Apa tukwanda ikyinja kya 2023, tuli nulusubilo ukuti ifindu ifinunu fikuya pakubombiwa kwa uswe na ba mumbumba yitu. Nongwa yafiki tukulondiwa ukuya nulusubilo ulu?

 Ibaibolo likuyoba isya masyu amanunu aghakuti indamyo isi tukwaghana nasyo lino sikuya pakumalika. Ibaibolo ‘lyasimbiwe ukuti luyeghe lumanyisyo kumyitu ukuti tuyeghe nulusubilo . . . na ndusubisyo lwa mmasimbo.’—Baroma 15:4.

•    Ukuti mumanye nyingi isya isi Ibaibolo lifingile, belenga inkhani yakuti “Ulusubilo Ulwakuti Nkyeni Ifindu Fikuya Pakuya Kanunu.”

 Ulusubilo lwa mu Baibolo “luli bo yi nyangula ya moyo.” (Bahiburi 6:19) Ulusubilo lubaghile ukupangisya indumbula ukuya nulutengano. Lubaghile ukututula ukwifimbilisya kundamyo isi tukwaghana nasyo, lubaghile ukututula ukuti tufiketeghe kanunu ifindu kangi tubaghile ukulwagha ulusekelo ulu lukabaghila ukumalika. Mwakifwanikisyo:

•    Keta muno Ibaibolo lyalintulile unnyambala yumo uyu ali nakayilo akabibib. Ketelela ividiyo iyakuti Nkhavuka na Nkharo Yane Yawakawaka.

•    Keta muno Ibaibolo libaghile ukututulila linga unganiwa witu afwile. Ketelela ividiyo iyakuti Mubasubisyeghe aba Bikulila.

 Abandu bingi bikughulila ukuti ifindu ifinunu fikuya pakubombiwa, loli batikusubila nindumbula yosa ukuti fibaghile ukubombiwa. Loli isi Ibaibolo lifingile sikindene fiyo namuno abandu bikwinong’onela? Nongwa yafiki tukuyoba bo ulu? Tukuyoba bo ulu panongwa yakuti isi Ibaibolo lifingile syakufuma kwa Yehova Kyala a “uyu akabaghila ukutungulupa.” (Titi 1:2) Yehova mwene yo ali namaka ghakufwanisya syosa isi afingile; umwene ikubomba ‘syosa isi sinkyelile ukubomba.’—Salimo 135:5, 6.

 Tukubakasya ukuti amumanyile isyakufwana nulusubilo lwa mu Baibolo. Mubaghile ukukasya ulusubilo lwinu mu isi Ibaibolo lifingile “mwakughenesya amasimbo bwila itolo.” (Imbombo sya Batumiwa 17:11) Tukubasuma ukuti mwande ukumanyila Ibaibolo kisita kulipila Nunketi yumo wa Yehova. Amwande ikyinja kya 2023 nulusubilo ulununu ulwa nkyeni.