Abandu bingi balekile ubuka pakwiputa kufipanga fyabo, nongwa yakuti abalongosi babo batobamanyisya ubwanaloli bwa Kyala. Nongwa yafiki mulondiwa ukufika pangomano sya Baketi ba Yehova? Findu fiki fibombiwa pangomano syitu?

Tukuya nulusekelo linga tuli pakati pabandu balughano naba bakupakisya abinabo. Nkabalilo kakunyuma, Abakristu babunganagha m’fipanga ukuti bamwipute Kyala, bamanyilagha amasyu ghake nukasania. (Bahiburi 10:24, 25) Ubungana pampene uku, kwabatulagha ukuti bamanye ukuti bali pakati pa bakamu na balumbu. (2 Batesalonike 1:3; 3 Yohani 14) Amasiku agha nuswe tukuya nulusekelo ukonga muno babombelegha.

Tumanyila muno tungakongela ifundo sya m’Baibolo. Ufwana namuno fyayilile nabakristu bakunyuma, abanyambala, abakikulu nabana babunganagha pampene. Abanyambala aba bimikiwe m’fipanga bope bobombela iBaibolo ukumanyisya muno tubaghile ukongela ifundo isi pabumi bwitu. (Ukukumbusya Indaghilo 31:12; Nehemiya 8:8) Pangomano syitu aliwesa akuya mwabuke ukwamulapo nukwimba inyimbo. Ulu lukuya lusako lwitu ukuyobapo isya lusubilo lwitu.—Bahiburi 10:23.

Tukasya ulusubilo lwitu kwa Kyala. Untumiwa Pauli ayobile kukipanga kimo atile: ‘Ngunyonywa ukwisa, . . . Ukuti tusubikisanie ndwitiko ulu tuli nalo twesa une nanumwe.’ (Baroma 1:11, 12) Pangomano syitu tukwangala nukasania na bakamu bitu. Ubomba isi kututula ukuti twikale kanunu ufwana nubumi bwitu bwabukristu.

Mwise musakete mwibene ifi fibombiwa pangomano syitu. Mukwambililiwa, kangi mutolipila indalama. Imbale ya fyabupe nayimo.

• Ngimba ingomano syitu sibombiwa bulebule?

• Ngimba tutuliwa bulebule linga tufika pangomano syitu?