Mfyinja 30 ifi fikindile, abandu bingi binong’onagha ukuti ifindu fili kanunu itolo pakisu kyosa. Loli ifi fibombiwe mwalululu, finangisye ukuti isi sikaya syabwanaloli.

•   “Abandu bikupasya ukuti ubwite ubu bukubombiwa ku Gaza, bukuya pakufipalamasya ifisu ifingi, bo ikisu kya Israel kikulwa ubwite nigulu lya Hezbollah pampaka wakisu kya Lebanon.”—Reuters, January 6, 2024.

•   “Amagulu agha ghikulongosiwa na Iran, ghikupoka ifighaba ifyakukindanakindana kangi ikisu kya Iran kyandile ukupanga ifilwilo ifya nyukiliya. Mwakongelelapo, ikisu kya Russia nikya China fyandile ukukolelana nikisu kya Iran. Syosa isi sikupangisya ukuti abandu bamfisu fya kubuyongelo isuba bapasyeghe fiyo.”—The New York Times, January 7, 2024.

•   “Ubwite ubu ikisu kya Russia kikubomba ku Ukraine bukonanga fiyo ifindu.”—UN News, January 11, 2024.

•   “Panongwa yakuti ikisu kya China kikukindilila ukuya kikabi fiyo, kili nifwilo ifyamaka fiyo, ikisu kya Taiwan kikukindilila ukulonda ukwiyimila pakyene kangi ukuleka ukukolelana kwa China na U.S.A, fibaghile ukupangisya ukuti kuye kupepe ukwanda ukususania.”—The Japan Times, January 9, 2024.

 Ngimba Ibaibolo likuyobapo kilikyosa pankhani yakuleka ukuyapo kwalutengano pakati pafisu amasiku agha? Ngimba sikuya pakupangisya ukuti paye ubwite bwa pakisu kyosa?

 Ibaibolo likayobile ngani isya bwite bumo ubu bukubombiwa amasiku agha. Loli lyayobile ngani ifindu ifi fikubombiwa nkabalilo kitu aka ifi “fikutwala ubwite nkisu.”—Ubusetuli 6:4.

 Ibuku lya Danieli lyayobile ngani ukuti ‘nkabalilo kakubumalikisyo,’ ifisu ifyamaka fisakulimbilanagha ubukulumba. Ukulimbana uku kwisakongelelapo ukunangisya amaka, nukonangiwa kwa “kyuma,” pamo ukuti indalama.—Danieli 11:40, 42, 43.

 Ibaibolo likunangisya ukuti ifindu pakisu fikuya pakukindilila ukonangika fiyo bo fikali ukutendekesiwa. Yesu ayobile ngani ukuti “bwisakuyako ubutolwe ubukulumba, bo ubu bukabonekamo siku, ukufuma pabwandilo bwa kisu.” (Matai 24:21) “Ubutolwe ubukulumba” bukuya pakupangisya ukuti ubwite bwa Armagedoni bwise ubu bukukoleliwa ukuti “ubwite bwa pisiku ilikulumba ilya Kyala Umwenemaka ghosa.”—Ubusetuli 16:14, 16.

 Loli Armagedoni yisakubapoka abandu komma ukubapyuta. Ukwendela mbwite ubu, Kyala isakumasya ubulaghili bwa bandu, ubu bupangisye ukuti abandu bingi batamiweghe. Ukuti mumanye muno Armagedoni yisakutwalila ulutengano lwa bwila na bwila, belenga inkhani isyakukongapo isi:

•   “Kasi Nkhondo ya Aramagedoni Ni Vichi?”

•   “Armagedoni Nkhani Yakuhobosya Fiyo!”