IKIMANYILO 59
Mubaghile Ukwifimbilisya Linga Mukufwimiwa
Mwalululu pamo kunkyeni, Abakristu bikuya pakufwimiwa nu kususiwa. Ngimba isi sikuya pakutupangisya ukuti tupasyeghe?
1. Nongwa yafiki tukughulila ukufwimiwa?
Ibaibolo lyayobile ngani ukuti: “Bosa aba bikulonda ukuya nu bumi bwakuntila Kyala mwa Kristu Yesu, bisakufwimiwagha.” (2 Timoti 3:12) Yesu afwimiwagha panongwa yakuti akali ku kighaba kya kisu ikya Setano. Nuswe tukaya ku kighaba kya kisu ikya Setano, yonongwa yake tutikulondiwa ukuswigha linga tukufwimiwa na balaghili ba nkisu pamo abamatchalichi.—Yohani 15:18, 19.
2. Ngimba tubaghile ukwitendekesya bulebule ukufwimiwa?
Lino ko kabalilo akakuti tukasyeghe ubusubiliwa bwitu mwa Yehova. Akabalilo kosa twiputeghe kumyake kangi tubelengeghe Amasyu ghake Ibaibolo. Akabalilo kosa twaghiwengepo pangomano sya kipanga. Isi syo isi sikuya pakutupa amaka aghakwifimbilisya nalinga tukufwimiwa nu kunyoziwa na ba mumbumba yitu. Untumiwa Pauli, uyu yope afwimiwagha, alembile ukuti: “Yehova yo ntuli wangu, ndisakutilagha nasimo.”—Bahiburi 13:6.
Linga tukufumusya akabalilo kosa, sikutupangisya ukuti tuyeghe bakifu, tunsubileghe Yehova nu kuleka ukubatila abandu. (Isya Mbupingamu 29:25) Linga akabalilo kosa mukufumusya, mukuya pakwitendekesya ukwisakufumusya nalinga iboma likanisye imbombo yitu.—1 Batesalonike 2:2.
3. Ngimba tukusayiwa bulebule linga tukwifimbilisya ukufwimiwa?
Nalinga ukuti tutikuhoboka linga tukufwimiwa, loli linga tukwifimbilisya, ulwitiko lwitu lukuya lwamaka. Tukuya pabumanyani bwamaka na Yehova panongwa yakuti ikututula linga tukaya na maka. (Belenga Yakobu 1:2-4.) Sikumbaba fiyo Yehova linga ikutuketa ukuti tukutamiwa kangi ikuhoboka fiyo linga ikutuketa ukuti tukwifimbilisya. Ibaibolo likuyoba ukuti: “Linga mukukiba bo mukukubilwa panongwa ya kubomba inunu, syo nunu itolo nkyeni mwa Kyala.” (1 Peteri 2:20) Linga tukukindilila ukuya basubiliwa, Yehova ikuya pakutupa ubumi bwa bwila na bwila nkisu ikipya. Kangi bosa aba bisakwikala nkisu iki, bisakumbombelagha Yehova kisita ukususiwa.—Matai 24:13.
MANYILA NYINGI
Keta inongwa iyi tukulondiwa ukuya basubiliwa kwa Yehova nalinga ukuti abandu bikutufwima kangi na muno umwene ikuya pakutusayila.
4. Mubaghile ukwifimbilisya nalinga mukususiwa na ba mumbumba yinu
Yesu amenye kanunu ukuti aba mumbumba bamo bakabaghila ukulonda ukuti tumbombeleghe Yehova. Belenga Matai 10:34-36, ukufuma apo muyobesanie ilalusyo ili:
-
Ngimba findu fiki fikubombiwa linga yumo mu mbumba asalile ukumbombela Yehova?
Ukuti mukete ikifwanikisyo, ketelela IVIDIYO, ukufuma apo muyobesanie ilalusyo ili
-
Ngimba mubaghile ukubomba isyafiki linga abakamu pamo abamanyani binu bikughela ukubakanisya ukumbombela Yehova?
Belenga Salimo 27:10 na Marko 10:29, 30. Linga mubelengile ilemba lililyosa muyobesanie ilalusyo ili:
-
Ngimba ulufingo ulu lubaghile ukubatula bulebule linga mukususiwa na ba mumbumba pamo abamanyani binu?
5. Amukindilileghe ukumwiputa Yehova nalinga mukufwimiwa
Tukulondiwa ukuya bakifu linga abandu bamo bikutukanisya ukumbombela Yehova. Ketelela IVIDIYO, ukufuma apo muyobesanie ilalusyo ili.
-
Ngimba ififwanikisyo ifya mu Baibolo ifi, fikubakasya bulebule?
Belenga Imbombo sya Batumiwa 5:27-29 na Bahiburi 10:24, 25. Linga mubelengile ilemba lililyosa, muyobesanie ilalusyo ili:
-
Nongwa yafiki kwakulondiwa ukukindilila ukumwiputa Yehova nalinga ukuti imbombo pamo ingomano syitu sikanisiwe?
6. Yehova ikuya pakututula ukuti twifimbilisyeghe
Abaketi ba Yehova abakukindanakindana, bikukindilila ukumbombela Yehova mbusubiliwa nalinga ukuti bikufwimiwa. Ukuti tukete isi sikubatula, ketelela IVIDIYO. Ukufuma apo muyobesanie ililalusyo ili.
-
Ukufwana ni vidiyo iyi, ngimba findu fiki fyabatulile Abaketi aba ukwifimbilisya?
Belenga Baroma 8:35, 37-39 na Bafilipi 4:13. Linga mubelengile ilemba lililyosa, muyobesanie ilalusyo ili:
-
Ngimba ilemba ili, likubasimikisyila ukuti mubaghile ukwifimbilisya ingelo yiliyosa?
Belenga Matai 5:10-12, ukufuma apo muyobesanie ilalusyo ili:
-
Nongwa yafiki mubaghile ukuya balusekelo nalinga mukususiwa?
Abaketi ba Yehova bingi bikukindilila ukumbombela umwene mbusubiliwa nalinga ukuti bikususiwa. Numwe mubaghile ukumbombela.
ABANDU BAMO BIKUYOBA UKUTI: “Ngabaghila ukwifimbilisya ku ngelo.”
-
Ngimba malemba ghaliku agha mubaghile ukubabelengela?
IFUNDO INYWAMU
Yehova ikuya pakutusaya panongwa ya kughelaghela kwitu ukumbombela umwene nalinga tukufwimiwa. Nubutuli bwake tubaghile ukwifimbilisya.
Ukughomokelamo
-
Nongwa yafiki Abakristu bikughulila ukuti bikuya pakufwimiwa?
-
Ngimba mubaghile ukubomba isyafiki lino ukuti mwitendekesyeghe ukufwimiwa?
-
Ngimba findu fiki ifi fibaghile ukututula ukuti tuyeghe nu lusubilo ulwakuti tubaghile ukumbombela Yehova nalinga tukugheliwa?
KETA KANGI IKINGI
Keta isi undumyana yumo ikulingania muno Yehova alintulile ukwifimbilisya pakabalilo aka ali mu jele panongwa yakuleka ukuya ku kighaba kya kisu.
Keta isi syayitulile imbumba yimo ukumbombela Yehova mbusubiliwa kwa fyinja fingi nalinga basusiwagha.
Keta muno mubaghile ukuyila bakifu linga mukufwimiwa.
“Mwitendekesyeghe Ukufwimiwa” (Ingasya ya Ndindilili, Julayi 2019)
Ngimba tukukuketa bulebule ukufwimiwa ukufuma ku ba mumbumba yitu kangi ngimba tubaghile ukukusya bulebule ulusekelo nu kukindilila ukuya basubiliwa kwa Yehova?
“Unenesko Ukwiza na ‘Mtende Chara, Kweni Lupanga’” (Gongwe la Mulinda, Okutobala 2017)
Lumo Mubaghile Ukulonda Ukumanya Isya Nkhani iyi
ISI ABANDU BIGHANILE UKULALUSYA
Ngimba Ukumanyila Ibaibolo na Baketi ba Yehova Kukubombiwa Bulebule?
Bo mukumanyila na Baketi ba Yehova kisita kulipila, mubaghile ukubombela Ibaibolo lililyosa. Mubaghile ukubakolela aba mumbumba yinu bosa pamo um’manyani winu aliwesa uyu mukulonda.
