AMUYEGHE MASO
Ukuteka kwa Misi—Ngimba Ibaibolo Likuyoba Isyafiki?
Abandu bingi pakisu kyosa bapalamasiwe nindamyo yakuteka kwa misi. Isagha tukete amalipoti aghakukongapo agha:
“Mwalululu apa, ifula yatimile fiyo ku tawuni inywamu ku China ukukinda ifyinja 140 ifi fikindile. Ifula iyi yatimile fiyo ukwanda itolo Pachobeluka mpaka Pakitatu, kangi yatimile amamilimita aghakufwana 744.8.”—AP News, August 2, 2023.
“Pakinaye umbelo wamaka ughu ghukukoleliwa ukuti Typhoon Khanun wapangisye ukuti kwitongo kwa kisu kya Japan kutime ifula yamaka kangi umbelo wamaka waghoghile abandu babili . . . . Sikunangisya ukuti umbelo ughu wapangisye kangi ukuti ifula yitime nyingi iyakufwana amamilimita 0.6 ukutima ikighaba ikyapakati mfighaba fya mfyamba ifya nkisu kya Taiwan.”—Deutsche Welle, August 3, 2023.
“Kubumalikisyo bwa sabata uyu amalikagha, ifula yamaka yatimile mumbali mwa sumbi wa Atlantic ku Canada panongwa yakuteka kwa misi [nkighaba kya Novia Scotia] kangi yali yamaka fiyo ukukinda iyi yatimile mfyinja 50 ifi fikindile.”—BBC News, July 24, 2023.
Ngimba Ibaibolo likuyoba isyafiki isyakufwana nifyakubombiwa bo ifi?
Ikimanyikilo kya “mmasiku ghakubumalikisyo”
Ibaibolo likuyoba ukuti tukwikala nkabalilo aka kikuyobiwa ukuti “mmasiku ghakubumalikisyo.” (2 Timoti 3:1) Yesu ayobile ngani ukuti nkabalilo kitu aka twisakuketa,“imbela lutende,” pamo ifindu ifyakutilisya. (Luka 21:11) Ukuchenja kwa Kabalilo ko uku kupangisye ukuti ifindu fichenjeghe akabalilo na kabalilo, kangi fikuchenja mwakunyomosya na mwakuswighisya fiyo.
Tukulondiwa ukuya nulusubilo
Ibaibolo likuyoba ukuti ifindu fingi ifyakutilisya ifi fikubombiwa pakisu kyapasi amasiku agha fikutupa ikifukwa ikyakuyila nulusubilo. Nongwa yafiki tukuyoba bo ulu? Panongwa yakuti Yesu ayobile ukuti: “Linga mukusibona sisisi po mwisemumanyeghe ukuti Ubunyafyale bwa Kyala buseghelile.”—Luka 21:31; Matai 24:3.
Ifyakubombiwa ifi fikubombiwa nkabalilo aka fikunangisya ukuti Ubunyafyale bwa Kyala buli pipi fiyo ukuti butendekesye ifindu pakisu kyapasi iki ukongelelapo muno ifula yikutimila ukuti ifindu fileke ukonangika.—Jobu 36:27, 28; Salimo 107:29.
Ukuti mumanye nyingi pankhani yamuno Ubunyafyale bwa Kyala bwisakutendekesyela ifindu pakisu kyapasi, keta inkhani iyamutu wakuti “Ngimba Yonani Ikuya Pakukipoka Ikisu?”