1, 2. Ngimba tubaghile ukubomba isyafiki ukuti tukindilile ukuya ndughano lwa Kyala?

Twesa tukulonda ukuya nu bumi ubununu. Yonongwa tukulya ifyakulya ifinunu, tukupanga amafizo kabalilo kosa kangi tukupasikisya umbili witu. Nalinga kukaya kupepe loli panyuma pake tukuhoboka nu bumi ubu, yonongwa tutikuleka. Loli tukulondiwa kangi ukuya nu bumi ubununu mu njila iyingi.

² Nalinga twandile kanunu ukummanya Yehova, tukulondiwa ukukindilila ukukusya ubumanyani bwitu nu mwene. Pakabalilo aka Yuda abakasyagha Abakristu ukuti, “bayeghe ndughano lwa Kyala,” ababulagha isi balondiwagha ukubomba. Umwene ababulile ukuti: “Amwiyengeghe ndwitiko lwinu ulwikemo.” (Yuda 20, 21) Ngimba tubaghile ukuyenga bulebule ulwitiko ulwamaka?

3-5. (a) Ngimba Setano ikulonda ukuti tusiketeghe bulebule ifundo sya Yehova? (b) Ngimba mukwipilika bulebule panongwa ya ndaghilo ni fundo sya Yehova?

³ Mukulondiwa ukusimikisya ukuti injila sya Yehova nnunu. Setano ikulonda ukuti mwinong’oneghe ukuti ifundo sya Yehova ngafu kangi ukuti mubaghile ukuya balusekelo linga mukusala mwibene ifi finunu na ifi fibibi.  Ukwanda mungunda wa Edeni, Setano ikughelaghela ukupangisya abandu ukusubila isi. (Ubwandilo 3:1-6) Kangi ikukindilila mpaka lino.

⁴ Ngimba isi Setano ikuyoba syabwanaloli? Ngimba indaghilo sya Yehova ngafu ukusikonga? Hayi. Ukuti twamule, tufwanikisye ukuti mukwenda mu paki innunu fiyo. Mukuketa umpanda unywamu wighele injila ya kuno mukubuka. Lumo mubaghile ukwinong’ona ukuti, ‘Nongwa yafiki bighele injila nu mpanda?’ Mwanakalinga mukupilika ingalamu yikubuna nkati mu mpanda. Ngimba mubaghile ukwinong’ono isyafiki isya mpanda ughu? Mubaghile ukuhoboka ukuti ghubatulile ukuti muleke ukulyeliwa ningalamul! Indaghilo sya Yehova sifwene itolo nu mpanda, kangi Umohesi afwene itolo ningalamu. Amasyu gha Kyala ghikutusoka ukuti: “Muye bwima itolo kangi muyeghe ngenge buno uwanongwa yinu yu mohesi, ikwembela bo yi ngalamu iyi yikubuna, ikundonda yumo uwakummila.”—1 Peteri 5:8.

⁵ Yehova ikulonda ukuti tuyeghe nu bumi ubununu. Atikulonda ukuti Setano atusofanie. Yonongwa yake atupele indaghilo ni fundo ukuti situfighilileghe nukupangisya ubumi bwitu ukuya bwalusekelo. (Baefesi 6:11) Yakobu alembile ukuti: “Loli uyu linga ikusyenesya ingaghilo sya Kyala isi sikupela ubwabuke . . . Kyala isakunsayagha muli syosa isi ikubomba.”—Yakobu 1:25.

6. Ngimba tubaghile ukusimikisya bulebule ukuti injila sya Yehova nnunu?

⁶ Linga tukukonga injila sya Yehova, tukwikala kanunu kangi ubumanyani bwitu na Yehova bukukula. Mwakifwanikisyo, tukusayiwa linga tukwiputa kumyake. (Matai 6:5-8; 1 Batesalonike 5:17) Tukuhoboka linga tukukonga ubulongosi bwake ubwakuti tubunganeghe pampene ukuti tumwipute Yehova nu kukasania kangi linga tukubomba  imbombo ya kufumusya nu kumanyisya abandu Ibaibolo. (Matai 28:19, 20; Bagalatiya 6:2; Bahiburi 10:24, 25) Linga tukwinong’onela muno ifindu ifi fitutulile ukuya nu lwitiko lwamaka, tukusimikisya ukuti injila sya Yehova nnunu.

7, 8. Findu fiki ifi fibaghile ukututula ukuti tuleke ukupasya isya ngelo isi sibaghile ukwisa nkyeni ?

⁷ Utubalilo tumo tubaghile ukupasya ukuti lumo ulwitiko lwitu lukwisa kugheliwa nkyeni kangi tukwisa kutoliwa. Linga tukwinong’ono bo ulu, tukumbukeghe amasyu gha Yehova agha ghikuti: ‘Yone Yehova Kyala winu uyu ikulonda ukubamanyisya umwe ukuti muyeghe bandu banunu, uyu ikulonda ukubalongosya umwe mu njila iyi mubaghile ukwendamo. Linga naloli mwapilikisyagha kuli isi nikubalaghila umwe! Po angali ulusayo lukwenda itolo ukuti lusoko ukwisa pamyinu, po angali mukuya balambiki bo ghamayigha agha gikukoma munyanja mumbali.’—Yesaya 48:17, 18 NWT.

 ⁸ Linga tukumpilikila Yehova, ulutengano lwitu lubaghile ukuya bo ulusoko ulu lutikuma nubugholofu bwitu bubaghile ukuya bo amayigha agha ghikukoma munyanja mumbali kangi tubaghile ukuya basubiliwa kumyake bwila na bwila. Kisita ukwinong’onelako isi sikubombiwa pabumi bwitu, tubaghile ukuya basubiliwa. Ibaibolo lifingile ukuti: “Bika ikitwalo kyako pa Yehova, po umwene isa kukukasyagha uwe. Atisakundekapo siku umundu ungolofu ukuti ingileghe mbutolwe.”—Salimo 55:22.

9, 10. Ngimba ukuya nkusi kukusanusya isyafiki?

⁹ Ukuti mukusye ubumanyani bwinu na Yehova, mukuya pa “kusanukila ku sya bukusi.” (Bahiburi 6:1) Ngimba sikusanusya isyafiki ukuya bakusi?

¹⁰ Tutikuya Bakristu bakusi panongwa yakuya bakulumba. Ukuti tuye bakusi, tukulondiwa ukuya pabumanyani bwamaka na Yehova nukughelaghela ukuketa ifindu muno umwene ikufiketela. (Yohani 4:23) Pauli alembile ukuti: “Namanga aba akayilo kabo ka mbili bikwinong’ona si sya mbili, loli aba kayilo kabo ka mbepo bikwinong’ona si sya mbepo.” (Baroma 8:5) Umundu unkusi atikubika mahala ghake pakulonda ubukabi pamo ifindu fya mbili. Malo mwake ikwiyula ukumbombela Yehova nukusala kanunu ifindu pa bumi bwake. (Isya Mbupingamu 27:11; belenga Yakobu 1:2, 3.) Umundu unkusi atikusekelela ni mbibi kangi ikumanya isi nnunu nu kusikonga.

11, 12. (a) Ngimba Pauli ayobile isyafiki isya Bakristu aba “amahala ghabo mengo”? (b) Ngimba ukuya bakusi pa nkhani yakumbombela Kyala nukuya kalyoto wa kubopa fifwene bulebule?

¹¹ Fikulondiwa ukwiyula ukuti umundu aye nkusi. Untumiwa Pauli alembile ukuti: “Ifyene loli ifyakulya ifikafu fyo fya bakusi, aba amahala ghabo mengo itolo pakufipaghulania ifinunu nifibibi, papo bisibisenie  nafyo.” (Bahiburi 5:14) Amasyu aghakuti “ukughamanyisya” ghabaghile ukutukumbusya sya aba bikwitendekesya umpalano wakubopa.

¹² Linga, tukuketa umundu ikutola pampalano uwa kubopa tukumanya ukuti alitendekisye kwa kabalilo akatali. Akapapiwe ukuya kalyoto wa kubopa. Linga umwana apapiwe atikumanya ukubombesyela imbombo amaboko na malundi ghake. Loli linga akabalilo kakindilepo ikumanyila ukukola ifindu nukwenda. Linga abikilepo indumbula ukumanyila abaghile ukuya kalyoto. Mwakufwana itolo, ukuti abandu baye Bakristu bakusi bikulondiwa ukumanyila kwa kabalilo akatali.

13. Ngimba findu fiki ifi fibaghile ukututula ukumanyila ukwinong’ona muno Yehova ikwinong’onela?

¹³ Mu buku ili tuketile muno uswe tubaghile ukwinong’onela na muno Yehova ikwinong’onela nukuketa ifindu muno mwene ikulondela. Tumanyile muno tubaghile ukundaghisyila kangi muno tubaghile ukubombela ukuti tusighane indaghilo sya Yehova. Linga tukusala ifyakubomba, twilalusyeghe ukuti: ‘Ngimba ndaghilo pamo fundo siliku isi ngulondiwa ukwinong’onela pa kyakubombiwa iki? Ngimba mbaghile ukusikonga bulebule? Ngimba Yehova ikulonda ukuti mbombe isyafiki?’—Belenga Isya Mbupingamu 3:5, 6; Yakobu 1:5.

14. Ngimba findu fiki ifi tukulondiwa ukubomba linga tukuyenga ulwitiko lwitu?

¹⁴ Tutikuleka ukuyenga ulwitiko lwitu mwa Yehova. Ukufwana itolo nukulya ifyakulya ifi fikututula ukuti umbili witu ghuyeghe kanunu, ukumanyila isya Yehova kukututula ukuti tuye nulwitiko lwamaka. Akabalilo aka twalwandile ukumanyila Ibaibolo, twamanyile ifundo sya bwandilo isya Yehova ni njila syake. Loli bo kabalilo kakindilepo twalondiwagha ukupilikisya ifundo inywamu isya  mu Baibolo. Isi syo Pauli asanusyagha apa ayobagha ukuti: “Ifyene loli ifyakulya ifikafu fyo fya bakusi.” Linga tukukonga isi tukumanyila tukuya na mahala. Ibaibolo likutubula ukuti: “Utaleghe ukulonda amahala.”—Isya Mbupingamu 4:5-7; 1 Peteri 2:2.

15. Ngimba bununu buliku ubu bukuyapo linga tunganile Yehova na bakamu na balumbu bitu?

¹⁵ Umundu abaghile ukuya nu mbili unnunu kangi wamaka, loli ukuti akindilile ukuya bo ulu, asimenye ukuti ikulondiwa ukukindilila ukwilyesya kanunu nukwifighilila. Mwakufana itolo, umundu unkusi ikumanya ukuti ikulondiwa ukwiyula ukuti ubumanyani bwake na Yehova buleke ukumalika. Pauli ikutukumbusya ukuti: “Amwigheleghe linga muli ndwitiko; mwisisimikisyeghe mwibene.” (2 Bakorinti 13:5) Pope tukulondiwa ukuya nu tuyilo twingi ukongelela pakuya nulwitiko lwamaka. Ulughano lwitu mwa Yehova na ku bakamu na balumbu bitu lukulondiwa ukukindilila ukukula. Pauli ayobile ukuti: “Napa linga nje . . . nubumanyi bosa, napa linga nje nulwitiko losa ulwa kuti nsamisyeghe ifyamba, loli nsite ukuya nalo ulughano pope bo ndi wa itolo.”—1 Bakorinti 13:1-3.

16. Ngimba Setano ikulonda ukuti twinong’oneghe isyafiki?

¹⁶ Setano ikulonda ukuti twinong’oneghe ukuti tukabaghila ukufwanisya ukunhobosya Yehova. Abaghile ukuhoboka linga aketile ukuti tuwile amaka kangi tukuketa ukuti nayimo injila yakumalanilana nindamyo isi tukwaghana nasyo. Atikulonda ukuti tubasubileghe Abakristu abinitu, kangi atikulonda ukuti tuhobokeghe. (Baefesi 2:2) Setano amenye ukuti aminong’ono amabibi agha ghabaghile ukutonanga kangi ukonanga ubumanyani bwitu na Yehova. Yonongwa atupele ulusubilo ukuti atutule ukulwa ni nyinong’ono imbibi isi.

17. Ngimba ulusubilo lwakulondiwa bulebule?

 ¹⁷ Pa 1 Batesalonike 5:8, Ibaibolo likufwanikisya ulusubilo lwitu bo kipewa iki unsilikali ikufwala kuntu ukuti ifighilile ku bwite. Ikipewa iki kikukoleliwa ukuti “ulusubilo lwa bupokiwa.” Ukuya nulusubilo mu isi Yehova afingile kubaghile ukutufighilila nukututula ukukanisya inyinong’ono imbibi.

18, 19. Ngimba Yesu akasiwe bulebule nulusubilo?

¹⁸ Ulusubilo ulu Yesu ali nalo lwalimpangisye ukuti aye wamaka. Pabumalilo bwa bumi bwake pa kisu kya pasi, alyaghene nindamyo inywamu. Um’manyani wake wapandumbula alimpelike. Uyungi alinkanile nalinga alim’menye. Abangi bamulekile nukubopa. Abandu ba nkaya kake balinsambukile, batile afwe inifwa yakubaba fiyo. Ngimba findu fiki ifi fyalintulile ukwifimbilisya ku ndamyo syosa isi? “Panongwa ya lusekelo ulu lwabikiwe nkyeni mmyake, alinkukubilwa itolo pa mpiki wakutamiliwapo, alinkusita  nukubikilako umoyo kusoni isi kyampelelagha, loli lilino atughele kukiboko ikililo ikya kikota ikya Kyala .”—Bahiburi 12:2.

¹⁹ Yesu asimenye ukuti linga asubiliwe ikuya pakumwimika Tata wake nukunangisya ukuti Setano ntungulu. Ulusubilo ulu lwalimpangisye ukuya nu lusekelo ulukulumba. Kangi asimenye ukuti ikuya pakuya pampene na Tata wake kumwanya. Ulusubilo ulu lwalimpangisye ukuti ifimbilisye ku ndamyo. Ukufwana na Yesu, nuswe tukulondiwa ukubika amahala pa findu ifi tukusubila. Ifi fibaghile ukututula ukuti twifimbilisye ku ndamyo syosa isi tubaghile ukwaghana nasyo.

20. Ngimba findu fiki ifi fibaghile ukubatula ukuti muyeghe na minong’ono amanunu?

²⁰ Yehova ikuketa ulwitiko lwinu namuno mukubombela pa ndamyo isi mukwaghana nasyo. (Yesaya 30:18; belenga Malaki 3:10.) Umwene afingile ukuti “isakukupagha  isi indumbula yako yikulonda.” (Salimo 37:4) Yonongwa tukulondiwa ukukindilila ukubika amahala pa findu ifi tukusubila. Setano ikulonda ukuti mutaghe ulusubilo lwinu kangi ukuti mwinong’oneghe ukuti isi Yehova afingile syabutungulu. Loli tutikulondiwa ukwitikisya inyinong’ono isi! Linga kuketa ukuti ulusubilo lwako lwandile ukutalala, unsume Yehova ukuti akutule. Kumbuka amasyu agha ghikwaghiwa pa Bafilipi 4:6, 7: ‘Mungiyayagha muli simo, loli ntundu tosa isi mufumbilwe muntwalileghe Kyala ndwiputo, ndupyelesyo pamopene nu kuwa ulupi; ulutengano lwa Kyala lughakindile ghosa amahala, lo lukusyubatilagha indumbula syinu ninyinong’ono syinu mwa Kristu Yesu’

21, 22. (a) Ngimba ubwighane bwa Yehova ku kisu bo buliku? (b) Ngimba fiki ifi mukulonda ukubomba?

²¹ Akabalilo kosa tukulondiwa ukwinong’onela isya bumi bwitu bwa nkyeni. Lululu, aliwesa isakum’manya Yehova. (Ubusetuli 7:9, 14) Inong’onela isya muno ubumi bwisa kuyila nkisu ikipya. Fisakuyagha kanunu ukukinda namuno tukwinong’onela! Setano, abandumi bake na bandu bosa ababibi bisakusosiwapo pakisu. Mutisa kubina pamo ukufwa. M’malo mwake, akabalilo kosa mukwisa kuhobokagha nu bumi. Twesa twisa kubombelagha pampene imbombo ya kutendekesya ikisu ukuya paladaiso. Aliwesa isakuyagha nifyakulya finunu na malo amanunu ghakwikalapo. Abandu bisakuyagha balutengano. Nkabalilo ako, aliwesa pa kisu isakuhobokagha “ukwakufika ku bwabuke ubwa bukulumba bwa bana ba Kyala.”—Baroma 8:21.

²² Yehova ikulonda ukuti muye nawe pabumanyani bwamaka. Yonongwa mukulondiwa ukubomba fyosa ifi mubaghile ukufwanisya ukuti mumpilikileghe nukuseghelela kumyake isiku lililyosa. Naloli, twesa tukulondiwa ukuya ndughano lwa Kyala!—Yuda 21.