Abandu pabupipi 5 biliyoni baketelile umpalano wa bola uwa FIFA World Cup ughu walyandile pa Novembala 20 mpaka Disembala 18, 2022. Abandu bingi bikuketa ukuti umpalano ughu ghubaghile ukutula fiyo ukuti abandu baye bakukolelana linga bikuketelela.

•    Nelson Mandela, uyu ali pulezidenti wa ku South Africa, ayobile ukuti: “Ibola yili namaka ghakuchenja ikisu, yili namaka ghakukasya abandu, kangi yili namaka ghakuti abandu bakolelaneghe mwapadela.”

•    Gianni Infantino, uyu yo pulezidenti wa FIFA,  a ayobile ukuti: “Ibola . . . yikupangisya abandu ukuya bakukolelana, yikubapangisya ukwipilika ukuti bali nulusubilo, yikubapangisya ukuhoboka, yikubapangisya ukwipilika ukuti babaghanile abandu abangi, kangi ukuti bali nikindu kimo iki bafwene.

 Ngimba umpalamo wa World Cup pamo inyangalo yiliyosa yibaghisenie ukutula ukufwanisya ubwighane bo ubu? Ngimba pali ulusubilo lulilosa pankhani yalutengano nukukolelana?

 Umpalano wa World Cup ghupangisye abandu ukwinong’ona nyingi komma ibola yene. Umpalano ughu ghupangisye abandu ukwanda ukuyobesania isya kendesyelo ka kisu, ubwabuke bwa bandu, ukusalana kangi inkhani yakyuma.

 Nalinga sili bo ulu, abandu bingi bikuhoboka fiyo ukuketelela umpalano wapakisu kyosa uwakukoma ibola uwa World Cup. Nalinga abandu bikuhoboka nikyakubombiwa iki loli isi sikabaghila ukubapangisya abandu ukuya bakukolelana mpaka bwila. Mmalo mwake, utubalilo twingi fikubapangisya abandu ukuti babombeghe ifindu mwakuyabikana kangi fyo ifi Ibaibolo lyayobile ngani ukuti fisakuyagha kimanyikilo kyakuti tukwikala nkabalilo aka kikumanyiwa ukuti “mmasiku ghakubumalikisyo.”—2 Timoti 3:1-5.

 Ibaibolo likutupa ulusubilo lwanaloli ulwakuti abandu bisakuya bakukolelana pakisu kyosa. Lifingile ukuti abandu bosa pakisu bisakuya bakukolelana pasi pabulaghili bwa boma lyakumwanya ili likukoleliwa ukuti Ubunyafyale bwa Kyala.”—Luka 4:43; Matai 6:10.

 Yesu Kristu, uyu yo Mwalafyale wa Bunyafyale ubu, ikwisapakuketesya ukuti pakisu kyosa kyapasi pali ulutengano. Ibaibolo likuyoba ukuti:

•    “Ubugholofu bulefukeghe itolo, nulutengano luyeghe lwingi.”—Salimo 72:7.

•    “Isakumpokagha untolwe apa linga ikukolela kumyake . . . Isakubabanga ku bandu balusyobo na baghasi.”—Salimo 72:12, 14.

 Nalinga popakabalilo aka, ifimanyisyo fya Yesu fibatulile abandu bingi aba bali mfisu 239, ukuya bakukolelana. Abandu aba bamanyile ukungana aliwesa nalinga babaghile ukukindana ifindu fimo. Ukuti mumanye nyingi, belenga inkhani isi sili pamutu wakuti “Ukumalana Nakayilo Akakubengana.”