

Nalinga ukuti Abakristu bakaya pasi pa ndaghilo isi Kyala abapele Abaisraeli ukwendela mwa Mose, loli abene babaghile ukumanyilako nyingi isyakufwana na muno Yehova ikwinong’onela pankhani iyi. Belenga Ukukumbusya Indaghilo 22:5, ukufuma apo muyobesanie ilalusyo ili:

• Nongwa yafiki tutikulondiwa ukufwala pamo ukwimoghesya uku kubaghile ukubapangisya abanyambala ukuboneka bakikulu na bakikulu ukuboneka banyambala?

Belenga 1 Bakorinti 10:32, 33, na 1 Yohani 2:15, 16, ukufuma apo muyobesanie amalalusyo agha:

• Nongwa yafiki tukulondiwa ukuya maso ukufwana na muno tukubonekela ukuti tuleke ukubakalalisya abandu kuno tukwikala na nkipanga?

• Ngimba masitayelo ghaliku gha myenda pamo ukwimoghesya uku abandu bakughanile fiyo kuno mukwikala?

• Ngimba mukwinong’ona ukuti amasitayelo ghamo ghakaya ghakulondiwa ku Bakristu? Nongwa yafiki mukuyoba bo ulu?

 IFUNDO INYWAMU

Linga tukusala kanunu ukufwana na muno tukubonekela, tukunangisya ukuti tukungindika Yehova na bangi.

Ukughomokelamo

• Nongwa yafiki imyenda iyi tukufwala na muno tukwimoghesya kwakulondiwa kwa Yehova?

• Ngimba bulongosi buliku ubu bubaghile ukututula pa nkhani ya muno tukubonekela?

• Ngimba ukufwana na muno tukubonekela kukubapalamasya bulebule abangi pa nkhani ya kwiputa kwa bwanaloli?