1, 2. Nongwa yafiki munganile Yehova?

NGIMBA munganile Kyala? Mubaghile ukuti munganile fiyo, yonongwa mwaliyipile kumyake. Mubaghile ukuti mukunketa ukuya m’manyani winu wapandumbula. Loli bo mukali ukwanda ukungana Yehova, umwene atalile ukubaghana umwe. Mu Baibolo tukubelenga ukuti: “Uswe tukunangisya ulughano, papo umwene atalile ukutughana.”—1 Yohani 4:19.

² Mwinong’onele injila syosa isi Yehova anangisye ulughano kumyitu. Atupele ikisu ukuya kaya kanunu kangi atupele fyosa ifi fikulondiwa ukuti ubumi bwitu buyeghe bwakuhobosya. (Matai 5:43-48; Ubusetuli 4:11) Umwene ikulonda ukuti tuye nawe pabumanyani ubununu kangi ikututula ukuti tum’manye kanunu. Linga tukubelenga Ibaibolo, kokuti tukupilikisya kwa Yehova. Kangi linga tukwiputa ikutupilika. (Salimo 65:2) Ikutulongosya nukutukasya ukwendela mwa mbepo wake mwikemo. (Luka 11:13) Atupele kangi umwanake uwapamwanya fiyo ukuti asatutabule ku butulanongwa ni nifwa.—Belenga Yohani 3:16; Baroma 5:8.

3. Ngimba tukulondiwa ukubomba bulebule ukuti ubumanyani bwitu na Yehova bukindilileghe?

 ³ Mwinong’onele isya m’manyani winu yumo wapandumbula, uyu ali nanumwe pakabalilo kandamyo na kalusekelo. Fikulondiwa ukwiyipa ukuti mukindilile ukuya pabumanyani bwamaka bo ubu. Isi syo sikulondiwa kangi pabumanyani bwitu na Yehova uyu yo M’manyani witu uwapandumbula ukukinda bosa. Ubumanyani bwitu na Yehova bubaghile ukuyako bwila na bwila. Yonongwa Ibaibolo likutubula ukuti: “Muyeghe ndughano lwa Kyala”. (Yuda 21) Ngimba tubaghile ukubomba bulebule? Ibaibolo likwamula ukuti: “Namanga ukungana Kyala, ko uku linga tusikongile indaghilo syake; isyene indaghilo syake syo sikaya sito.”—’ 1 Yohani 5:3

4, 5. (a) Ngimba “ulughano lwa Kyala” lukusanusya isyafiki? (b) Ngimba ulughano lwinu kwa Yehova lwalyandile bulebule ukukula?

⁴ Ngimba Ibaibolo likusanusya isyafiki linga likuti “ulughano lwa Kyala”? Litikuyoba isya lughano lwa Kyala kumyitu loli likuyoba isya lughano lwitu kwa Kyala. Ngimba mukukumbuka akabalilo aka mwalyandile ukungana Yehova?

⁵ Kumbuka muno mwalipilikile bo mumanyile akakwanda ukuti Yehova ikulonda ukuti mwise mwikale nkisu ikipya kwa bwila na bwila. Mwamanyile fyosa ifi abombile ukuti ifi fise fifwanisiwe, kangi mwamanyile isya kyabupe ikyapamwanya iki Yehova atupele uswe bo ikuntuma Umwanake unganiwa pa kisu. (Matai 20:28; Yohani 8:29; Baroma 5:12, 18) Bo mumanyile ukuti Yehova abaghanile mwahobwike fiyo kangi mwalyandile ukungana.—Belenga 1 Yohani 4:9, 10.

6. Ngimba ukungana umundu kukulonda isyafiki? Ngimba ulughano lwinu kwa Kyala lukubatuma ukuti mubombeghe isyafiki?

 ⁶ Loli pakabalilo kala ulughano lwinu kwa Kyala lwandagha itolo. Mwakifwanikisyo, linga tunganile yumo tukubomba fingi ukukinda ukuyoba itolo ukuti “Ngughanile.” Ulughano lo lukutupangisya ukuti tulonde ukubomba ifindu ifi fibaghile ukunhobosya umwinitu. Mwakufwana itolo, ulughano lwinu kwa Yehova lwabapangisye ukulonda ukuti munhobosyeghe yuyo. Bo ulughano ulu lukulile mwaliyipile mwibene kumyake mwa kosiwa. Mwakubomba isi, mwafingile ukumbombela Yehova bwila na bwila. (Belenga Baroma 14:7, 8.) Ngimba mubaghile ukufwanisya bulebule isi mwafingile?

7. Linga tunganile Yehova, ngimba tukuya pakubomba isyafiki? Ngimba indaghilo syake simo syo siliku?

⁷ Panongwa yakuti tunganile Yehova, “tukusikonga indaghilo syake.” Ngimba tukubomba bulebule? Tukumpilikila. Mu Baibolo tukumanyila muno Yehova ikulondela ukuti twikalileghe. Mwakifwanikisyo, umwene ikutubula ukuti tungaghalagha, tungahiyagha, tungatungulupagha, tungaghonanagha nu mundu uyu akaya nkasi pamo ndume witu pamo ukwiputa ku fifwani. 1 Bakorinti 5:11; 6:18; 10:14; Baefesi 4:28; Bakolosi 3:9.

8, 9. Ngimba tukumanya bulebule isi Yehova ikulonda ukuti tubombeghe pa nkhani isi pakaya indaghilo isya mu Baibolo? Yoba ikifwanikisyo.

⁸ Ukuti tunhobosye Yehova, tukulondiwa ukubomba nyingi ukukinda ukukonga itolo indaghilo syake. Umwene akatupa indaghilo pa kilikyosa iki tukubomba pa bumi bwitu. Utubalilo tumo fibaghile ukubombiwa ukuti pakaya ululaghilo lwa ifi tukulonda ukubomba. Ngimba  tubaghile ukusala bulebule ifindu mwamahala? (Baefesi 5:17) Mu Baibolo tukusyagha ifundo isi sikutumanyisya muno Yehova ikuketela ifindu. Linga tukubelenga Ibaibolo tukumanyila muno Yehova ayilile. Tukumanyila muno ikwinong’onela, ifi afighanile na ifi afibengile.—Belenga Salimo 97:10; Isya Mbupingamu 6:16-19; keta Amasyu Gha Pabumalilo 1.

⁹ Mwakifwanikisyo, ngimba tukusala bulebule pa nkhani ya ifi tukuya pakuketelela pa TV pamo pa Intaneti? Yehova atikutubula isi tukulondiwa ukusala. Loli ubulongosi ubu ikutupa bukututula ukuti tusaleghe kanunu. Ifyakuhobosya fingi lino, fiswile nu bwite nu bulowe. Mu Baibolo, Yehova ikutubula ukuti “ababengile aba basighanile isya bwite” kangi ikuti “isakubalongagha abalowe.” (Salimo 11:5; Bahiburi 13:4) Ngimba ifundo isi sibaghile ukututula bulebule ukuti tusaleghe kanunu? Linga tusyaghenie ukuti Yehova afibengile ifindu fimo, tukulondiwa ukufileka.

10, 11. Nongwa yafiki tukumpilikila Yehova?

¹⁰ Nongwa yafiki tukumpilikila Yehova? Tutikumpilikila panongwa ya kutila ulufundo lwene pamo indamyo isi sikwisa linga tusalile ububibi. (Bagalatiya 6:7) Loli tukumpilikila Yehova panongwa yakuti tunganile. Ukufwana na bana aba bikulonda ukunhobosya tata wabo, nuswe tukulonda ukunhobosya tata witu wa kumwanya. Kikayako ikindu kyakuhobosya ukukinda ukumanya ukuti Yehova ikuhoboka nanuswe!—Salimo 5:12; Isya Mbupingamu 12:2; keta Amasyu Gha Pabumalilo 2.

¹¹ Tutikumpilikila Yehova pene linga kupepe loli tukumpilikila utubalilo tosa. Kangi tutikusala ukukonga simo indaghilo ni fundo nukuleka ukukonga isingi. (Ukukumbusya Indaghilo 12:32) M’malo mwake tukukonga  indaghilo syake syosa ukufwana nu wa masalimo uyu ayobile ukuti: “Nikwikyela mu ndaghilo syako, kangi nsighanile.” (Salimo 119:47; Baroma 6:17) Tukulonda ukuya bo muno ayilile Nowa uyu anangisye ulughano lwake kwa Yehova mwakubomba syosa isi abuliwe. Ibaibolo likuti Nowa “alinkusibomba syosa ukufwana na muno Kyala alimbulile.” (Ubwandilo 6:22) Ngimba umwe mukulonda ukuya bo muno ayilile Nowa?

12. Ngimba tubaghile ukunhobosya bulebule Yehova?

¹² Ngimba Yehova ikwipilika bulebule linga tukumpilikila? ‘Tukuyihobosya indumbula yake.’ (Isya Mbupingamu 11:20; 27:11) Mwinong’onela itolo ifundo iyi! Tukunhobosya Umpeli wa kipeliwa kyosa linga tukumpilikila. Loli atikutufimbilisya ukuti tumpilikileghe. M’malo mwake atupele ubwabuke. Isi sikunangisya ukuti tuli nu bwabuke bwakusala ukubomba ifindu ifinunu pamo ifibibi. Yehova ikulonda ukuti ulughano lwitu kumyake lo lututumeghe ukusala kanunu ukuti tuyeghe nu bumi ubununu.—Ukukumbusya Indaghilo 30:15, 16, 19, 20; keta Amasyu Gha Pabumalilo 3.

13, 14. Ngimba tukumanya bulebule ukuti indaghilo sya Kyala sikaya sito ukusikonga? Yoba ikifwanikisyo.

¹³ Bule linga tukwinong’ona ukuti indaghilo sya Yehova ngafu ukusikonga pamo ukuti sibaghile ukutupoka ubwabuke bwitu? Ibaibolo likuyoba ukuti: “Indaghilo syake sikaya sito.” (1 Yohani 5:3) Mu Chigiriki ilisyu lyakuti “sito” likusanusya ukuti “kinywamu.” Mu malemba aghangi ilisyu ili likubombeliwa pakulingania indaghilo isi sibikiwe ukuti abangi batamiweghe itolo. (Matai 23:4;  Imbombo Sya Batumiwa 20:29, 30) Ibaibolo limo likuyoba ukuti: “Indaghilo syake sitikutukonyola.” (The New English Translation) Indaghilo sya Yehova sikaya “ngafu,” ukuti tutoliwe ukusikonga. Utubalilo tosa ikutubula isi tubaghile ukufwanisya.

¹⁴ Mwakifwanikisyo, inong’onela ukuti kuntula um’manyani wako uyu ikusamila kunyumba iyingi. Apakile katundu wake nfikwama ifyakukindanakindana. Ifikwama fimo fipepe loli fimo fisito fiyo, ifi fikulondiwa ukupimbisania abandu babili. Ngimba um’manyani wako abaghile ukukusuma ukuti upimbe ikikwama ikisito wimwene? Hayi! Nongwa yafiki? Panongwa yakuti atikulonda ukuti fikukonyole. Ukufwana nu m’manyani uyu, Yehova akabaghila ukutubula ukuti tubombe ifi tukabaghila ukufwanisya. (Ukukumbusya Indaghilo 30:11-14) Yehova asimenye muno tuyilile. Umwene ‘abumenye ububumbe bwitu, ikukumbuka ukuti tuli mfu itolo.’—Salimo 103:14.

15. Nongwa yafiki tubaghile ukusimikisya ukuti indaghilo sya Yehova silipo ukuti situtuleghe?

¹⁵ Mose akibulile ikikolo ikya Israeli ukuti indaghilo sya Yehova syalipo ukuti “ifindu fibendeleghe kanunu” kangi ukuti ukupilikila kwabo kwayagha pakubatula ukuti bakindilile ukuya “nubumi ubununu.” (Ukukumbusya Indaghilo 5:28-33; 6:24) Syo sikulondiwa kangi lilino. Syosa isi Yehova ikutubula ukuti tubombeghe, sikututula ukuti tuye nubumi ubununu. (Belenga Yesaya 48:17.) Utubalilo tosa Yehova ikumanya isi tukulondiwa. (Baroma 11:33) Ibaibolo likutubula ukuti: “Kyala yo lughano.” (1 Yohani 4:8) Isi sikunangisya ukuti syosa isi Yehova ikuyoba nukubomba, ikubomba panongwa ya lughano.

16. Ngimba tukumanya bulebule ukuti tubaghile ukumpilikila Kyala nalinga tuli batulanongwa kangi tukwikala nkisu ikibibi?

 ¹⁶ Utubalilo tumo kukaya kupepe ukumpilikila Kyala. Tukwikala nkisu ikibibi iki kikulongosiwa na Mohesi. Umwene ikughelaghela ukupangisya abandu ukuti babombeghe imbibi. (1 Yohani 5:19) Tukulondiwa kangi ukuti tulweghe naminong’ono ni finyonywa fyitu ifyabutulanongwa, panongwa yakuti fibaghile ukututolesya ukumpilikila Kyala. (Baroma 7:21-25) Loli ulughano lwitu kwa Yehova lukutukasya ukuti tubombeghe inunu. Umwene ikuketa isi tukughelaghela ukubomba ukuti tumpilikileghe kangi ikututula nu mbepo wake mwikemo. (1 Samueli 15:22, 23; Imbombo Sya Batumiwa 5:32) Mbepo mwikemo ikututula ukukusya utuyilo utu tubaghile ukutupangisya uswe ukuti kuye kupepe ukumpilikila umwene.—Bagalatiya 5:22, 23.

17, 18. (a) Ngimba tukuya pakumanyila isyafiki mu buku ili? (b) Ngimba tukuya pakuyobesania isyafiki mu mutu wa pa nkyeni?

¹⁷ Mu buku ili, tukuya pakumanyila muno tubaghile ukunhobosyela Yehova. Tukuya pakumanyila muno tubaghile ukukongela ifundo syake pa bumi bwitu. Kumbuka ukuti Yehova atikutufimbilisya ukuti tumpilikileghe. Linga tusalile ukumpilikila Kyala, ubumi bwitu bukuya pakuya bununu kangi tukuya nulusubilo ulununu ulwa nkyeni. Kangi ikyakulondiwa fiyo kyo kyakuti linga tukumpilikila Kyala tukunangisya ukuti tunganile.—Keta Amasyu Gha Pabumalilo 4.

¹⁸ Yehova atupele amabyebye ukuti ghatutuleghe ukumanya ifinunu ni fibibi. Linga tukughamanyisya kanunu amabyebye ghitu, ghikuya pakututula ukuti ‘tukongeghe indaghilo syake’. Ngimba amabyebye findu fiki kangi tubaghile ukughamanyisya bulebule? Isagha tukete pa mutu wa pa nkyeni.