AMUYEGHE MASO
Nongwa Yafiki Abandu Babengene Fiyo?—Ngimba Ibaibolo Likuyoba Isyafiki?
Ukubengana, ifya miywegho, ukubabombela abangi ifyankhaza panongwa yakikolo kyabo, kangi ubwite syo nkhani isi sikuyobiwa fiyo amasiku agha.
“Abandu bighanile ukuyobesania amasyu agha ghikunangisya ukubengana nifya miywegho pamalo aghakwangalilapo pa intaneti panongwa yabwite ubu bukubombiwa pakati pa Israel na Gaza.”—The New York Times, November 15, 2023.
“Ukwanda itolo pa 7 October, 2023, abandu bikuyobesania amasyu agha ghikunangisya ulubengo kangi bikubomba ifya miywegho panongwa yakusalana ukukinda muno syayilile kunyuma uku.”—Dennis Francis, president of the United Nations General Assembly, November 3, 2023.
Sikaya syakihesya ukupilika abandu bikuyobelana amasyu agha ghikunangisya ukubengana, ukubombelana ifya miywegho nu bwite. Ibaibolo likuyoba isya bandu aba iyolo “[balulikagha] amasyu amakali ukuti mitipulo” kangi balwagha ubwite nukubomba ifya miywegho. (Salimo 64:3; 120:7; 140:1) Nalinga sili bo ulu, Ibaibolo likuyoba ukuti ukubengana uku tukukuketa amasiku agha kukutupalamasya fiyo.
Ukubengana kimanyikilo kya kabalilo kitu aka
Ibaibolo likulingania ififukwa fibili ifi abandu bikubengana fiyo amasiku agha.
1. Lyayobile ngani akabalilo aka ‘ulughano lwa bandu bingi lwisakutalalilagha.’ (Matai 24:12) Mmalo mwakughanana, abandu bisakunangisyagha utuyilo utwakukasya ukubengana.—2 Timoti 3:1-5.
2. Ukubengana kukongelela fiyo amasiku agha panongwa yafyakubombiwa fya Setano Umohesi. Ibaibolo likuyoba ukuti “ikisu kyosa kili mmaboko gha mbibi.”—1 Yohani 5:19; Ubusetuli 12:9, 12.
Ibaibolo likuyoba kangi ukuti mwalululu Kyala ikuya pakumasya ifindu fyosa ifi fikwandisya ukubengana. Isakumasya ukutamiwa kosa uku kukwisa panongwa yakubengana. Ibaibolo lifingile ukuti:
Kyala “isakupyasilagha amasosi ghosa, bope nubufwe nalinga bo busulumanie, nalinga ko kukuta pamo ko kubaba fitisakuyangako kangi, namanga indasi syosa sikindile.”—Ubusetuli 21:4.