Pa Januwale 24, 2023, abasayansi bakaghutile pankyeni akabalilo aka kikunangisya ubumalilo bwa kisu iki aka kikukoleliwa ukuti Doomsday Clock. a Akabalilo aka bakaghutile pankyeni ukuti kafwane 12 koloko pakilo, ukusanusya ukuti ikisu kyapasi kisyele panandi ukumalika.

•   “Akabalilo aka bikuti ‘Doomsday Clock’ kikwimila ifindu fyakutilisya ifi abandu bikupanga ifi fibaghile ukupangisya ukuti bipyute bene. Pakibili abasayansi bakaghutile akabalilo aka pabupipi fiyo ukuti kafike pa 12 koloko pakilo ukukinda muno kayilile kunyuma uku. Babombile bo ulu panongwa yafindu ifi fikubombiwa nkisu bo ubwite bwa ku Ukraine, ubwite bwa nyukiliya ubu bubaghile ukubombiwa kangi panongwa yandamyo yakuchenja kwa kabalilo.”—AFP International Text Wire.

•   “Pakibili abasayansi bafumbwile ukuti akabalilo aka kikukoleliwa ukuti ‘Doomsday Clock’ bakaghutile kangi pankyeni, kusyele itolo amasekondi 90 ukuti yifwane 12 koloko pakilo. Akabalilo aka kaseghelile fiyo ukuti armagedoni yibombiwe.”—ABC News.

•   “Igulu lya basayansi abakufuma mfisu ifyakukindanakindana bayobile ukuti ubumi bwa bandu buli pangozi fiyo ukukinda kunyuma kosa uku.”—The Guardian.

 Ngimba ubumalilo bwa bandu ni kisu kyapasi iki buli pipi fiyo ukumalika? Ngimba tukulondiwa ukutila ifindu ifi fikuya pakubombiwa nkyeni? Ngimba Ibaibolo likuyoba isyafiki?

 Ukufwana na isi Baibolo likuyoba, “ikisu kyo kili bo mumo kyayilile” kangi bisakuyangako abandu aba “bisakwitughala mumo bwila na bwila.” (Undumbilili 1:4; Salimo 37:29) Isi sikunangisya ukuti abandu bakabaghila ukukipyuta ikisu.

 Loli Ibaibolo likuyoba isyakumalika kwa kisu. Mwakifwanikisyo, likuyoba ukuti “ikyene ikisu kyo kikuyonga.”—1 Yohani 2:17.

•   Ukuti mumanye isi Ibaibolo likusanusya linga likuyoba isyakumalika kwa kisu, belenga inkhani iyakuti “Ngimba Ikisu Kikwisa Pakupyutiwa? Ngimba Ibaibolo Likuyoba Ukuti Ifindu Fyosa Fikwisa Pakupyutiwa?”

•  

 Ibaibolo libaghile ukututula ukufiketa kanunu ifindu nalinga pakabalilo aka silipo indamyo nyingi nkisu iki. Libaghile ukututula bulebule?

•   Ibaibolo likutupa ubulongosi ubu bubaghile ukututula pabumi bwitu ubwa isiku ni siku. (2 Timoti 3:16, 17) Mwakifwanikisyo, belenga inkhani iyakuti “Muno Mubaghile Ukubombela Ukuti Muleke Ukwiyaya Fiyo” ukuti mukete muno Ibaibolo libaghile ukubatulila ukuti mufiketeghe kanunu ifindu nalinga mukwaghana nindamyo.

•   Ibaibolo likuyoba ifindu fingi ifi fikuya pakubombiwa nkyeni. (Baroma 15:4) Likulingania kanunu ifi fikubombiwa lino kangi ifi fisakubombiwa nkyeni, ifi fikututula ukukindilila ukufiketa ifindu kanunu nalinga nkisu mukubombiwa ifindu ifibibi.

 Ukuti mumanye nyingi isyakufwana ni Baibolo, tukubasuma ukuti amwande ukumanyila Ibaibolo kisita kulipila lino.