1-3. (a) Ngimba abandu bingi bikwipilika bulebule nimbombo syabo? (b) Ngimba malalusyo ghaliku agha tukuya pakuyobesania mu mutu ughu?

Abandu pa kisu kyosa bikwiyula fiyo ukubomba imbombo ukuti bitule bene na ba mumbumba syabo. Bingi bakasighana imbombo syabo, kangi bamo bikutila ukubuka ku mbombo isiku lililyosa. Linga momuno mukwipilikila, ngimba mubaghile ukubomba bulebule ukuti imbombo yinu yiyeghe yakuhobosya fiyo? Ngimba mubaghile ukubomba isyafiki ukuti muyighaneghe imbombo yinu?

² Yehova ikutubula ukuti: “Umundu wesa yo fikuti alyeghe nu kunwa kangi nukwikyela pali ifi aliyulile ukubomba. Namanga fyo fyabupe fya Kyala.” (Undumbilili 3:13) Yehova atupelile ukuti tuhobokeghe linga tukubomba imbombo. Umwene ikulonda ukuti tuhobokeghe na isi tukubomba.—Belenga Undumbilili 2:24; 5:18.

³ Ngimba findu fiki ifi fibaghile ukututula ukuti tuhobokeghe nimbombo yitu? Ngimba mbombo siliku isi Abakristu bikulondiwa ukwepukako? Ngimba tubombeghe bulebule ukuti imbombo yitu yileke ukuya pa malo ghakwanda ukukinda ukumbombela Yehova? Kangi mbombo yiliku yakulondiwa fiyo iyi tukulondiwa ukuti tubombeghe?

4, 5. Ngimba Yehova ikuyiketa bulebule imbombo?

⁴ Yehova ighanile ukubomba imbombo. Ilemba lya Ubwandilo 1:1 likuti: “Pabwandilo Kyala apelile ikisu ikya kumwanya ni kya pasi.” Bo Kyala amalile ukupela ikisu na fyosa ifi filimo, umwene ayobile ukuti ikipeliwa kyake “kinunu itolo.” (Ubwandilo 1:31) Umpeli witu ahobwike na ifi apelile.—1 Timoti 1:11.

⁵ Yehova atikuleka ukubomba imbombo. Yesu ayobile ukuti: “Tata ikubomba ukufika kulilino kuno.” (Yohani 5:17) Nalinga tukasimanya imbombo nyingi isi Yehova ikubomba, loli simo tusimenye. Ikusala aba bisa kulongosyagha pampene nu mwanake Yesu Kristu mu Bunyafyale bwake. (2 Bakorinti 5:17) Yehova ikulongosya nu kufighilila abandu. Panongwa ya mbombo yakufumusya pa kisu kyosa, abandu bingi bam’menye Yehova kangi bali nulusubilo ukuti bikuya pakwikala bwila na bwila mu paladaiso pa kisu.—Yohani 6:44; Baroma 6:23.

6, 7. Ngimba Yesu iyipagha bulebule pa mbombo?

⁶ Ukufwana na Tata wake, Yesu ighanile ukubomba imbombo. Bo akali ukwisa pa kisu, Yesu ali yo “fundi” pakuntula ukupela ifindu kumwanya na pa kisu kya pasi. (Isya Mbupingamu 8:22-31 NWT; Bakolosi 1:15-17) Bo ali pa kisu kya pasi, Yesu akindilile ukwiyula pa mbombo. Pakabalilo aka ali ndumyana, amanyile ubukalipentala, nuyenga. Yesu ali wa kwiyipa pa mbombo, yonongwa amanyiwe ningamu iyakuti ‘kalipentala.’—Marko 6:3.

⁷ Loli imbombo inywamu iyi Yesu abombagha pa kisu yali ya kufumusya amasyu amanunu nu kubamanyisya abandu isya Yehova. Abombile imbombo iyi kwa fyinja fitatu na hafu, kangi iyulagha ukubomba ukufuma nulubunju mpaka pakilo. (Luka 21:37, 38; Yohani 3:2) Yesu endagha ubulendo ubutali mu nsebo uwalufumbi ukuti afumusye amasyu amanunu ku bandu bingi.—Luka 8:1.

8, 9. Nongwa yafiki Yesu ahobokagha nimbombo yake?

 ⁸ Yesu aketagha ukuti ukubomba imbombo ya Kyala kwafwene itolo nukulya. Imbombo iyi yampagha amaka nukunkasya. Twalipo utubalilo tumo utu Yesu iyulagha fiyo pa mbombo yake mpaka akakaghagha na kabalilo kakulya. (Yohani 4:31-38) Abombelagha ulusako lulilosa ukutula abandu ukumanyila isya Tata wake. Yonongwa ayobile kwa Yehova ukuti: “Une ngupele ubukulumba uwe nkisu muno, imbombo iyi walimbele ukuti njibombe, yo njimalile.”—Yohani 17:4.

⁹ Yehova na Yesu, bosa bikwiyula fiyo kangi bikuhoboka nukwikutisiwa nimbombo yabo. Tukulonda “ukunkonga Kyala,” kangi tukulondiwa “ukukonga amakato gha Yesu”. (Baefesi 5:1; 1 Peteri 2:21) Yonongwa tukwiyula ukubomba imbombo kangi tukubomba kanunu kilikyosa iki tukubomba.

10, 11. Fiki fibaghile ukututula ukuya naminong’ono amanunu pa mbombo iyi tukubomba?

¹⁰ Pakuya babombi ba Yehova, tukwiyula ukubomba imbombo ukuti twitule twibene naba mumbumba yitu. Tukulonda ukuti tuhobokeghe nimbombo iyi tukubomba loli tukutamiwa ukuhoboka nayo. Ngimba tubombeghe isyafiki linga tutikuhoboka nimbombo yitu?

¹¹ Muyeghe na minong’ono amanunu. Kukafu ukuchenja amalo agha tukubombela nu bunywamu bwa mbombo iyi tukubomba, loli tubaghile ukuchenja aminong’ono ghitu. Ukumanya isi Yehova ikulindilila kumyitu kubaghile ukututula. Mwakifwanikisyo: Yehova ikulindilila ukuti umutu wa mbumba ikuya pakubomba fyosa ifi abaghile ukufwanisya ukuti ayilondele imbumba yake ifi yikulondiwa. Kangi Ibaibolo likuyoba ukuti uyu linga ikutoliwa  ukubapa aba mbumba yake ifyakulondiwa “bo mbibi ukukinda unsitakwitika.” (1 Timoti 5:8) Linga muli mutu wa mbumba, mwiyuleghe ukubapa ifyakulondiwa aba mumbumba yinu. Kali muyighanile imbombo iyi mukubomba pamo hayi, mukulondiwa ukumanya ukuti isi mukubomba pakubapa aba mumbumba yinu, sikunhobosya Yehova.

12. Ngimba ukwiyula nukuya basubiliwa kukututula bulebule?

¹² Mwiyuleghe kangi muyeghe basubiliwa. Isi sibaghile ukubatula ukuti muhobokeghe nimbombo yinu. (Isya Mbupingamu 12:24; 22:29) Isi sikuya pakupangisya ukuti bwana winu abasubileghe. Ababwana bikubaketa ababombi abasubiliwa ukuya bapamwanya panongwa yakuti bikumanya ukuti bakabaghila ukuhiya indalama, ifibombelo pamo akabalilo. (Baefesi 4:28) Kangi ikyakulondiwa fiyo kyo kyakuti Yehova ikumanya linga tukwiyula nukusubiliwa. Mubaghile ukuya ni “nyibonelo inunu (mabyebye)” panongwa yakumanya ukuti mukunhobosya Kyala.—Bahiburi 13:18; Bakolosi 3:22-24.

13. Ngimba findu fiki fibaghile ukubombiwa panongwa yakuya basubiliwa?

¹³ Musimanyeghe ukuti akayilo kinu ku mbombo kabaghile ukupangisya abangi ukumpala Yehova. Isi sikututula kangi ukuti tuhobokeghe nimbombo yitu. (Titi 2:9, 10) Sibaghile ukubombiwa ukuti yumo uyu mukubomba nawe imbombo abaghile ukulonda ukumanyila Ibaibolo panongwa ya kayilo kinu.—Belenga Isya Mbupingamu 27:11; 1 Peteri 2:12.

14-16. Ngimba tukulondiwa ukwinong’onela isyafiki linga tukusala imbombo?

¹⁴ Mu Baibolo mukalembiwa imbombo isi Unkristu ikulondiwa ukubomba na isi ikulondiwa ukusikana. Loli lili ni  fundo isi sibaghile ukututula ukusala kanunu imbombo. (Isya Mbupingamu 2:6) Linga tukubombela ifundo sya mu Baibolo, tubaghile ukwilalusya amalalusyo agha:

¹⁵ Ngimba imbombo iyi yikuya pakumbangisya ukubomba ifindu ifi Yehova ikukana? Tumanyile kale ifi Yehova afibengile, bo ubuhiyi nubutungulu. (Ukusoka 20:4; Imbombo Sya Batumiwa 15:29; Baefesi 4:28; Ubusetuli 21:8) Yonongwa tuli maso ukuti twepukeko ku mbombo isi sitikukolelana ni fundo sya Yehova.—Belenga 1 Yohani 5:3.

 ¹⁶ Ngimba imbombo iyi yikukasya utuyilo utu Yehova ikukana? Mwakifwanikisyo, bule linga babapele imbombo yakwambilila abandu pachipatala apa bikusosya inyanda? Ukwambilila abandu kukaya kubibi. Loli musimenye muno Yehova ikwipilikila pa nkhani yakusosya ulwanda. Pope nalinga ukaya yowe kuya pakubomba imbombo yakusosya inyanda, loli ngimba utikuya pakwanda ukwilonga ukuti kutula pambombo iyi yikunkalalisya Yehova?—Ukusoka 21:22-24.

17. Ngimba fiki fibaghile ukututula ukusala ifindu ifi fikunhobosya Kyala?

¹⁷ Linga tukubombela ifundo sya Kyala, tubaghile ukufwana na bandu aba bikuyobiwa pa Bahiburi 5:14, “aba amahala ghabo mengo itolo pakufipaghulania ifinunu nifibibi.” Mwilalusye ukuti: ‘Linga nitike ukubomba imbombo iyi, ngimba bamo bikuya pakukalala? Ngimba imbombo iyi yikuya pakupangisya ukuti mbukeghe ku fisu ifingi ukuleka umwinangu wa mbweghi na banangu? Ngimba linga mbalekile bene, bikuya pakupalamasiwa bulebule?’

18. Nongwa yafiki kukafu ukubika ukumbombela Kyala pa malo ghakwanda?

¹⁸ Kupala fiyo ukubika ukumbombela Kyala pa malo ghakwanda ‘mu tubalilo utupalapala utu.’ (2 Timoti 3:1) Ukuyagha imbombo nukukindilila ukuya pambombo kukafu. Tukulondiwa ukuti tubalondeleghe ifyakulondiwa aba mumbumba yitu, loli tukumanya ukuti ukumbombela Kyala, ko kukulondiwa ukuya pa malo ghakwanda. Tukabaghila ukwitikisya ukuti ifindu ifyakumbili fyo fiyeghe pa malo ghakwanda pa bumi bwitu. (1 Timoti 6:9, 10) Po ngimba tubaghile ukubika bulebule “innunu” pa  malo ghakwanda nukubalondela ifyakulondiwa aba mumbumba yitu?—Bafilipi 1:10.

19. Ngimba ukunsubila Yehova kukututula bulebule ukuti imbombo iyi tukubomba yileke ukututolesya ukumbombela Kyala?

¹⁹ Munsubileghe fiyo Yehova. (Belenga Isya Mbupingamu 3:5, 6.) Tusimenye ukuti Kyala afimenye kanunu ifi tukulondiwa kangi ukuti ikutupakikisya. (Salimo 37:25; 1 Peteri 5:7) Amasyu ghake ghikuti: “Ubumi bwinu bungayagha bwa bughana ndalama, mufwaneghe nafyo fifyo muli nafyo. Buno Kyala ayobile atile ‘Ndisakukulekagha kangi ndisakukutaghagha.’” (Bahiburi 13:5) Yehova atikulonda ukuti tutamiweghe naminong’ono pa nkhani ya muno tukuya pakulondela ifyakulondiwa ifya mbumba yitu. Umwene anangisye mu njila nyingi ukuti abaghile ukubapa ifyakulondiwa ababombi bake. (Matai 6:25-32) Muli mosa muno ifindu fibaghile ukuyila nimbombo yitu, tukubelenga Ibaibolo akabalilo kosa, tukufumusya amasyu amanunu nukwaghiwa pangomano.—Matai 24:14; Bahiburi 10:24, 25.

20. Ngimba tubombeghe bulebule ukuti tuleke ukuya nu bumi bwakulonda ifindu fingi?

²⁰ Muyeghe maso. (Belenga Matai 6:22, 23.) Isi sikusanusya ukuti mukulondiwa ukuya nubumi ubusita kulonda fingi ukuti mubikeghe indumbula yinu pakumbombela Yehova. Tusimenye ukuti bubaghile ukuya bukonyofu linga tukwitikisya ukuti indalama, ubumi bwa pamwanya pamo ifindu ifipya, fiye pa malo ghakwanda pa bumi bwitu ukukinda ubumanyani bwitu na Kyala. Ngimba findu fiki fikuya pakututula ukubika ifindu ifyakulondiwa pa malo ghakwanda? Twiyuleghe fiyo ukuti tuleke ukuya ningongole. Linga muli ningongole, mughelegheleghe ukughomola. Linga tukaya maso, ifindu ifyakumbili fikuya pakutumalila amaka na kabalilo kitu, ifi  fibaghile ukutupangisya ukuti tutoliwe ukuya na kabalilo ka kwiputa, ukumanyila Ibaibolo nu kufumusya. M’malo mwakwitikisya ukuti ifindu ifyakumbili fitukatasye, tukulondiwa ukumanyila ukwikutisiwa na fifyo tuli nafyo bo “ifyakulya nifyakufwala.” (1 Timoti 6:8) Kangi tukulondiwa ukufufuza injila isi tubaghile ukumbombela Yehova mwakufwana nalinga tukwaghana nindamyo isyakukindanakindana pa bumi bwitu.

21. Nongwa yafiki tukulondiwa ukusala ifi fikulondiwa ukuya pabwandilo pa bumi bwitu?

²¹ Muyeghe nulubatiko ulununu. Tukulondiwa ukubombela  akabalilo, amaka ni findu fyitu ifyakumbili mwamahala. Linga tukaya maso, ifimanyilo ifyapamwanya, indalama ni findu ifingi fibaghile ukutumalila akabalilo. Yesu ayobile ukuti: ‘Amubulondeghe . . . tasi Ubunyafyale bwake.’ (Matai 6:33) Ifi tukusala, utuyilo twitu nu bwighane bwitu, fikunangisya ifi fili pabwandilo mundumbula yitu.

22, 23. (a) Pakuya Bakristu, ngimba tuli nimbombo yiliku iyakulondiwa iyi tukulondiwa ukubomba? (b) Ngimba fiki fibaghile ukututula ukuti tuhobokeghe nimbombo yitu?

²² Imbombo yakulondiwa fiyo pa bumi bwitu ko kumbombela Yehova nu kufumusya amasyu amanunu ku bangi. (Matai 24:14; 28:19, 20) Ukufwana namuno Yesu abombelagha, nuswe tukulonda ukubomba fyosa ifi tubaghile ukufwanisya. Bamo babukile mfighaba ifi mukulondiwa abafumusi bingi. Bamo bikumanyila injobelo isingi ukuti bafumusyeghe ku bandu aba bikuyoba injobelo isyo. Mubalalusye aba babombilemo isi ukuti mumanye muno babombile. Bikuya pakubabula ukuti lino ubumi bwabo bwalusekelo fiyo.—Belenga Isya Mbupingamu 10:22.

²³ Amasiku agha abandu bingi bikumalila akabalilo akatali ku mbombo syabo ukuti balonde ifyakulondiwa fya mbumba syabo. Yehova ikuketa fyosa ifi, kangi ikundaghisya pa fyosa ifi tukubomba ukuti tulonde ifyakulondiwa fya mbumba syitu. Po isagha twesa tukindilile ukunkonga Yehova na Yesu mwakwiyula pambombo yitu yiliyosa iyi tukubomba. Kangi tukumbukeghe ukuti imbombo yitu iyakulondiwa fiyo ko kumbombela Yehova nu kufumusya masyu amanunu agha Bunyafyale bwake. Isi sikuya pakutupa ulusekelo lwanaloli.