Bo Yesu ali pipi ukufwa, abakolile abafundiwa bake 4 ukuti ayobe nabo. Alipo Peteri, Yohani, Yakobu na Andileya. Akabalilo aka Yesu ayobagha isya kimanyilo kya kwisa kwake, alalusisye atile: ‘Kali ywani untumwa unsubiliwa nu wamahala, uyu mwalafyle wake amwimike pa nyumba yake, ukuti abapeghe abandu ifyakulya bo akabalilo kafikile?’ Ilalusyo ili lyali lyakulondiwa fiyo. (Matai 24:3, 45, NWT; Marko 13:3, 4) Yesu ukuya “Mwalafyale,” ababulile abafundiwa bake ukuti akuya posala abakuti babapeghe aba bakunkonga ifyakulya pakabalilo kake. Ngimba bo baliku aba bakwisa pakuya batumwa?

Kabughatila ka basaliwa aba bakunkonga Yesu. Untumwa uyu ikumanyiwa ukuya Kabughatila Kakulongosya ka Baketi ba Yehova. Akabughatila aka kakutendekesya amabuku ni ngomano nubapa abakristu abinabo. Tukunsubila untumwa unsubiliwa uyu ukuti ‘atuyabileghe ifyakulya pakabalilo kake.’—Luka 12:42.

Bobomba imbombo iyi Kyala abapele. (1 Timoti 3:15) Yesu ampele untumwa unsubiliwa uyu imbombo ingulumba fiyo, uketesya muno igulu lya Yehova likwendela pa kisu kyosa. Bali ni mbombo yakuketesya ifindu ifi igulu lili nafyo, ulongosya imbombo yakufumusya, nutumanyisya ukwendela mfipanga. Tupeliwa ifi tulondiwa pakabalilo kake. Akabughatila aka kotupa ifyakulya pakabalilo kake ukwendela mu ngomano sya kipanga, ingomano inywamu pampene namabuku agha tubombela linga tukufumusya.

Umwene ntumwa nsubiliwa nongwa yakuti, okonga ubwanaloli bwa m’Baibolo kangi obomba imbombo iyi apeliwe iyakufumusya amasyu amanunu. Kangi wamahala nongwa yakuti, ofwanisya upakisya ifindu fya Kristu pa kisu. (Imbombo Sya Batumiwa 10:42) Yehova obatula abandu bingi ukwisa ku gulu lyake kangi akuntula untumwa wake unsubiliwa ukuti afwanisye imbombo yake.—Yesaya 60:22; 65:13.

• Yoywani uyu Yesu alinsalile ukuti abapeghe ifyakulya aba bakunkonga?

• Nongwa yafiki tukuti untumwa uyu nsubiliwa kangi wamahala?