AMUYEGHE MASO
Ngimba Yonani Abaghile Ukubapoka Abandu?—Ngimba Ibaibolo Likuyoba Isyafiki?
Ilipoti lyakufuma kukabughatila ka United Nations lyatile:
Ukwanda pa Okutobala 7 mpaka pa Okutobala 23, 2023, abandu 6,400 baghoghiwe pabwite ubu bukubombiwa ku Gaza, nkisu kya Israeli. Kangi abandu abangi 15,200 bafulele. Bingi mwa bandu aba, bakaya basilikali. Ukongelela pa isi, abandu bingi babopile nnyumba syabo.
Ukufika pa Seputembala 24, 2023, abandu 9,701 aba bakaya basilikali baghoghiwe pabwite bwa pakati pa Russia na Ukraine. Kangi abandu abangi abakufwana 17,748 bafulasiwe ku Ukraine.
Ngimba Ibaibolo likubika ulusubilo luliku ku bandu aba bikutamiwa panongwa yabwite?
Tukulondiwa ukuya nulusubilo
Ibaibolo likuyoba ukuti Kyala isakumasya “ubwite pakisu kyosa kyapasi.” (Salimo 46:9) Umwene isakubombela imbombo Ubunyafyale bwa kumwanya, pamo ukuti ubunyafyale, ubu bwisakwingila mmalo mwa maboma ghosa gha bandu. (Danieli 2:44) Ubunyafyale bwa Kyala bwisakutwala ubutusyo ku bandu bosa.
Keta isi Yesu Kristu, Mwalafyale wa Bunyafyale bwa Kyala isakubomba:
“Isakumpokagha untolwe apa linga ikukolela kumyake, na yu ndondo uyu akaya nuntuli nayumo. Isakubapakisyagha abaywelufu na balondo, yo yuyo isakubupokagha ubumi bwa balondo. Isakubabanga ku bandu balusyobo na baghasi.”—Salimo 72:12-14.
Kyala isakubombela Ubunyafyale bwake ukusosyapo indamyo syosa isi sikwisa panongwa yabwite nifyongo.
“Umwene isakubapyasilagha amasosi ghosa, bope nufwe nalinga bo busulumanie, nalinga ko kukuta pamo ko kubaba fitisakuyangako kangi, namanga indasi syosa sikindile.”—Ubusetuli 21:4.
Mwalululu apa Ubunyafyale bwa Kyala bukuya pakuchenja ifindu pakisu. Ibaibolo lyayobile ngani isya “bwite nutupango twa bwite” ubu bukubombiwa amasiku agha. (Matai 24:6) Ubwite kangi ifyakubombiwa ifingi fikunangisya ukuti tuli “mmasiku aghakubumalikisyo” mbulaghili bwa bandu.—2 Timoti 3:1.