Lumo tusekiwa na bandu linga tuyoba isya Yehova. Bamo bokalala linga tuyoba nabo. Isi sibaghile upangisya ukuti uswe tuleke uyoba isya Kyala. Ngimba uwe sikubombeliwepo?— IBaibolo liyoba isya ndumyana yumo ukuti alinganile Yehova loli akabalilo kamo asyele panandi ukuti aleke uyoba isya Yehova. Ingamu yake ali Yeremiya. Tumanyile inkhani ya Yeremiya.

Akabalilo aka Yeremiya ali ndumyana, atumiwe na Yehova ukuti abasoke abandu baleke imbibi. Iyi yali mbombo ngafu kwa Yeremiya kangi ali mogha. Umwene ayobile kwa Kyala, atile: ‘Ngamanya ukuyoba. Ndi mwana.’ Yehova atile: ‘Ungatilagha. Une ndi nuwe.’

 Yeremiya alyandilepo ukubasoka abandu ukuti bakwisa kufundiwa linga batosileka imbibi syabo. Ngimba kwinoghona ukuti abandu babombile isi Yeremiya ababulile?— Ayi. Abandu bamusekagha Yeremiya, abangi bamukalalilagha. Bamo balondagha ukungogha! Ngimba Yeremiya apilike bulebule?— Ubogha bwamwaghile kangi ayobile atile: ‘Ndikwisa kuyoba kangi isya Yehova.’ Ngimba alekile uyoba isya Kyala?— Ayi. Yeremiya akindilile uyoba isya Yehova papo alinganile fiyo. Yo nongwa Yehova ali nawe akabalilo kosa.

Akabalilo kamo, abandu bandumbula imbibi bamusopile Yeremiya m’mbwina bwa matope. Ifyakulya na misi akali nafyo. Inyinoghono syabo syali syakuti Yeremiya afwile mumo. Loli Yehova amutulile Yeremiya, asokilemo!

Kumanyilako fiki kwa Yeremiya?— Nalinga utubalilo tumo Yeremiya ali nu bogha, akalekile uyoba isya Yehova. Linga kuyoba isya Yehova, abandu bamo boseka, abangi bokalala. Lumo ubaghile ukuya nisoni, lumo ubogha bubaghile ukwagha. Loli ungalekagha uyoba isya Yehova. Muno antulile Yeremiya, nuwe Yehova akwisa pokutula.