AMUYEGHE MASO
Abandu Bikubomba Ifyamiywegho Ukuti Bachenje Ifindu Pandyali—Ngimba Ibaibolo Likuyoba Isyafiki?
Ifyamiywegho fingi ifyakupalamasya ifyandyali fikubombiwa kangi fikubapangisya abandu bingi pakisu kyosa ukuti biyayeghe fiyo.
Ku Mexico, abandu 39 baghoghiwe panongwa yafyandyali, imiywegho iyi yikabombiwapo kunyuma kosa uku, kangi imiywegho iyakukindanakindana iyi yikubombiwa iyakufwana nifyandyali yikubaswighisya nukubasofania fiyo abandu.
Mwalululu ku Europe kubombiwe ifindu fingi fiyo ifyamiywegho pankhani yandyali bo ukulonda ukungogha prime minister wakisu kya Slovakia pa Meyi 15, 2024.
Kope ku United States ifindu fikaya kanunu, balondagha ukungogha pulezidenti uwa iyolo Donald Trump pa Julayi 13, 2024.
Nongwa yafiki imiywegho iyakufwana nifyandyali yikubombiwa fiyo? Ngimba yisakumalika? Ngimba Ibaibolo likuyoba isyafiki?
Ukuyabikana pankhani yafyandyali kwayobiwe ngani
Ibaibolo lyayobile ngani ukuti nkabalilo kitu aka, aka kiyobiwa ukuti “amasiku ghakubumalikisyo,” abandu bingi bisakuya nutuyilo utu tubaghile ukupangisya ifyamiywegho nukuleka ukukolelana.
“Mmasiku ghakubumalikisyo po twisakwisagha utubalilo utupalapala. Namanga abandu . . . basitakuwa ulupi, basitabwikemo, . . . basitakwighomola, . . . bakali, . . . bapefyabinabo, basitakwilingania, balwiyumbiko.”—2 Timoti 3:1-4.
Kangi Ibaibolo lyayobile ngani isya fyakubombiwa bo ukughasambukila amaboma nifyamiywegho fingi ifyakupalamasya ifyandyali nkabalilo aka. (Luka 21:9,) Loli, ifyamiywegho nukutapukana fikuya pakumalika mwalululu.
Ukumalika kwa miywegho yakupalamasya ifyandyali
Ibaibolo likuyoba ukuti Kyala isakusosyapo amaboma ghosa agha bandu nukubikpo iboma lyake ilya kumwanya.
“Kyala wakumwanya isakubwimika ubunyafyale ubu . . . bwisakupalaghania ubunyafyale bosa bula, kangi bwisakuyangako bwila na bwila.”—Danieli 2:44.
Ubunyafyale bwa Kyala bwisakupangisya abandu ukuya bakukolelana nabalutengano.
Undaghili wake, Yesu Kristu, ikuyobiwa ukuya “Mwalafyale wa Lutengano,” kangi isakuketesya ukuti “ulutengano luyeko kwa bwila.”—Yesaya 9:6, 7.
Nalinga po pakabalilo aka, abandu aba bikulaghiliwa nubunyafyale bwake bikumanyila muno babaghile ukuyila balutengano. Panongwa ya isi, Ibaibolo likuyoba ukuti: “Abandu bisakupondagha inyubo syabo nukusipela ukuya makumbulu, syope ningwegho syabo bisakusipelagha ukuya sengo. Ifikolo fya bandu fitisakwandisyamo kangi ukulwa ubwite, nalinga ko kutendekesya isya bwite.”—Yesaya 2:3, 4.
Ukuti mumanye nyingi, belenga inkhani iyakuti “Kasi Ufumu wa Chiuta Uzamuchita Vichi?” kangi amuketelele ividiyo iyakuti Kasi Ufumu wa Chiuta Ni Vichi?