Abandu banandi itolo amasiku agha bo aba bikubomba ifindu mwalughindiko. Abandu ababine bikubumanila fiyo abadokotala; abandu aba bikulya ifyakulya mmalesitilanti batikubaghindika abandu aba bikupiya nukubapa ifyakulya mmalo agha; abandu aba bikukwela indege bakali kangi bikubabombela ifindu ifibibi abandu aba bikubomba imbombo mundege; abana bikubomba ifindu ifibibi fiyo kusukulu mwakubanyoza abinabo, ukubatilisya nukubasambukila abamanyisi babo; abandyali bamo bikubomba ifindu ifyakukosya isoni kangi bamo bikughelaghela ikwiyoba muno bayilile banunu.

 Ibaibolo lili nubulongosi ubununu ubwa muno tubaghile ukuyila nutuyilo utununu. Kangi likulingania inongwa iyi amasiku agha utuyilo utununu natumo.

 Ukughindikana ko kayilo akanunu kangi abandu bikuhoboka nako. Loli fikunangisya ukuti abandu batikughindikana pakisu kyosa.

•   Ukufwana na isi bafufuzile mwalululu aba Gallup poll, abandu ba ku American bayobile ukuti utuyilo utununu ku United States tunandi fiyo ukukinda muno fyayilile kunyuma ifyinja 22 ifi fikindile.

•   Ukufufuza ukungi uku kwabombiwe, abandu abakukinda 32,000 aba balalusiwe mfisu 28, 65 pelesenti ya bandu bayobile ukuti utuyilo utununu amasiku agha tuyongile fiyo kubandu ukukinda kunyuma kosa uku.

 Ibaibolo lyayobile ngani utuyilo utu tukutuketa amasiku agha.

•   “Mmasiku ghakubumalikisyo, twisakwisagha utubalilo utupalapala. Abandu bisakwiyighanagha bene, bisakuyagha baghanandalama, balwitufyo, bamatingo, batukamahelu, bilabapapi, basitakuwa ulupi, basitabwikemo, . . .  basitakwighomola, [kangi] bakali.”—2 Timoti 3:1-3.

 Ukuti mumanye nyingi isyamuno ubusololi ubu bukufwanilisiwa, belenga inkhani iya mutu wakuti “Ngimba Ibaibolo Lyayobile Ngani Isyamuno Abandu Bisakwinong’onelagha nu Kubombela Ifindu Amasiku Agha?”

 Nkisu iki utuyilo utununu tukumalika, abandu bingi baketile ukuti Ibaibolo lili nubulongosi ubununu fiyo ubu bubaghile ukubatula ukuti baye nutuyilo utununu. Ubulongosi bwake “bwimikiwe ukuyako bwila na bwila.” (Salimo 111:8) Keta ififwanikisyo finandi itolo ifi:

•   Isi Ibaibolo likuyoba: “Lelo syosa isi mukulonda ukuti abandu bababombeleghe, syo mubabombeleghe sisyo nanumwe.”—Matai 7:12.

   Isi sikusanusya ukuti: Tubabombeleghe abangi mwakisa na ndughindiko, bo muno tubaghile ukulondela ukuti batubombeleghe.

•   Isi Ibaibolo likuyoba: “Bunobuno lelo amubutagheghe ubutungulu, mwesa muyobeghe ubwanaloli.”—Baefesi 4:25.

   Isi sikusanusya ukuti: Tukulondiwa ukuya babwanaloli mu syosa isi tukuyoba nukubomba.

 Ukuti mumanye nyingi isya nkhani iyi, tukubasuma ukuti mubelenge:

•   Ingasya ya Ndindilili iyi yili numutu wakuti “Ngimba Findu Fiki Fibaghile Ukututula Ukumanya Inunu Nimbibi.”

•   Inkhani iyakuti “Kasi Baibolo Lingatovwira Wuli Kuti Tizizipizgiranenge?