Ku bosa aba banganile Yehova na Masyu ghake Baibolo:

Yesu ayobile ukuti, “mwisakubumanyagha ubwanaloli, ubwene ubwanaloli bwisa kubapelelagha umwe ukuya babuke”. (Yohani 8:32) Mwinong’onele muno mwalipilikile akabalilo akakwanda bo mubwaghile ubwanaloli bwakufuma mu Baibolo! Mwahobwike fiyo ukubumanya ubwanaloli nalinga ikisu iki kiswile nu butungulu.—2 Timoti 3:1.

Yehova ikulonda ukuti tubumanye ubwanaloli. Kangi panongwa yakuti tubaghanile abandu, tukulondiwa ukubabula isya bwanaloli ubu. Loli filipo fingi ifi fibaghile ukututula ukuti tumbombeleghe Yehova. Tukulondiwa ukubomba fyosa ifi tubaghile ukufwanisya pakuya Bakristu, panongwa yakuti tukughindika ifundo sya Yehova. Yesu ayobile injila yakulondiwa fiyo iyi tubaghile ukunangisya ukuti tunganile Yehova. Umwene atile: “Linga mukusikonga indaghilo syangu, po mwisakuyagha ndughano lwangu, bo apo nanine nsikongile indaghilo sya Tata kangi ndi ndughano lwake.”—Yohani 15:10.

Yesu anganile fiyo Tata wake, kangi ikubomba kilikyosa iki Tata wake ikumbula. Linga isi tukubomba isiku lililyosa sikunangisya ukuti tukunkonga Yesu, Yehova ikuya pakutughana kangi tukuya pakuya balusekelo. Ukufwana namuno Yesu ayobile ukuti: “Linga musimenye sisisi, po muli basayiwa linga mukusibomba.”—Yohani 13:17.

Tuli nulusubilo ukuti ibuku ili likuya pakubatula ukumanyila nyingi isya bwanaloli ubu buli mu Baibolo kangi nukuya pabumanyani na Yehova. Uswe tukubiputila ukuti mukindilile ukukusya ubumanyani bwinu na Kyala kangi mukindilile ‘ukuya ndughano lwa Kyala . . . uku mukwinong’onela ubumi bwa bwila na bwila.’—Yuda 21.