Nkabalilo kakunyuma akagulu ka “batumiwa na bakulumba ku Yerusalemu,” kabombagha ukuya kabughatila kakulongosya aka kapangagha indaghilo m’malo mwa bakamu bitu abasaliwa. (Imbombo Sya Batumiwa 15:2) Linga bolonda upanga indaghilo bayobesaniagha nubombela amalemba, nongwa ya kubombela injila iyi Kyala abatulagha ukwendela mwa mbepo wake. (Imbombo Sya Batumiwa 15:25) Momuno bobombela amasiku agha.

Kolongosiwa na Kyala ukuti kabombe ubwighane bwake. Abakamu bitu aba bobomba nkabughatila aka bali nulweke fiyo umanyila amasyu gha Kyala, kangi bamenye muno babaghile ukwamulila amalalusyo aghakufwana ni fundo sya m’masyu gha Kyala. Sabata aliwesa bakwaghana pampene ukuti bayobesanie ifi filondiwa. Ufwana namuno syayilile pabwandilo, amasiku agha tukwambilila ubulongosi bwa m’Baibolo ukwendela m’makalata na kubakamu bitu abakwendela idela. Isi situla ukuti luyepo ulutengano pakati pabandu ba Kyala. (Imbombo Sya Batumiwa 16:4, 5) Akabughatila kakulongosya, kolongosya pambombo ya kupanga amabuku kangi pambombo ya kufumusya kangi bali nimbombo yakuketesya nukusala abakamu ukuya pa mabudindo ghakuleghanaleghana.

Kolongosiwa nu mbepo wa Kyala. Akabughatila aka kosubila ubulongosi ufuma kwa Yehova, Umwene Maka Ghosa na kwa Yesu uyu yo Ntu wa kipanga. (1 Bakorinti 11:3; Baefesi 5:23) Abandu aba bali nkabughatila aka, bakaya ninyinoghono sya kulaghila abandu ba Kyala. Abene, pampene nabasaliwa abinabo, “bo aba bikunkonga Kang’osi [Yesu] kosa kuno ikubuka.” (Ubusetuli 14:4) Abakamu bitu aba bakuti ndagha linga tubiputila pa mbombo yabo inunu iyi bobomba.

• Bo baliku aba bali kabughatila kyakulongosya kunyuma?

• Ngimba Akabughatila kakulongosya amasiku agha kakubwagha bulebule ubulongosi bwa Kyala?