Ukuleka Ukulya Inyama—Ngimba Ibaibolo Likuyoba Isyafiki?
Pakisu kyosa kyapasi, balipo abandu bamo aba batikulya inyama pamo ikindu kilikyosa ikya ilopa.
“Abandu aba bikuleka ukulya inyama bikubomba isi nubwighane ubwakuti bafighilile ifinyamana ku nkhaza isyakukindanakindana, bo ukughogha ikinyamana nubwighane ubwakuti bafyaghe ifyakulya, imyenda pamo ukuti begheko ifindu fimo ukufuma kunyama.”—The Vegan Society.
Nalinga bikufipasikisya ifinyamana, loli bamo basalile ukuleka ukulya inyama panongwa yakuti bikulonda ukupwelelela ikipeliwa, ubumi bwabo pamo balekile panongwa ya matchalichi agha bikwiputa.
“Mwakukindana nabangi aba bikusala ukuleka ukulya ifyakulya fimo, aba bikuleka ukulya inyama bikubomba isi panongwa ya isi bikusubila, kangi bikuketa ukuti kyo kindu kyakulondiwa fiyo iki bikulondiwa ukubomba ukuti ifindu fiye kanunu pakisu.”—Britannica Academic.
Ngimba ukuleka ukulya inyama yo njila inunu iyakuti abandu baye nu bumi ubununu pakisu? Ngimba Ibaibolo likuyoba isyafiki?
Muno Umpeli witu ikubaketela abandu nifinyamana
Ibaibolo likunangisya ukuti Umpeli witu Yehova Kyala, a ikubaketa abandu ukuya bapamwanya ukukinda ifinyamana, kangi abapele amaka abandu pafinyamana. (Ubwandilo 1:27, 28) Kangi, Kyala abitikisye abandu ukuti bande ukulya inyama. (Ubwandilo 9:3) Nalinga sili bo ulu, Kyala atikulonda ukuti abandu bafibombeleghe inkhaza ifinyamana.—Isya Mbupingamu 12:10.
Ukufwana na isi Ibaibolo likuyoba, ukulya inyama pamo ukuleka ukulya inyama bwighane bwa mundu aliwesa pamwene. b Tubaghile ukuya banunu pamaso pa Kyala komma panongwa yakuti tukulya inyama pamo hayi. (1 Bakorinti 8:8) Yonongwa yake umundu atikulondiwa ukunsusya umwinake isi asalile pankhani ya isi ikulonda ukulya, kali yiye yo nyama pamo hayi.—Baroma 14:3.
Isi sibaghile ukututula ukuti tusaye nu bumi ubununu nkyeni
Ibaibolo likuyoba ukuti ifi tukusala pabumi bwitu fikabaghila ukumasya indamyo sya nkisu. Indamyo sikubombiwa panongwa ya ndyali, ukusalana ifikolo, kangi ukuleka ukwenda kanunu kwa fyakyuma nkisu. Kangi indamyo isi umundu akabaghila ukusimasya. Ibaibolo likuyoba ukuti:
“Ukabaghila ukukagholosya akandu aka kaniongele.”—Undumbilili 1:15.
Umpeli witu ikuya pakumasya indamyo syosa isi tukwaghana nasyo. Ibaibolo likubombela imbombo amasyu aghakufwanikisya pa isi Kyala ikuya pakubomba.
‘Popapo ndinkukibona ikya kumwanya ikipya nikya pasi ikipya, namanga ikya kumwanya ikitasi nikya pasi ikitasi fyo fyayongile, yope ninyanja yilinkusita nukuyako kangi.”—Ubusetuli 21:1.
Kyala isakusosyapo amaboma gha bandu, pamo ukuti “ikya kumwanya ikitasi,” nukughomolelapo “ikya kumwanya ikipya,” ili lyo boma lyake ilyakumwanya. Ubunyafyale bwake bwisakusosyapo “ikisu kyapasi ikitasi,” pamo ukuti bwisakusosyapo abandu aba bikubomba ifibibi, kangi bwisakulaghilagha “ikisu ikipya,” pamo ukuti aba bikupilikila nindumbula yosa.
Bwene Ubunyafyale bwa Kyala bo bwisakubamanyisyagha abandu muno babaghile ukwikalila kanunu nifinyamana kangi nikipeliwa kyosa.—Yesaya 11:6-9.
a Yehova yo ngamu ya Kyala.—Salimo 83:18.
b Ibaibolo likuyoba ukuti tukindilileghe ‘ukwepuka . . . kwilopa.’ (Imbombo sya Batumiwa 15:28, 29) Isi sikusanusya ukuti tunganwagha ilopa pamo ukulya inyama iyi yikaboliwa pammelo, pamo kilikyosa iki bongelileko ilopa.