Ukwanda kunyuma Abaketi ba Yehova bakuya ni fimanyilo fyakukindanakindana. Isukulu syapadela siyapo kwa aba bakufumusya akabalilo kosa ukuti ‘bafwanisye imbombo yabo.’—2 Timoti 4:5.

Sukulu ya Bapayiniya. Aba basalile ubupayiniya bwa kabalilo kosa kwa chinja chimochene bakwitikisiwa ukwingila mu sukulu ya masiku 6 paNyumba ya Bunyafyale yapabupipi. Isukulu iyi, yitula fiyo abapayiniya useghelela kwa Kyala, yibatula ukuya bafumusi banunu kangi nukuya basubiliwa pa mbombo yabo.

Sukulu ya Bafumusi Babunyafyale. Isukulu ya myesi mibili iyi, yumanyisya abapayiniya aba bolonda ubuka pofumusya kumalo kulikosa uko bangatumiwa. Abene boyoba ukuti “Undume une, oko mbuke une” bakunkonga Yesu nfumusi unkulumba uyo akayapo uwofwana nawe. (Yesaya 6:8; Yohani 7:29) Usamila kubuyo ubungi kupangisya umundu uchenja fiyo ubumi bwake nongwa ya kayilo akapya, amalo ni fyakulya fyakukindana na kuno afumile. Lumo bolondiwa kangi umanyila injobelo imbya. Isukulu iyi, yibatula abeghi na bakenja abafinja 23 mpaka 65 ukuti bamanyile ifi fibaghile ubatula pa mbombo yabo yakufumusya. Bomanyila kangi amaluso agha ghabaghile ubatula ukuti Yehova ni gulu lyake likindilile ubabombela.

Sukulu ya Giliyadi. Mu Chihiburi amasyu ghakuti Giliyadi ghong’anamula ukuti ‘Ilibungila lya Buketi.’ Ukwanda apa isukulu ya giliyadi yalyandile mu 1943, abamanyili abakukinda 8,000 bamalisisye ifimanyilo fyabo kangi batumiwe ukuya bamishonale ukufumusya kubandu ba “nkisu kyosa.” (Mbombo Sya Batumiwa 13:47) Bo abamanyili bakwanda bafikile ku kisu kya Peru, kikaliko ikipanga nu nketi aliwesa. Amasiku agha filiko ifipanga fyakukinda 1,000. Apa abamishonale bakandagha ukufumusya ku Japan, baliko Abaketi basita kufika 10. Lino baliko Abaketi abakukinda 200,000. Isukulu ya myesi 5 iyi, bomanyila fiyo amasyu gha Kyala. Abapayiniya bapadela, abakwendela idela, abapabeteli na bamishonale bo bakwitikisiwa ukwingila musukulu iyi. Bobakolela ukuti bakingile isukulu ya Giliyadi ukuti batule pa mbombo yakufumusya pakisu kyosa.

• Ngimba sukulu ya Bapayiniya yitula bulebule?

• Ngimba bobanani aba babaghile ukwingila Isukulu ya Bafumusi Babunyafyale?