MUTU 1
Ichisisi Ichi Tuhoboka Ukuchimanya
Ngimba alipo yumo uyu akubulilepo inkhani yachisisi?— * IBaibolo likuyoba ichisisi chofuma kwa Kyala. Chisisi nongwa yakuti abandu bakamenye nasimo. Bope abandumi balondagha fiyo ukuti bamanye. Ngimba kulonda ukumanya ichisisi ichi?—
Ngimba kwinoghona ukuti abandumi balondagha ukumanya fiki?
Pabwandilo, Kyala apelile unyambala nu nkikulu. Ingamu syabo bali Adamu na Eva. Kyala abapele akaya akanunu fiyo, ungunda wa Edeni. Linga Adamu na Eva balimpilikile Kyala, abene na bana babo ngali bapangile ikisu ukuya paladaiso. Ngali batughele nu bumi bwa bwila na bwila mu Paladaiso. Ngimba kukumbuka isi Adamu na Eva babombile?—
Lino, paladaiso nayumo nongwa yakuti Adamu na Eva bakalimpilikile Kyala. Loli Kyala ayobile atile akwisa popanga ikisu kyosa ukuya kinunu ukuti abandu bikale nu bumi ubununu bwila na bwila. Ngimba Kyala abaghile ubomba bulebule isi? Kakindilepo akabalilo katali nayumo uyu asimenye. Chali chisisi.
Akabalilo aka Yesu alisile pa kisu, abamanyisye abandu isya chisisi ichi. Atile chali chisisi cha Bunyafyale bwa Kyala. Yesu abamanyisye abandu ukuti biputeghe ukuti Ubunyafyale ubu bwise. Ubunyafyale bukwisa popangisya ikisu kyosa ukuya paladaiso.
Ngimba uhobwike ukumanya ichisisi ichi?— Ungibwagha ukuti bene aba bakumpilikila Yehova bakwisa kwikala mu Paladaiso. IBaibolo likuyoba isya banyambala na bakikulu aba balimpilikile Yehova. Ngimba kulonda ukumanyila isya bandu aba?— Lino tumanyile isya bandu aba, kangi isi tubaghile ubomba ukuti tufwane nabo.
BELENGA MU BAIBOLO
^ ipal.3 Linga mukubelenga inkhani mu kabuku aka, mukuya poketa akandu aka (—). Aka kabalilo kakuti mwime tasi ukuti umwana amulepo.
