MUTU 2
Rebeka Alondagha Ukumuhobosya Yehova
Rebeka alinganile fiyo Yehova. Isaka yo ali ndume wake. Yope Isaka alinganile Yehova. Ngimba Rebeka na Isaka balyaghene bulebule? Ngimba findu fiki finangisya ukuti Rebeka alondagha ukumuhobosya Yehova? Tubelenge tasi ukuti tughaghe amansala.
Abrahamu na Sara bali bapapi ba Isaka. Abene bikalagha ku Kanani. Abandu ba ku Kanani biputagha ku fifwani. Loli Abrahamu alondagha ukuti Isaka eghane nu mwanakasi uyu akwiputa kwa Yehova. Bo akabalilo kafwene, Abrahamu alintumile umbombi wake ku Harani ukuti akamulondele Isaka umwanakasi. Ku Harani ko kuno abakamu bamo ba Abrahamu bikalagha. Abrahamu abaghile ukuti alintumile Eliyazari.
Rebeka abombile imbombo na maka ghosa ukuti ingamila sinwe amisi
Eliyazari abukile pamopene na bambombo abangi ba Abrahamu. Ubulendo bwali butali fiyo. Abene balyendile ni ngamila 10, bapimbile kangi ni fyakulya ni fyabupe. Ngimba Eliyazari ayagha pakumumanya bulebule umwanakasi wa Isaka? Bo Eliyazari naba ali nabo bafikile ku Harani, batughele pa kisiba. Abene bamenye ukuti akabalilo kalikosa abanakasi bakuya pakwisa ponegha amisi. Eliyazari aliputile kwa Yehova, atile: ‘Linga nguyoba nawe yumo undindwana ukuti nweko ghamo amisi, lelo umwene ambele nukusinwesya ingamila, muli sisisi mo ngumanyilagha ukuti yo unangisye.’
Akabalilo kanandi, Rebeka afikile pa kisiba. IBaibolo likuti Rebeka ali m’moghi fiyo. Bo Eliyazari asumile amisi ghakunwa, Rebeka atile: ‘Ele isagha unwe tata . . . . Ngusineghelagha syosa nasi ngamila syako mpaka sifwane.’ Ingamila linga sili ni nyota sikunwa amisi mingi fiyo, loli Rebeka aneghile amisi mpaka syosa syafwene. Keta pa chithuzithuzi akabalilo aka Rebeka aneghagha amisi.— Eliyazari yope aswighagha muno Yehova alyamulile ulwiputo lwake.
Eliyazari alimpele Rebeka ifyabupe ifinunu ifi ali nafyo. Rebeka abakolile ukuti babuke ku nyumba ya Tata wake. Eliyazari ayobile syosa isi atumiwe kangi muno Yehova alyamulile ulwiputo lwake. Ababapi ba Rebeka bahobwike ukuti umwene eghiwe kwa Isaka.
Rebeka abukile pamopene na Eliyazari ku Kanani ukuti eghane na Isaka
Ngimba kwinoghona ukuti Rebeka alighanile ukweghiwa kwa Isaka?— Rebeka amenye ukuti Eliyazari atumiwe na Yehova. Bo umwene bamulalusisye atile: ‘Ee nighanile.’ Akabalilo kalakala asumwike na Eliyazari. Bo bafikile ku Kanani alyeghiwe kwa Isaka.
Rebeka asayiwe nongwa yakuti abombagha syosa isi Yehova alondagha ukuti umwene abombe. Bo ifinja fikindilepo, Yesu apapiwe ufuma mkikolo kya Isaka, undume wa Rebeka. Nuwe ubaghile ukusayiwa linga kukonga isi Kyala ohoboka nasyo.
