Abapapi bohoboka linga umwana apapiwe. Loli ifindu fikusintha, imbombo yakulela umwana yikuya nywamu. Akabalilo kinu akanywamu namaka ghinu fimalikila pa kulela umwana. Akabalilo kakughona utulo kakuya kanandi, ukwinoghona kope kukusintha. Ifi fibaghile ukusintha ulughano lwinu m’nyumba. Tata na mama mulondiwa ukusintha ifindu fimo ukuti mutulaneghe pakulela umwana, kangi ukuti mukindilile ukuya nulughano ulu mwali nalo. Ngimba ifundo sya m’Baibolo sibaghile ukubatula bulebule?

ISI IBAIBOLO LIKUYOBA: ‘Ulughano lufisalyoyo kangi lololo.’ Ulughano ‘lutikulonda utwake twene, lutikusila ilyoyo.’ (1 Bakorinti 13:4, 5) Aliwesa ukuya mama otangwanika nimbombo yakulela umwana. Loli mungibwagha ukuti undume winu alipo, yope olonda ukuti mwangale nawe. Ukuya bafisalyoyo kangi bololo kubaghile ukutula ukuti undume winu amanyeghe ukuti wakulondiwa fiyo. Isi sibaghile ukubatula ukuti mutulane ukulela umwana.

‘Mwebanyambala muyeghe bamahala bo mukutughala na bakasi binu.’ (1 Peteri 3:7) Mumanyeghe ukuti unkasi winu ali nimbombo nywamu yakulela umwana uyu apapiwe. Nongwa ya mbombo iyi, lumo abaghile ukwanda ukutamiwa inyinoghono, nukupilika ubukatale. Lumo abaghile ukuya nkali kumyinu, loli mungaghomolagha ubukali. “Umundu untengamoyo yo nnunu ukukinda nu mfumuke mbwite.” (Isya Mbupingamu 16:32) Muyeghe bamahala kangi muntuleghe unkasi winu.—Isya Mbupingamu 14:29.

ISI MUBAGHILE UKUBOMBA:

• Mwebatata: Mubatuleghe abakasi binu ukulela abana nalinga popakilo. Muye nakabalilo akanywamu akakwangala nu nkasi winu pampene nu mwana winu

• Mwebamama: Linga tata olonda ukubatula ukuti amupwelelele umwana, mwitikeghe. Mungayagha bakali linga tata atamanya umupwelelela kanunu umwana, loli mumbule muno abaghile ubombela

ISI IBAIBOLO LIKUYOBA: ‘Bakwisa kuyagha mbili ghumowene.’ (Ubwandilo 2:24) Umwana uyu apapiwe aleke ukupangisya ukuti mwibwe ukuti muli ‘mbili ghumowene.’ Mubombeghe ifindu ifi fibaghile ukubatula ukuti ulughano lwinu lukindilile ukuya lwamaka.

Mwebamama mutighi ndagha linga undume winu akubatula. Ndagha winu abaghile ukuya nkota ku ndume winu. (Isya Mbupingamu 12:18) Mwebatata muyobeghe ku bakasi binu isya lughano ulu muli nalo kumyabo. Numwe muyobeghe ukuti ndagha pa mbombo iyi mama akubomba pakaya.—Isya Mbupingamu 31:10, 28.

‘Umundu aliwesa angasilondagha isyake syene loli nisya yungi.’ (1 Bakorinti 10:24) Akabalilo kalikosa mubombeghe ifi finunu ku nkasi winu pamo ndume winu. Muyeghe nakabalilo kakuyobesania, ukupilikisya nukuti ndagha ku nkasi winu pamo ndume winu. Pa nkhani yakughonana mwinoghonelaneghe. IBaibolo likuti: ‘Mungakananagha, pene apa linga mwitikene.’ (1 Bakorinti 7:3-5) Inkhani iyi yikulonda muyobesanieghe mwebabili. Ubololo nukupilikisania kubaghile ukubatula ukuti ubweghi bwinu buye bwamaka.

ISI MUBAGHILE UKUBOMBA:

• Muyeghe nakabalilo kakwangala pampene mwebabili

• Mubombeghe ifindu ifi fibaghile ukunangisya ulughano. Ukuntumila imeseji pamo ukumpa ifyabupe kubaghile ukutula

ISI IBAIBOLO LIKUYOBA: ‘Ukufuma mbukeke ughamenye amasimbo amikemo, agha ghabaghile ukukupa amahala ghakwisa kuponela.’ (2 Timoti 3:15) Mwitendekesye nganila isi mukwisa kubomba polela umwana winu. Umwana aliwesa akuya namahala ghakumanyilila ifindu nalinga akali atapapiwa. Bonda abaghile ughamanya amasyu ghinu. Abaghile kangi ukumanya linga mukalele nalinga muhobwike. Mwande ukumubelengela bo mwana. Bwanaloli ukuti umwana atabaghila ukupilikisya ifi mukubelenga loli fibaghile ukwisa kuntula linga akulile ukuya nulweke lwa kubelenga.

Muyobeghe nawe isya Kyala nalinga akali atakula. Linga mukwiputa kwa Yehova yope apilikeghe. (Ukukumbusya Indaghilo 11:19) Nalinga mukwangala nawe muyobeghe nawe isya fipeliwa fya Kyala. (Salimo 78:3, 4) Linga okula omanya ukuti munganile Yehova, yope abaghile ukwisa kungana Yehova.

ISI MUBAGHILE UKUBOMBA:

• Mwiputeghe kwa Kyala ukuti abape amahala ghakulelela umwana winu

• Mwandisanieghe amasyu linga mukum’manyisya umwana winu ukuti amanyile mwanakalinga