IBaibolo liyoba isya magulu mabili gha balongolosi aba bali nimbombo ya kupasikisya ikipanga—‘abakulumba na batuli.’ (Bafilipi 1:1, NWT) Balipo abanyambala bingi aba bobomba imbombo iyi nkipanga kilikyosa. Ngimba mbombonki iyi abatuli ba nkipanga aba bobomba?

Botula abakulumba nkipanga. Abatuli ba nkipanga aba, bali pa bumanyani fiyo na Kyala, basubiliwa, banyambala ba kibonelo ikinunu, kangi bamo balumyana abangi bakusi. Bobomba imbombo isi, sikututula ukuti ifindu fyendeghe kanunu nkipanga. Linga abatuli nkipanga bobomba isi, bikutula abakulumba ukuti babombeghe kanunu imbombo yabo ya kutima nu kumanyisya nkipanga.

Botula pa mbombo isi sibombiwa pakipanga. Abatuli ba nkipanga, bamo bopeliwa imbombo ya kwambilila abandu aba bakwisa pa ngomano. Abangi bopeliwa imbombo ya kuketesya ifyakwimbila, abangi boketesya amabuku, abangi boketesya amakaunti gha nkipanga, abangi boketesya amalo agha ikipanga kikufumusyako. Botula kangi potendekesya iNyumba ya Bunyafyale. Utubalilo tumo abakulumba babaghile ubasuma abatuli nkipanga ukuti batuleghe abakangale. Imbombo yiliyosa iyi abatuli nkipanga bopeliwa, bobomba nindumbula yabo yosa. Ukwiyula kwabo pobomba imbombo isi, kupangisya ukuti abakamu nabalumbu babaghindikeghe.—1 Timoti 3:13.

Bakuya pankyeni unangisya akayilo akanunu. Abatuli ba nkipanga bosaliwa nongwa ya kayilo kabo akanunu namuno bonangisyila ulughano lwabo kwa Kyala. Linga boyoba inkhani pangomano syitu bokasya ulwitiko lwitu. Ukwiyula kwabo pambombo ya kufumusya kutula ukuti nuswe tukindilile ukuya bengo pambombo iyi. Nongwa yakukolelana na bakulumba nkipanga, luyapo ulusekelo nulutengano pakati pitu. (Baefesi 4:16) Linga akabalilo kakindilepo, bamo bakwitikisiwa ukuya bakulumba.

• Ngimba abatuli ba nkipanga bandu baliku?

• Ngimba abatuli aba, botula bulebule ukuti ifindu fyendeghe kanunu nkipanga?