Mu mwesi wa Julayi 2022, inkhaza isyakughoghana mwakubombela indusu syabombiwe fiyo mfisu fingi:

•   “Ukughoghiwa kwa Shinzo Abe uyu ali kalyoto pa nkhani yandyali ku Japan [Ali Ndongosi Unkulumba kunyuma uku] kubapalamasisye fiyo abandu ba nkisu iki na bandu abangi pa kisu kyapasi. Sili bo ulu panongwa yakuti ku Japan kutikubombiwa fiyo ifindu fyankhaza kangi ikisu iki kibikile indaghilo ingafu fiyo isyakufwana nukubombela imbombo indusu.”—July 10, 2022, The Japan Times.

•   “Abandu ku Denmark baswighile fiyo ukupilika ukuti mundu yumo uyu ali nindusu aghoghile abandu batatu ku malo agha bikulisyilako ifindu ku Copenhagen.”—July 4, 2022, Reuters.

•   “Ku South Africa: Akagulu ka bandu kabaghoghile abandu 15 nindusu pa malo aghakunwelapo ubwalwa ku Soweto.”—July 10, 2022, The Guardian.

•   “Abandu abakukinda 220 babaghoghile mwakubalasa nindusu ku U.S. paholide iyi yabombiwe pa 4 July.”—July 5, 2022, CBS News.

 Ngimba tuli nikifukwa kilikyosa ikyakusubila ukuti ifindu fyankhaza fisakumalika? Ngimba Ibaibolo likuyobapo isyafiki?

 Ibaibolo likuyoba ukuti tukwikala “mmasiku ghakubumalikisyo,” akabalilo aka abandu bikubomba ifindu mbukali fiyo. (2 Timoti 3:1, 3) Ifindu fyankhaza ifi fikubombiwa fikupangisya ukuti abandu bikaleghe mwalutende fiyo. (Luka 21:11) Loli, Ibaibolo lifingile ukuti mwalululu inkhaza isi sikuya pakulimaka, “abandu bisakutengana itolo abasita kupasyako nakandu kamo, tope nutwaya twabo twisakuyagha yonjolo itolo nukutengana.” (Yesaya 32:18) Ngimba inkhaza sisakumalika bulebule?

 Kyala ikuya pakubasosyapo abandu ababibi nu konanga ifilwilo fya bwite.

•   “Loli abanniongafu bo bisakwepusiwamo nkisu.”—Isya Mbupingamu 2:22.

•   “[Kyala] ikubumalisya ubwite ukwakufika nakuno ikisu kimalikile, yo yuyo ikukonyola ubupinde, nukutumulania ingwegho, nukukosya amagereta nu moto.”—Salimo 46:9.

 Kyala ikuya pakusosyapo fyosa ifi fikwandisya inkhaza nukubamanyisya abandu ukwikala ndutengano.

•   “Nkyamba kyangu ikikemo mutisakuyamo nakimo ikya kukifulasya ikinine pamo ukukighogha, namanga bo mumo amisi ghikwisulila munyanja, mo mumo kyope nikisu kisakwisulilagha nubumanyi bwa Yehova Kyala.”—Yesaya 11:9.

•   Nalinga po pakabalilo aka, Kyala ikubamanyisya abandu pa kisu kyosa ukuti baleke ukubomba ifindu fyankhaza kangi bangabombelagha ifilwilo fya bwite. Umwene ikubomba isi mwakubamanyisya “ukuponda inyubo syabo ukuya makumbulu gha kulimila, kangi ningwegho syabo ukuya sengo.”—Mika 4:3.

 Ukuti mumanye nyingi isyakufwana na isi Ibaibolo lifingile isya kisu iki lutisakuyako ulutende, belenga inkhani iyakuti “Kodi N’zotheka Kukhala Mopanda Mantha?”

 Ukuti mumanye nyingi isyakufwana namuno inkhaza sisakumalikila, belenga inkhani iyakuti “Mtendere Udzabweradi Padziko Lapansi!”