Inoghonela ukuti unyambala yumo olongosya igulu lya bandu aba bobuka kumalo uku nayumo uyu endileko lumo. Ku malo agha kuli ilisu ni fipiki ifi fikadumuliwamo. Umwene olongolela tasi ukupanga injila nukupanga mabuliji. Po linga injila yipangiwe ikubabula abandu ukuti bankonge. Isi sifwene itolo na isi Yesu abombile. Yesu ali ngati mpayiniya nongwa yakuti yo atumiwe pa kisu kya pasi ukwighula injila ya kubumi. (Matai 20:28) Amasiku agha abakristu babwanaloli bokonga isi Yesu abombile, bobombela akabalilo kabo umanyisya abangi nukubapanga ukuya bamanyili. (Matai 28:19, 20) Yonongwa bamo bopanga ubupayiniya.

Mfumusi wa kabalilo kosa. Abaketi ba Yehova bosa bobomba imbombo yakufumusya amasyu amanunu. Loli bamo bakwipeleka ubomba ubupayiniya bwa kabalilo kosa. Umwesi ghulighosa abene bobomba imbombo yakufumusya ama awala 70. Ukuti bafwanisye ubomba isi, bamo bochepesyako imbombo syabo ukuti baye na kabalilo kakufumukisya. Bamo bosaliwa ukuti baye Bapayiniya ba padela m’malo agha kulondiwa abafumusi bingi, bofwanisya ama awala 130 lumo ukukinda. Abapayiniya bandu aba bakwikala nubumi bwakusita kulonda ikyuma. Abene bosubila ukuti Kyala obapa ifi bolondiwa pabumi bwabo. (Matai 6:31-33; 1 Timoti 6:6-8) Aba bakabaghila ufwanisya upanga ubupainiya bwa kabalilo kosa bopanga ubupayiniya bwa kabalilo kwa ma awala 30 pamo 50 pamwesi.

Mpayiniya mundu uyu ali nulughano kwa Kyala naku bandu. Ufwana na Yesu nuswe tumenye ukuti abandu bolondiwa umanya ubwanaloli bwa Kyala. (Marko 6:34) Loli uswe tumenye ubwanaloli ubu bungabatula ukuya nu bumi ubununu lino na nkyeni. Ughana abandu ko kukuntula umpayiniya ukumalila ama awala mingi pakufumusya. (Matai 22:39; 1 Batesalonike 2:8) Ifi fikuntula fiyo umpayiniya ukuya wa lusekelo, okasya ulughano lwake kangi oseghelela Kwa Kyala.—Imbombo Sya Batumiwa 20:35.

• Ngimba mpayiniya yonani?

• Ngimba findu fiki fikupangisya bamo ukuya bapayiniya bakabalillo kosa?