Ndagha fiyo ukuti mwali nakabalilo kakubelenga akabuku aka nubwighane bwakuti mubamanye kanunu Abaketi ba Yehova, m’manye muno tubombela ifindu, numanya muno igulu lya Kyala likwendala. Tuli nulusubilo ukuti akabuku aka kabatulile umanya ukuti uswe yoswe tubomba ubwighane bwa Kyala amasiku agha. Tubakasya ukuti mukindilile umanyila iBaibolo, ubabula abam’nyumba yinu naba mukwangala nabo fyosa ifi mumanyila. Tubakasya kangi ukuti mwiseghe pangomano syitu.—Bahiburi 10:23-25.

Linga mukindilila umanyila isya Yehova, po mukuya pomanya isya lughano ulu umwene ali nalo kumyinu. Mukuya pokasiwa ukuti numwe munangisye ulughano ulu muli nalo kumyake. (1 Yohani 4:8-10, 19) Ngimba mubaghile ukunangisya bulebule ulughano lwinu kwa Kyala pa bumi bwinu? Nongwa yafiki upilikila indaghilo sya Kyala kununu pa bumi bwitu? Findu fiki fibaghile ubatula ukuti mubombeghe ubwighane bwa Kyala pampene nanuswe? Uyu mumanyila nawe iBaibolo abaghile ubatula umwe na bam’nyumba yinu ughagha amansala gha malalusyo agha. Isi sibaghile ubatula mwesa ukuti ‘muye ndughano lwa Kyala . . . nukubwagha ubumi bwa bwila na bwila.’—Yuda 21.