Ngimba mukwinong’ona isyafiki linga mukupilika amasyu aghakuti “ukupyutiwa”? Mubaghile ukwinong’ona isya konangika kwa kisu kyosa pamo ukupyutiwa kwa fya bumi fyosa pa kisu. Abandu bamo bikusubila ukuti isi sikwisa pakubombiwa, fiyofiyo linga bikubelenga inkhani isyakukongapo isi:

•   “Sikunangisya ukuti ubwite bwa nyukiliya bubaghile ukwanda. Ubwite ubu bubaghile ukwanda panongwa yakwighana itolo, mwangozi pamo panongwa ya kuleka ukupilikana kwa bandu.”—Bulletin of the Atomic Scientists.

•   “Mfyinja 10 ifi fikindile kubombiwe ingozi nyingi isyakipeliwa, bo umbelo unnywamu, umoto ughu ghukokya amatengele, ululanga, ukonangiwa kwa fya bumi ifi fili m’misi, ukokya fiyo kwa kisu nu kuteka kwa misi.”—National Geographic.

•   “Amapalalila ghikonanga fiyo ifindu ku Africa ukukinda kunyuma kosa uku.”—The Associated Press.

 Ngimba ikisu kikwisa pakupyutiwa? Ngimba Ibaibolo likuyoba isyafiki pa nkhani iyi?

 Hayi. Amasyu gha Kyala ghikutusimikisyila ukuti ikisu kikuya pakuyapo kwa bwila na bwila. (Undumbilili 1:4) M’malo mwakonanga ikisu iki akipelile, Kyala ‘ikwisa pakubapyuta aba bikukipyuta ikisu.’—Ubusetuli 11:18.

 Mwakufwana na isi Ibaibolo likuyoba “ikisu” iki kikuya pakupyutiwa bo bandu aba batikumpilikila Kyala kangi bikubomba ifi bikulonda. Bo muno Kyala abombile m’masiku gha Nowa, ikuya pakubapyuta bandu ‘aba batikuntila Umwene.”—2 Peteri 2:5; 3:7.

 Pa 1 Yohani 2:17 pikuyoba ukuti, “ikisu kyo kikuyonga nifinyonywa fyake.” Ivesi ili likunangisya ukuti Kyala atisakonanga ikisu ikyapasi iki, loli abandu aba bikukindilila ukubomba imbibi.

 Ibaibolo litikuyoba akabalilo aka ubumalilo bukuya pakwisilagha. (Matai 24:36) Loli likunangisya ukuti ubumalilo buli pabupipi fiyo. Ibaibolo lyayobile ngani ukuti ifindu ifyakukongapo ifi fisakubombiwagha linga ubumalikisyo buli pipi:

•   Ifindu bo ubwite, injala, imbungo isyakwambukila nu tusenyenda fisakubombiwagha “mbuyo bu bwingi.”—Matai 24:3, 7, 14; Luka 21:10, 11; Ubusetuli 6:1-8.

•   Abandu bingi bisakwiyighanagha bene. Mwakifwanikisyo abene, bisakuyagha “baghanandalama,” “basita kuwa ulupi,” kangi “bakali.”—2 Timoti 3:1-5.

 Abandu bingi bikwitikisya ukuti ukwanda itolo nkyinja kya 1914, ifindu ifi fikubombiwa fikukolelana fiyo na ifi Ibaibolo lyayobile ngani ukuti fisakuya fimanyikilo fyakuti ubumalilo buli pipi. Ukuti mumanye nyingi keta inkhani isyakuti “Kasi Baibolo Likuti Wuli pa Nkhani ya Chaka cha 1914?” kangi ni yakuti “Kasi Chimanyikwiro cha ‘Mazuŵa Ghaumaliro,’ Panji Kuti ‘Nyengo Zaumaliro Ntchivichi’?”

 Ibuku ilya Ubusetuli likuyoba isya masyu aghakuti ‘ukubonekela kwa Mwalafyale Yesu.’ Ukubonekela uku kwisakubombiwa pakabalilo aka Yesu uyu ikuyobiwa ukuti yo uyu ali na maka aghakusosyapo ifindu fyosa ifibibi pa kisu apa nu kubasaya aba bikumbombela Kyala.—2 Batesalonike 1:6, 7; 1 Peteri 1:7, 13.

 Ibuku ilyabumalilo ilya mu Baibolo likumanyiwa ukuti A·po·kaʹly·psis mu Kigriki pamo ukuti Ubusetuli panongwa yakuti likufumbula ifindu ifi fisakubombiwa nkyeni. (Ubusetuli 1:1) Ibuku ili lili na masyu amanunu kangi likutupa ulusubilo. (Ubusetuli 1:3) Likunangisya ukuti Kyala isakusosyapo ubusitabugholofu nu kuchenja ikisu iki ukuya paladaiso. Pakabalilo ako, abandu batikuya pakupilikagha kangi ifyakubaba, ukutamiwa pamo ukufwa.—Ubusetuli 21:3, 4.

 Ngimba mubaghile ukulonda ukuti mumanye nyingi isyakufwana ni findu ifinunu ifi Ibaibolo lifingile? Abaketi ba Yehova bikumanyila Ibaibolo na bandu kisita kulipila. Mubaghile ukubasuma ukuti mwande ukumanyila nabo Ibaibolo?