Fikunangisya ukuti abandu bingi bikuketelela umpalano wa Olympic uwa kyinja iki uwa 2024. Abandu abakufuma mfisu ifyakufwana 206 bikweghapo ikighaba pampalano ughu. Thomas Bach, uyu yo pulezidenti wa International Olympic Committee, atile; “Tweghilepo ikighaba pakyakubombiwa iki kitulile ukuti abandu baye bakukolelana pakisu. Isagha tuhobokeghe mwalutengano ukufwana tuli mundu yumoywene pakabalilo kampalano aka nalinga ukuti tukindene.”

 Ngimba umpalano wa Olympic ghubaghile ukufwanisya ubwighane ubwapamwanya ubu? Ngimba tubaghile ukuya nulutengano lwanaloli nukukolelana?

 Umpalano wa Olympic uwa kyinja iki ghubapangisye abandu ukwanda ukwinong’ona nyingi. Umpalano ughu ghupalamasisye fiyo isyakufwana ninyiho nifya ndyali ifi fikuyabanisya abandu, bo ubwabuke bwa bandu, ukusalana ifikolo, amatchalichi nifindu ifingi.

 Imipalano ya pakisu kyosa bo umpalano wa Olympic, yikutula ukuti abandu bahobokeghe. Loli, ifyakubombiwa ifi, fikunangisya nukukasya aminong’ono aghakuyabikana mmalo mwakutwala ulutengano nukukolelana.

 Ibaibolo lyayobile ngani isya tuyilo utu tukupangisya ukuti ukukolelana kuye kwakutamya fiyo amasiku agha. (2 Timoti 3:1-5) Ukuti mumanye nyingi isyakufwana nubusololi bwa mu Baibolo ubu, belenga inkhani iyakuti “Ngimba Ibaibolo Lyayobile Ngani Isyamuno Abandu Bisakwinong’onelagha nu Kubombela Ifindu Amasiku Agha?”

 Ibaibolo lili nulusubilo lwanaloli ulwakuya nulutengano nukukolelana pakisu kyosa. Lifingile ukuti abandu bosa pakisu kyapasi bisakuya bakukolelana ukwendela mbulaghili bwa boma lyakumwanya ili likukoleliwa ukuti “Ubunyafyale bwa Kyala.”—Luka 4:43; Matai 6:10.

 Mwalafyale wa Bunyafyale ubu, yo Yesu Kristu, isakutwala ulutengano pakisu kyosa kyapasi. Ibaibolo likuyoba ukuti:

•   “Nkabalilo kake ubugholofu bulefukeghe itolo, lope nulutengano luyeghe lwingi ukwakufika nakubumalikilo bwa tubalilo.”—Salimo 72:7.

•   “Isakumpokagha undondo apa linga ikukolela kumyake . . . Isakubapoka kubandu abalusyobo na baghasi.”—Salimo 72:12, 14.

 Nalinga gho masiku agha, ifimanyisyo fya Yesu fikubapangisya abandu bingi fiyo ukuya bakukolelana mfisu ifyakufwana 239. Pakuya Bakristu, Abaketi ba Yehova pakisu kyosa bamanyile muno babaghile ukuyila balutengano. Ukuti mumanye nyingi, belenga inkhani ya mu Ingasya ya Ndindilili iyakuti “Ukumalana Nakayilo Akakubengana.”