“Mukulondiwa ukuya bamanyisi.” (Hib. 5:12 NWT) Inong’onela itolo! Yehova uyu yo M’manyisi nkulumba nkipeliwa kyosa ikutusuma ukuti tubatuleghe abandu ukum’manya. Ukubamanyisya abangi ubwanaloli bwa Yehova mumbumba, nkipanga pamo mubufumusi, lusako lwa pamwanya fiyo kangi mbombo nywamu. Ngimba tubaghile ukufwanisya bulebule?

Ansala ikwaghiwa m’masyu agha Pauli alindembile Timoti ukuti: “Kindilila ukubelenga pa kilundilo, ukukasya nukumanyisya.” Pauli alyongelile ukuti: “Linga kubomba bo bunobuno, po kwisakwipokagha wimwene kangi kwisakubapokagha naba bikukupilika.” (1 Tim. 4:13, 16 NWT) Muli na masyu aghakupoka ubumi aghakuti mughafumusye. Polelo kununu ukwiyipa ukuti mubelengeghe nu kumanyisya kanunu. Ibulosha ili lipangiwe ukuti libatule ukubomba isi. Inong’onela ifindu ifi.

Yehova yo “M’manyisi Nkulumba.” (Yes. 30:20) Nalinga ibulosha ili likuya pakubatula ukuti mubelengeghe nu kumanyisya kanunu, loli mungibwagha ukuti Yehova yo mwene mbombo iyi kangi yo ikubakwaba abandu. (Yoh. 6:44) Polelo, akabalilo kosa munsumeghe ukuti abapeghe mbepo wake mwikemo ukuti ghubatuleghe. Mubombeleghe Ibaibolo utubalilo tosa. Munsubileghe Yehova komma mwibene. Mwiyuleghe ukubatula aba mukuyoba nabo ukungana Yehova.

Mupeliwe ulusako lwa kumanyisya abandu amasyu ghakulondiwa fiyo. Tuli nulusubilo ukuti linga mukusubila “amaka agha Kyala ikupa,” mukuya pakufwanisya.—1 Pet. 4:11.

Tuli bamanyisi bininu,

Kabughatila Kakulongosya ka Baketi ba Yehova