Pakabalilo aka Samueli ali mwana, ikele pa hema wa Kyala nu kumbombela Yehova. Agha ghali malo agha abandu biputilangapo. Ngimba umenye ifi fyabombiwe ukuti Samuel ikale pa hema wa Kyala? Ikyakwanda, tumanyile tasi isya Hana, mama wa Samueli.

Akabalilo akatali Hana alondagha ukuti aye nu mwana, loli ikele akabalilo katali kisita kupapa umwana. Umwene asumile Yehova ukuti amutule. Afingile ukuti linga apapile umwana undumyana akwisa kumtuma ukuti ikale pa hema wa Kyala nu kumbombela imbombo. Yehova alyamwile ulwiputo, kangi apapile umwana undumyana. Amupele ingamu ya Samueli. Bo ali ni finja 4 pamo 5, ufwana na muno mama wake afingile, alintumile Samueli ukuti akambombele Kyala pa hema wake.

Eli ali mputi mkulumba pa hema wa Kyala. Abombagha pamopene na banake babili. Kumbuka ukuti pa hema wa Kyala, abandu balondiwagha ubomba ifindu ifinunu. Loli abana ba Eli babombagha imbibi. Syosa isi syabombiwagha, Samueli aketagha. Ngimba Samueli abombagha imbibi ufwana na muno abana ba Eli babombelagha?— Ayi, umwene abombagha inunu ufwana na muno amanyilile ku bapapi bake.

Kwinoghona kuti Eli ngali abombile syafiki na bana bake babili aba?— Ngali abalongile abana bake. Akabaghile ubitikisya ubomba imbombo pa nyumba ya Kyala. Loli Eli akabombile nasimo. Yehova akalele fiyo na Eli na bana bake abalumyana babili bala. Yehova alinowine ukuti abafunde bosa.

Ubusiku bumo bo Samueli alambalele, apilike umundu yumo akunkolela: ‘Samueli!’ Umwene abopile kwa Eli, loli Eli ayobile atile: ‘ngakukolelapo.’ Syosa isi syabombiwe kabili kosa. Akabutatu, Eli ayobile kwa Samueli ukuti linga apilike ukolela kangi, amule ati: ‘Yobagha  Yehova, ngupilika.’ Isi syo Samueli abombile, Yehova ayobile nawe atile, ‘Umpangile Eli ukuti nguya pakuyifunda inyumba yake nongwa ya mbibi isi babombile.’ Kwinoghona ukuti syali mbepe ukuti Samueli amupangile Eli inkhani iyi?— Ayi, kwali kukafu. Nalinga Samueli ali nu bogha, loli abombile syosa isi Yehova ayobile. Syosa isi Yehova ayobile syabombiwe. Abana ba Eli baghoghiwe, yope Eli afwile.

Isi Samueli abombile situtula uswe lino. Umwene abombile isi syali nunu nalinga abandu abingi babombagha imbibi. Uwe ubaghile ubomba bulebule? Ngimba ubaghile ufwana na Samueli ubomba isi nunu? Linga kubomba inunu, Yehova na bapapi bako bohoboka.