IKIMANYILO 53
Musaleghe Ifyakusangalusya ifi Fikunhobosya Yehova
Yehova yo ‘Kyala walusekelo.’ (1 Timoti 1:11) Umwene ikulonda ukuti tuyeghe balusekelo kangi tuhobokeghe nu bumi. Umwene ikuhoboka fiyo linga tukuya nakabalilo akakutusya pa mbombo isi tukubomba ukuti tuhobokepo. Nkimanyilo iki, tukuya pakuketa muno tubaghile ukubombela utubalilo tumo ukuti tusangalukepo pa findu ifi fikunhobosya Yehova.
1. Ngimba tukulondiwa ukukumbuka isyafiki linga tukusala ifyakusangalusya?
Ngimba mwighanile ukubomba isyafiki linga mukutusya? Bamo bighanile ukubombela akabalilo aka mwakubelenga amabuku, ukupilikisya inyimbo, ukuketelela amavidiyo pamo ukwangala pa intaneti. Bamo bikuhoboka ukubuka ukwakukwela ifyamba, ukoghela pamo ukukoma amagemu na bamanyani babo. Filifyosa ifi tubaghile ukusala ukubomba, tukulondiwa ukuketesya ukuti ‘fikunkyela Kyala.’ (Baefesi 5:10) Kwakulondiwa fiyo ukupilikisya isi panongwa yakuti abandu bingi amasiku agha bighanile ukuketelela, ukupilikiysa pamo ukubomba ifindu ifi Kyala afibengile bo ifya bwite, ifya bulowe pamo ifi fikukolelana nimbepo inyali. (Belenga Salimo 11:5.) Ngimba findu fiki fikuya pakututula ukuti tusaleghe mwamahala ifyakusangalusya?
Linga tukusala abamanyani aba banganile Yehova, abene babaghile ukututula ukuti tusaleghe kanunu ifyakusangalusya. Bo muno twaketile nkimanyilo iki kikindile, ‘uyu ikwenda nu mundu uwa mahala ikuya wamahala.’ M’masyu aghangi, linga akabalilo kosa tukwangala na bandu aba bakasighana ifundo sya Kyala tukuya, “pakusofanisiwa.”—Isya Mbupingamu 13:20.
2. Nongwa yafiki tukulondiwa ukuya maso na kabalilo aka tukumalila pa fyakusangalusya?
Nalinga ukuti ifyakusangalusya ifi tukusala fikabaghila ukunkalalisya Yehova, loli pope tukulondiwa ukuya maso na kabalilo aka tukumalila. Panongwa yakuti linga tukaya maso, tukabaghila ukuya na kabalilo akakubombela ifindu ifyakulondiwa fiyo. Ibaibolo likutukasya ukuti tubombeleghe “kanunu akabalilo [kitu].”—Belenga Baefesi 5:15, 16.
MANYILA NYINGI
Keta muno mubaghile ukusalila kanunu ifyakusangalusya.
3. Tukulondiwa ukwepuka ku fyakusangalusya ifibibi
Nongwa yafiki tukulondiwa ukusala ifyakusangalusya mwamahala? Ketelela IVIDIYO, ukufuma apo muyobesanie amalalusyo aghakukongapo agha.
-
Nongwa yafiki ifyakusangalusya ifya nkabalilo ka Baroma fifwene itolo nifyakusangalusya ifi abandu bikupanga amasiku agha?
-
Ukufwana ni vidiyo iyi, ngimba Danny amanyile isyafiki pankhani ya fyakusangalusya?
Belenga Baroma 12:9, ukufuma apo muyobesanie ilalusyo ili:
-
Ngimba ilemba ili libaghile ukubatula bulebule ukusala kanunu ifyakusangalusya?
Ngimba findu fiki fimo ifi Yehova afibengile? Belenga Isya Mbupingamu 6:16, 17 na Bagalatia 5:19-21. Linga mubelengile ilemba lililyosa muyobesanie ilalusyo ili:
-
Ngimba findu filiku ifi fiyobiwe mu mavesi agha ifi fikwaghiwa fiyo mufyakusangalusya amasiku agha?
Muno mubaghile ukusalila ifyakusangalusya mwamahala
Mwilalusyeghe ukuti:
-
Findu fiki? Ngimba mfyakusangalusya ifi, filimo fimo ifi Yehova afibengile?
-
Akabalilo kaliku? Ngimba fikum’malila akabalilo akakubombela ifindu ifyakulondiwa?
-
Na banani? Ngimba fikuya pakumbangisya ukuya pabupipi na bandu aba batikumbombela Yehova?
Tukufighililiwa linga twikele kubutali ni findu ifi fibaghile ukutufulasya. Yonongwa yake nuswe tukulondiwa ukuya kubutali ni fyakusangalusya ifi fibaghile ukutufulasya.
4. Mubombeleghe akabalilo mwamahala
Ketelela IVIDIYO, ukufuma apo muyobesanie ilalusyo ili.
-
Nalinga ukuti unkamu uwa muvidiyo iyi akaketelelangamo ifindu ifibibi, loli ngimba alisile ukuya nindamyo yiliku?
Belenga Bafilipi 1:10, ukufuma apo muyobesanie ilalusyo ili:
-
Ngimba ivesi ili libaghile ukututula bulebule ukwinong’onela akabalilo aka tukumalila pa fyakusangalusya?
5. Musaleghe ifyakusangalusya ifinunu
Nalinga ukuti ifyakusangalusya fimo fitikunhobosya Yehova, loli filipo ifyakusangalusya ifi tubaghile ukubomba. Belenga Undumbilili 8:15 na Bafilipi 4:8, ukufuma apo muyobesanie ilalusyo ili:
-
Ngimba fyakusangalusya filiku ifi mufighanile?
Yehova ikulonda ukuti tuyeghe na kabalilo akakusangalukila
ABANDU BAMO BIKUYOBA UKUTI: “Yikayapo indamyo nayimo ukubomba ifyakusangalusya ifi fikukasya ubwite, ubulowe, pamo ifya mbepo inyali linga une ndikubombako.”
-
Ngimba mubaghile ukuyoba isyafiki?
IFUNDO INYWAMU
Yehova ikulonda ukuti tusaleghe ifyakusangalusya ifinunu.
Ukughomokelamo
-
Ngimba fyakusangalusya filiku ifi Abakristu bikulondiwa ukwepuka?
-
Nongwa yafiki tukulondiwa ukuya maso na kabalilo aka tukumalila pa fyakusangalusya?
-
Nongwa yafiki tukulondiwa ukusala ifyakusangalusya ifi fikunhobosya Yehova?
KETA KANGI IFINGI
Keta uyu ali nu budindo ubwakutusalila ifyakusangalusya fitu.
“Ngimba Abaketi ba Yehova Bikukanisya Amavidiyo, Amabuku ni Nyimbo Simo?” (Inkhani ya pa webusayiti)
Keta muno mubaghile ukusalila ifyakusangalusya ifya mahala ifyakufwana ninyangalo.
“Kasi Vyakusanguluska Vinu Ni Vyacandulo?” (Gongwe la Mulinda, Okutobala 15, 2011)
Mu nkhani iyakuti “Ndinasiya Ngakhale Kudana ndi Azungu,” keta muno unnyambala yumo achenjile ifyakusala fyake pa nkhani ya fyakusangalusya.
“Baibolo Likusintha Umoyo wa Ŵanthu” (Gongwe la Mulinda, Febuluwale 1, 2010)
Keta muno mama yumo abombile mwamahala pa nkhani iyakusala ifyakusangalusya ifi fyakasyagha imbepo inyali kuno ikalagha.
Mwepukeghe Kufyakusangalusya ifi Fikukasya Imbepo Inyali (2:02)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
