Igulu litu lisosya nukwambilisya amabuku na mabaibolo mamiliyoni mingi kisita kulisya. Tuyenga nutendekesya iNyumba sya Bunyafyale ni nyumba sya beteli. Tutula abambumba sya Beteli, abamishonale nukutula linga abakamu bitu baghene ni ngozi. Lumo mungaswigha ukuti ngimba indalama syobombela fyosa ifi sifuma kughu?

Tutosuma indalama pamo ukwendesya imbale pa ngomano syitu. Nalinga imbombo yitu yakufumusya yilonda indalama nyingi, loli tutosuma indalama ufuma kubandu. Ifinja 100 ifi fyakinda magazini yitu yatile Yehova yo otutula, panongwa iyi tutisa kusumamo siku indalama pamo ubutuli ufuma kubandu.— Matai 10:8.

Imbombo yitu yikwendesiwa ni fyabupe fya bwighane. Bingi bopalisya imbombo yitu yakumanyisya abandu iBaibolo kangi botula mbwighane bwabo. Abaketi ba Yehova bohoboka fiyo ubombela akabalilo kabo, amaka ghabo ni kyuma kyabo pakumbombela Kyala pakisu kyosa. (1 Syambukulu 29:9) Pa Nyumba ya Bunyafyale, m’malo gha ngomano na pangomano inywamu, pakuya amabokosi ghafyabupe ukuti bosa mbwighane bwabo babikengemo ifyapupe fyabo. Indalama isi tukwambilila sitofuma ku bandu abakabi, abingi bafwene nu ndondo unfwilwe wankabalilo ka Yesu uyu asopile utumatambala tubili mu bokosi lya fyabupe. (Luka 21:1-4) “Umundu aliwesa abikeghe kamo,” pambali “muno inoghonile mundumbula yake.”—1 Bakorinti 16:2; 2 Bakorinti 9:7.

Tuli nu lusubilo losa ukuti Yehova akuya pokindilila ukupangisya abandu bandumbula inunu ukuti bampaleghe na ifi bali nafyo pakutula pambombo yakufumusya.— Isya Mbupingamu 3:9.

• Nongwa yafiki igulu litu lileghene ni fipanga fyosa?

• Ngimba ifyabupe fibomba bulebule imbombo?