AMUYEGHE MASO
Indamyo Yalulanga Yikukindilila—Ngimba Ibaibolo Likuyoba Isyafiki?
“Ikisu kya China kibikile ilipoti ilyakuti ikyinja iki kupile fiyo kangi aka kabutatu ukuti kuye ululanga ulukulumba fiyo bo ulu.”—The Guardian, September 7, 2022.
“Mfyinja 5 ifyakukongapo, ifighaba fimo fya ku Africa fyaghene nindamyo inywamu iyalulanga.”—UN News, August 26, 2022.
“Sikunangisya ukuti mfighaba ifyakukinda hafu ya ku Europe kukuya pakubombiwa ululanga ukukinda amalulanga agha ghabombiwe ifyinja 500 ifi fikindile.”—BBC News, August 23, 2022.
Abakalyoto abakuketesya ifyakabalilo bingi bikuti indamyo yalulanga iyi yikuya pakukindilila, kangi lumo indamyo iyi yibaghile ukufika pabubibi fiyo. Ngimba lulipo ulusubilo lulilosa ulwakuti ifindu fikuya pakuya kanunu nkyeni? Ngimba Ibaibolo likuyoba isyafiki?
Ululanga nu busololi bwa mu Baibolo
Ibaibolo lyayobile ngani ukuti mmasiku ghitu agha:
‘Yisakuyangako . . . mbuyo bu bwingi injala.’—Luka 21:11.
Utubalilo twingi ululanga lukwandisya injala. Abandu bingi bikutamiwa pamo ukufwa panongwa yanjala, kangi fyosa ifi fikufwanisya ubusololi bwa mu Baibolo.—Ubusetuli 6:6, 8.
Nongwa yafiki indamyo yalulanga yikukindilila ukubombiwa
Ibaibolo likulingania inongwa iyi indamyo iyi yikukindilila ukubombiwa. Likuti:
“Umundu akabaghila ukwilongosya mwene munjila yake.”—Yeremiya 10:23.
Ifundo iyi yikusanusya ukuti abandu ‘bakabaghila ukwilongosya bene,’ pamo tubaghile ukuyoba ukuti bakabaghila ukufwanisya ukwilongosya bene. Panongwa yakuti bikusala kabibi ifyakubomba, ifi bikusala fikwandisya indamyo bo iyalulanga nu kumalika kwa misi.
Abasayansi bingi bikwitikisya ukuti abandu bo bikupangisya ukuti ikisu kipyeghe fiyo, isi sikwandisya indamyo yalulanga pakisu kyosa.
Ubupafu nindaghilo isi bikubika kisita kwinong’onela ifya nkyeni, fikupangisya ukuti imipiki yimalike, ikisu ni kipeliwa fyonangike kangi pabumalilo amisi ghikuma mmalo muno ghaghiwagha.
Loli Ibaibolo likutupa ulusubilo.
Ngimba lulipo ulusubilo lulilosa ulwakuti nkyeni ifindu fisakuya kanunu?
Ibaibolo lifingile ukuti Kyala ikuya pakumasya indamyo yamisi. Ngimba ikuya pakumasya bulebule?
1. Kyala ikuya “pakubapyuta aba bikukipyuta ikisu.” (Ubusetuli 11:18) Umwene ikuya pakusosyapo ikindu iki kikwandisya indamyo yamisi—abandu ababibi na bapafu aba ifyakubomba fyabo fikonanga ikipeliwa.—2 Timoti 3:1, 2.
2. “Unsanga ughu ghukokya wisakuyagha bo yi nyanja.” (Yesaya 35:1, 6, 7) Kyala ikuya pakutendekesya ifindu fyosa ifi fyonangike panongwa yalulanga nukutendekesya ikisu kyapasi ukuya paladaiso, kangi amisi ghisakuya mingi.
3. “Yo uwe kukipakisya ikisu nukukitimisya ifula, kangi kukipelela ukubotola.” (Salimo 65:9) Kyala isakukisaya ikisu kyapasi kangi twisakuya nifyakulya fingi na misi amanunu.