INyumba sya Bunyafyale sya Baketi ba Yehova sikwimila ingamu ya Kyala. Yo nongwa tukwiyula fiyo utula ukuti yibonekeghe kanunu, tuketeghe ukuya lusako lwitu nongwa yakuti utendekesya inyumba isi mbali ya kwiputa kwitu. Aliwesa mwabuke ubomba imbombo iyi.

Tutendekesyengemo pabumalilo bwa ngomano. Linga ingomano simalike abakamu na balumbu botulana utendekesya, ukuti iNyumba ya Bunyafyale yibonekeghe kanunu. Sabata aliwesa tukuya ni siku lyakutendekesya. Unkulumba yumo pamo untuli nkipanga yo olongosya pa mbombo iyi. Abene boketa imbombo isi silondiwa ukuti sibombiwe. Lumo pakuya imbombo yopyaghila, utendekesya imipando, ukolopa, upuputa amabwindo, nubomba imbombo isingi panja linga silipo. Isiku limolyene pa chinja tukuya nimbombo yotendekesya inyumba yosa. Linga tubomba imbombo simo na bana bitu, tubatula ukuti baghaghindikeghe amalo gha kwiputilapo.—Undumbilili 5:1.

Tutulengepo potendekesya ifi fyonangike. Ichinja chilichosa tukuya ni siku limo lyakuketesya amalo ghosa agha gholondiwa utendekesiwa. Amalo agha ghonangike ghotendekesiwa mwanakalinga bo indamyo yikali ukula fiyo. (2 Syambukulu 24:13; 34:10) INyumba ya Bunyafyale iyi yiboneka kanunu yikuya malo manunu ukwiputilapo. Linga tutulapo pa mbombo iyi, tunangisya ulughano ulu tuli nalo kwa Yehova na panyumba yake. (Masalimo 122:1) Abandu boghaghindika amalo agha linga ghoboneka kanunu akabalilo kosa.—2 Bakorinti 6:3.

• Nongwa yafiki tulondiwa utendekesya amalo ghitu ghakwiputilapo?

• Ngimba ikipanga kipanga bulebule ukuti iNyumba ya Bunyafyale yabo yibonekeghe kanunu?