Pa 19 Meyi, 2022, akabughatila ka United Nations Security Council kalyambilile ilipoti ukufuma ku bandu aba bali na mabudindo aghapamwanya ukuti, “indamyo ya fyakulya pa kisu kyosa iyi yali nywamu panongwa ya mbungo ya COVID-19 nu kuchenja kwa kabalilo, lino indamyo iyi yongelile fiyo panongwa ya bwite ubu bukubombiwa ku Ukraine.” Ukufuma apo, uyu ikuketesya muno ikyuma kikwendela atile, “ubwite ubu bukongelela itolo indamyo nyingi isi sili nkisu iki kangi abandu bikuya pakutamiwa fiyo ni njala.” Ibaibolo lyayobile ngani ukuti mmasiku aghakubumalikisyo kwisakuya indamyo ya fyakulya, kangi likututula muno tubaghile ukwifimbilisyila ku ndamyo iyi.

•    Yesu ayobile ngani ukuti: “Ikikolo kisakukisambukilagha ikikolo ikinine, bope nubunyafyale bwisakubusambukilagha ubunyafyale ubunine, yisakuyako injala.”—Matai 24:7.

•    Ibuku lya mu Baibolo ilya Ubusetuli likuyoba isya aba bakwelile pa falasi 4. Yumo uyu akwelile pa falasi isi ikwimila ubwite. Uwakukongapo wake ikwimila injala, pamo ukuti pakabalilo aka kwisakuya kukafu ukufyagha ifyakulya kangi abandu bisakulagha ifyakulya pantengo wakukwela fiyo. Pilemba ili tukubelenga ukuti, “Ndinkuketa ndinkuyibona ifalasi inditu umwene uyu alitoghilepo akolile ikipimilo nkiboko kyake. Ndinkupilika isyu . . . likuti, ‘Imbepe ya ngano yifwene nuntengo wa isiku limo, kangi imbepe itatu sya malesi sifwene nuntengo wa isiku limo.’”—Ubusetuli 6:5, 6,

 Amabusololi gha mu Baibolo aghakuyoba isya ndamyo ya fyakulya ghikufwanisiwa lino nkabalilo aka Ibaibolo likuyoba ukuti “mmasiku aghakubumalikisyo.” (2 Timoti 3:1) Ukuti mumanye nyingi isyakufwana na “masiku aghakubumalikisyo” kangi ni sya banyambala 4 aba bakwelile pa falasi aba bikuyobiwa mu buku lya Ubusetuli, ketelela ividiyo iyakuti Ikisu Kichenjile Ukwanda mu 1914 kangi belenga inkhani iyakuti “Kasi Ŵanalume Ŵanayi Awo Ŵakwera pa Mahachi Mbanjani?”

•    Ibaibolo lili nubulongosi bwakutula ubu bubaghile ukututula ukwifimbilisya kundamyo, ukongelela indamyo yakukwela untengo wa fyakulya pamo indamyo yakuya ni fyakulya finandi. Keta ififwanikisyo fimo mu nkhani iyakuti “Isi Mubaghile Ukubomba Ukuti Mwikaleghe Ubumi Ubusita Kulonda Fingi.”

•    Ibaibolo likutupa kangi ulusubilo ulwakuti ifindu fikuya pakuya kanunu. Lifingile ukuti pisakuya akabalilo aka ‘ifyakulya fisakuya fingi nkisu’ kangi aliwesa isakuya ni fyakulya fingi fiyo. (Salimo 72:16) Ukuti mumanye nyingi isi Ibaibolo lifingile isya nkyeni ninongwa iyi tubaghile ukulisubila, belenga inkhani iyakuti “Ulusubilo Ulwakuti Nkyeni Ifindu Fikuya Pakuchenja.”