Bo alipipi ukufwa, Yesu ayobile atile: ‘Inongwa inunu isya bunyafyale sisisi, sisakulumbililiwagha nkisu kyosa, ukuti lo luyeghe lusisimikisyo kufikolo fyosa; lelo popapo bwisakwisagha ubumalikisyo.’ (Matai 24:14) Ngimba mukwinoghona ukuti imbombo yakufumusya pa kisu kyosa iyi ngali yabombiwe bulebule? Mwakukonga injila iyi Yesu alyandisye bo ali pakisu kya pasi.—Luka 8:1.

Tukwenda ku nyumba ni nyumba. Yesu abamanyisye abafundiwa bake ukufumusya ku nyumba ni nyumba. (Matai 10:11-13; Imbombo Sya Batumiwa 5:42; 20:20) Abafundiwa bapeliwe amalo ghakuti bakafumusye. (Matai 10:5, 6; 2 Bakorinti 10:13) Ukufwana na bafundiwa, nuswe amasiku agha tukufumusya m’malo ghakukindanakindana agha tupeliwe. Isi situtula ufwanisya ululaghilo ulu Yesu atupele lwa ‘kufumusya kubandu bosa nukusimikisya.’—Imbombo Sya Batumiwa 10:42.

Tufumusya kulikosa kuno abandu baliko. Yesu ali kifwanikisyo kinunu pakufumusya m’malo ghakukindanakindana. Afumusyagha mu mbali mwa sumbi na mfisiba. (Marko 4:1; Yohani 4:5-15) Nuswe tuyobesania nabandu isya masyu gha Kyala kulikosa kuno bakwaghiwa—m’misebo, m’misika na m’mapaki, kangi bamo tubimbila ifoni. Tufumusya kubapalamani bitu, kusukulu, aba tubomba nabo imbombo na bakamu bitu linga ulusako lwaghiwe. Injila syosa isi situtulile fiyo ukuti abandu pakisu kyosa bapilike ‘amasyu amanunu gha bupoki’—Masalimo 96:2.

Ngimba alipo yumo uyu mukwinoghona ukuti mubaghile ukumbulako amasyu amanunu gha bunyafyale bwa Kyala na ifi ubunyafyale ubu bwisa kubomba pabumi bwake? Komma ukufisa isi mumanyila, babulako abininu mwanakalinga muno mungafwanisyila!

• Ngimba masyu manunu ghaliku agha gholondiwa ukufumusiwa?

• Ngimba Abaketi ba Yehova bokonga bulebule injila sya Yesu syomanyisyila?