Linga umundu imbombo yimmalikile abaghile ukwaghana nindamyo inywamu fiyo, ukutamiwa ukubapwelelela aba mumbumba yake kangi abaghile ukutamiwa aminong’ono. Linga mukulimbana nindamyo iyi, ifundo sya mu Baibolo isyakukongapo isi sibaghile ukubatula.

•   Mubabuleghe abangi muno mukwipilikila.

   Isi Ibaibolo likuyoba: “Ummanyani wa naloli yo mundu uyu ikunangisya ulughano bwila.”—Isya Mbupingamu 17:17.

   Linga imbombo yibamalikile, mubaghile ukusulumania, ukukalala, pamo ukusofanisiwa naminong’ono lumo mubaghile ukuketa ukuti muli bakutoliwa. Linga mukubabula aba mumbumba yinu na bamanyani binu muno mukwipilikila, babaghile ukubatula ukuti mwande kangi ukwipilika kanunu. Babaghile ukubapa kangi ubulongosi ubu bubaghile ukubatula ukuti muyaghe imbombo iyingi.

•   Mwepukeghe ku findu ifi fibaghile ukubapangisya ukuti mwiyayeghe.

   Isi Ibaibolo likuyoba: “Komma lelo ukwiyaya isya kilabo, buno ilya kilabo likwiyayila lyene.”—Matai 6:34.

   Ibaibolo likutukasya ukuti tupangeghe ipulani ya nkyeni. (Isya Mbupingamu 21:5) Loli, likutukasya kangi ukuti tungiyayagha fiyo nisya nkyeni. Tubaghile ukwanda ukwiyaya fiyo nifindu fimo ifi lumo fikabaghila ukubombiwa. Kununu fiyo ukubika aminong’ono ghitu pa findu ifi tubaghile ukufwanisya pisiku ilyo.

   Ibaibolo likutupa kangi ubulongosi bwa mahala ubwamuno tubaghile ukwifimbilisyila kundamyo silisyosa isi tubaghile ukwaghana nasyo. Ukuti mumanye nyingi, belenga inkhani iyakuti “Ivyo Mungachita Para Mukusuzgika Maghanoghano.”

•   Mubombeleghe kanunu indalama syinu.

   Isi Ibaibolo likuyoba: “Namanga nisibile . . . napa linga fikelilwe itolo napa linga nikwaghilwa.”—Bafilipi 4:12.

   Mukulondiwa ukubomba ifindu namuno ifindu fiyilile. Isi sikongelela ukuchenja muno mwabombelagha nindalama isi mwasyaghagha. Muyeghe maso ukuti muleke ukuya ningongole isi sitikulondiwa.—Isya Mbupingamu 22:7.

   Ukuti mumanye nyingi isyamuno mubaghile ukubombela nindalama isi muli nasyo, belenga inkhani iyakuti “Isi Mubaghile Ukubomba Ukuti Mwikaleghe Ubumi Ubusita Kulonda Fingi.”

•   Mubombeleghe kanunu akabalilo kinu.

   Isi Ibaibolo likuyoba: “Amahala ghayengeko bo mukwangala nabapanja akabalilo kinu kosa kayeghe ka mbombo.”—Bakolosi 4:5.

   Nalinga ukuti lino mukaya nimbatiko yakubuka ku mbombo, loli mubaghile ukukindilila ukubombela kanunu akabalilo kinu. Ukubomba isi kukuya pakubatula ukuti muyeghe naminong’ono amanunu kangi mwipilikeghe kanunu.

•   Muchenjeghe apa pikulondiwa ukuchenja.

   Isi Ibaibolo likuyoba: “Umundu uyu linga ikwiyula atikupondwano siku.”—Isya Mbupingamu 14:23.

   Mubombeghe imbombo iyi yibaghile ukwaghiwa nalinga yibaghile ukukindana na iyi mwabombagha pakwanda. Isi sikongelelapo ukubomba imbombo isi sikuboneka ukuya syapasi pamo isi mubaghile ukwambilila indalama nnandi ukukinda imbombo iyi mwabombagha pakwanda.

•   Amwiyuleghe

   Isi Ibaibolo likuyoba: “Ubyaleghe imbeyu yako nulubunju kangi namayolo, ukabaghila ukumanya linga yosa itolo yisakukula bununu, pamo linga yimo yisakwela ukuyikinda inine.”—Undumbilili 11:6.

   Amukindilileghe ukulonda imbombo. Mubabuleghe abangi ukuti mukulonda imbombo. Mubaghile ukubabula abakamu binu, abamanyani binu, aba mwabombagha nabo imbombo na bapalamani binu. Kangi mubaghile ukulalusya ifya lusako lwa mbombo ku makampani agha ghikuketesya ifya mbombo, ukuketa ifikwangwani fya mbombo, inyuzipepala pamo mubaghile ukuketa mmawebusayiti gha makampani aghakukindanakindana. Muyeghe bakwitendekesya ukupanga amaintavyu ku malo aghakukindanakindana, kangi mulembeghe abakalata bingi abakulonda imbombo.