Abandu bingi, ukongelelapo na bangi aba bikuti Bakristu, bikuketa ukuti ifundo inunu isya mu Baibolo isyakufwana nukughonana nu bweghi sitikubomba kangi imbombo. Amatchalichi ghamo ghachenjile isi ghikumanyisya pa nkhani ya ikinunu ni kibibi, ukuti fikolelane na muno ifindu fiyilile amasiku agha. Ngimba ifundo sya mu Baibolo pa nkhani ya ikinunu pamo ikibibi sikali sikubomba imbombo amasiku agha? Ena. Keta ififukwa ifi tukuyobela bo ulu.

 Twe bandu tupeliwe ukuti tulongosiweghe nu Mpeli witu. Ibaibolo likuti: “Umundu akabaghila ukutalula munjila iyi ikwendamo.” (Yeremiya 10:23) Nalinga ukuti Yehova a Kyala atupelile munjila iyakuti tusaleghe twibene ifindu, loli akatupa ubulaghili pamo amaka aghakuti tusaleghe twibene pa nkhani ya ikinunu pamo ikibibi. Polelo ikulonda ukuti tunsubileghe umwene.—Isya Mbupingamu 3:5.

 Mu Baibolo mo muno tukusyagha ifundo inunu isi tukulondiwa ukusikonga isyakufuma kwa Kyala. Isagha tuyobesanie ififukwa fibili ifi fikunangisya ukuti ifundo isi syakulondiwa fiyo.

•   Kyala yo uyu atupelile. (Salimo 100:3) Pakuya Mpeli witu, Yehova Kyala ikumanya kanunu ifi tukulondiwa naloli ukuti tuye nu bumi ubununu bwa mwambepo nu bwakumbili kangi ukuti tuye balusekelo. Umwene ikumanya indamyo isi tukwaghana nasyo linga tubaghile ukuleka ukukonga ifundo syake inunu. (Bagalatia 6:7) Mwakongelelapo, Yehova ikulonda ukuti uswe tuye nu bumi ubununu. Yonongwa yake Ibaibolo likulingania ukuti Kyala yo uyu “ikubamanyisya umwe ukuti muyeghe bandu banunu, uyu ikulonda ukubalongosya umwe munjila iyi mubaghile ukwendamo.”—Yesaya 48:17.

•   Ifinyonywa fyitu fibaghile ukutusofania. Abandu bingi bikuketa ukuti babaghile ukusala bene ikinunu pamo ikibibi mwakukonga itolo isi indumbula yabo yikulonda. Loli Ibaibolo likuti “indumbula ya mundu nsyobi fiyo ukukinda fyosa, kangi yiswile nubuniongafu.” (Yeremiya 17:9) Linga indumbula yitu yitikulongosiwa na mahala gha Kyala, yibaghile ukutupangisya ukubomba ifindu ifi panyuma pake tubaghile ukudandabula nafyo.—Isya Mbupingamu 28:26; Undumbilili 10:2.

 Hayi! Ibaibolo likumanyisya ubwanaloli pakuyoba isya Kyala nu tuyilo utu umwene ikulonda ukuti uswe tuye nato. (1 Bakorinti 6:9-11; Bagalatia 5:19-23) Umwene ikulonda ukuti abandu babumanye kanunu ubwanaloli. (1 Timoti 2:3, 4) Polelo, abalongosi ba matchalichi gha Bukristu bikulondiwa ukubamanyisya abandu isi Amasyu gha Kyala ghikuyoba.—Titi 1:7-9.

 Abandu bingi batikulonda ukupilikila ifundo inunu isi sili mu Baibolo, mmalo mwake bikubuka ku balongosi ba matchalichi ukuti “bababule isi bikulonda ukupilika.” (2 Timoti 4:3 NWT, amasyu gha pasi) Loli Amasyu gha Kyala ghikutusoka ukuti “Ubutolwe kuli umwe, mwe mukusiyoba imbibi mukuti bo bununu, syope ninunu mukusiyoba ukuya mbibi.” (Yesaya 5:20) Kyala isakubalonga abalongosi ba matchalichi aba batikubamanyisya abandu isi Kyala ikuyoba pa nkhani ya ikinunu ni kibibi.

 Hayi. Aba bikulonda ukunhobosya Kyala bikukonga ikifwanikisyo kya Yesu Kristu na isi amanyisyagha. Yesu abamanyisye aba bankongagha ukuti batikulondiwa ukubalonga abangi, mmalo mwake bikulondiwa ukubaghana nu kubapa ulughindiko abandu bosa.—Matai 5:43, 44; 7:1.

 Yesu abamanyisye aba bankongagha ukuti babombeleghe imbombo ifundo sya Kyala pabumi bwabo. Abamanyisye kangi ukuti bikulondiwa ukwitikisya ifundo iyakuti abandu bamo babaghile ukusala ifundo isi bikulonda ukusikonga pabumi bwabo. (Matai 10:14) Yesu akabitikisyepo abamanyili bake ukuti babombeleghe imbombo indyali pamo injila iyingi yiliyosa ukuti babafimbilisye abangi ukupilikila ifundo sya Kyala.—Yohani 17:14, 16; 18:36.

 Bosa aba bikughelaghela ukukonga ifundo sya Kyala pa nkhani ya iki kinunu ni kibibi bikuya balusekelo lino kangi mu nkyeni bisakusayiwa fiyo. (Salimo 19:8, 11) Keta simo mwa isi bikusayiwa nasyo lino:

•   Bikuya balusekelo.—Isya Mbupingamu 29:6.

•   Bikuya pabumanyani ubununu na Kyala.—Isya Mbupingamu 3:32.

•   Kyala ikubatula nkabalilo ka butolwe.—Isya Mbupingamu 11:8.

•   Bisakwikala nu bumi bwa bwila na bwila pa kisu kyapasi.—Salimo 37:29.