Baghaniwa Bakamu na Balumbu:

Ulughano lwinu kwa Kyala na babombi bake lukuya pakubakasya ukuti ‘mubukeghe mukapeleghe abafundiwa abandu ifikolo fyosa kangi mukabosyeghe.’ (Mat. 28:​19, 20; Mar. 12:​28-31) Ulughano lwanaloli lwamaka fiyo. Linga tukunangisya ulughano ulu ku bandu, tubaghile ukubatula “aba bimikiliwe ku bumi bwa bwila.”—Imbombo sya Batumiwa 13:48.

Nkabalilo kakunyuma, twiyipagha ukusungila pandumbula muno tubaghile ukufumusyila kisita kubombela amabuku ghitu. Loli lino tukulondiwa ukukusya amaluso ghitu pakuyobesania nabandu. Tukulonda ukubanangisya abangi ulughano mwakuyobesania inkhani isi sikubahobosya. Isi sikusanusya ukwitikisya nukwinong’onela isi abandu babaghile ukuhoboka nasyo. Ngimba ibulosha ili likuya pakututula bulebule ukubomba isi?

Ibulosha ili lili ni fimanyilo 12 ifi fikututula ukukusya utuyilo utununu ukuti tubanangisye abandu ulughano nukupela bafundiwa. Ikimanyilo kilikyosa kikunangisya utuyilo twa Yesu utu anangisye pamo utu Abakristu bakwanda banangisyagha mu bufumusi. Ubwighane bwitu bukaya bwakusungila itolo muno tubaghile ukufumukisya loli ukusyagha injila isi tubaghile ukubanangisya ulughano abandu. Panongwa yakuti akayilo kalikosa kakulondiwa mu bufumusi, tukuya pakuketa utuyilo tumo utu tubaghile ukututula ukwanda ukuyobesania nabandu, ukughomokelako pamo linga tukumanyila nabo Ibaibolo.

Linga tukuyobesania ikimanyilo kilikyosa, twinong’oneleghe fiyo muno tubaghile ukunangisyila utuyilo utununu linga tukuyobesania nabandu kuno tukwikala. Tughelegheleghe ukukusya ulughano lwitu kwa Yehova nabandu. Ukukinda fyosa ulughano ulu lukuya pakututula ukuti tufwanisye ubwighane bwitu ubwakupela abafundiwa.

Tukubandaghisya fiyo panongwa yakuti tukubombela pampene imbombo iyi mwakukolelana. (Zefa. 3:9) Yehova yo abasayeghe bo mukukindilila ukubanangisya abandu ulughano nukubapela bafundiwa.